Улицата „Педесетта Дивизија“ со години претставува симбол на запоставеност – со оштетен коловоз, тесни тротоари, небезбедни пешачки патеки и сериозен недостиг од паркинг-места. Таквата состојба не ѝ доликува на една од најважните сообраќајници во срцето на Скопје, ниту на граѓаните кои секојдневно се движат по неа.

Кандидатот за градоначалник на Општина Центар од Движењето ЗНАМ, Мирослав Лабудовиќ, најави дека ова ќе биде еден од првите капитални проекти што ќе го реализира веднаш по преземањето на функцијата.

„Се обврзувам дека улицата ‘Педесетта Дивизија’ ќе биде целосно реконструирана. Ќе изградиме нов коловоз, широки и уредени тротоари, велосипедски и пешачки зони, зелен појас и ќе воспоставиме ред во паркирањето. Ќе воведеме резидентни паркинг-места за жителите конечно да имаат приоритет пред сите други,“ истакна Лабудовиќ.

Проектот опфаќа и воведување на „Зона 30“ – со ограничување на брзината на движење, поставување ново енергетски ефикасно улично осветлување, подобрен систем за одводнување и дополнителни мерки за безбедност на пешаците.

Како што вели Лабудовиќ, целта е улицата да стане пример за ред, безбедност и зелен урбанизам – простор каде граѓаните ќе се чувствуваат пријатно и безбедно, а не само место за автомобили.

„Ова не е само реконструкција на една улица – ова е почеток на нова енергија во Центар. Почеток на еден поинаков пристап – со конкретни решенија, реални рокови и отчетност кон секој жител. Центар ќе покаже дека кога има визија, план и чесна намера – резултатите се видливи и се чувствуваат брзо,“ порача Лабудовиќ.

Со реконструкцијата на улицата „Педесетта Дивизија“ ќе започне ново поглавје во управувањето со Општина Центар – пристап заснован на дела, ефикасност и вистинска грижа за граѓаните.

Проектот ќе биде реализиран според најсовремени стандарди, а жителите ќе бидат активно вклучени во процесот на планирање, со цел решенијата да бидат практични и усогласени со нивните секојдневни потреби.

Истовремено, со реконструкцијата на „Педесетта Дивизија“, ќе започне и обнова на улиците „Мирослав Крлежа“ и „9 Мај“, каде што исто така е потребна темелна санација на коловозните ленти, тротоарите и, каде што дозволува просторот, воспоставување безбедни пешачки и велосипедски патеки.

Со тоа, трајно ќе се подобри фреквентноста и безбедноста во сообраќајот и ќе се создаде поуреден, функционален и модерен Центар.

Кандидатот за градоначалник на Општина Карпош од ВМРО-ДПМНЕ, Сотир Лукровски, изјави дека општината е заробена од приватни интереси кои ги претвориле зелените површини во градилишта и дека е време Карпош да добие нова политика – транспарентна, современа и во интерес на граѓаните.

„Во последниве денови слушаме смешни обиди за манипулација, истите луѓе кои ја водат општината со години сега се обидуваат да ме прикажат како дел од некакви матни приказни. Јас не ја водам општината – тие ја водат, и токму таму лежи проблемот“, изјави Лукровски.

Тој нагласи дека токму актуелното раководство ги претворило зелените површини во градилишта и со спорни урбанистички планови го уништило ликот на општината.

„Под нивно водство се планира огромно бетонско чудовиште кај ‘Алумина’, пет згради на ‘Прашка’, проширување на ‘Настел’, трговски центар пред ‘Горење’ и City Mall, како и нова зграда пред СЦ ‘Борис Трајковски’“, рече тој.

Лукровски оцени дека ваквите урбанистички решенија се носат „под маса“, со сериозни последици по квалитетот на живот во Карпош, додека актуелното раководство „измислува приказни за ‘Скопје на вода’ и ‘Карпош на вода’ за да го одвлече вниманието од вистинските проблеми“.

„Карпош не сака повеќе празни зборови и лажни обвинувања. Нудам план за транспарентна и модерна општина, со чист воздух, уреден урбан развој и крај на партиските тендери. Тоа не е ветување, тоа е обврска“, порача Лукровски.

Тој додаде дека „Карпош не е ничија приватна фирма, туку општина на граѓаните“, и најави дека тоа „ќе стане реалност штом ја преземе функцијата градоначалник“.

Членот на Централниот комитет на ВМРО-ДПМНЕ, Валентин Манасиевски, денес изјави дека на претстојните локални избори на 2 ноември, скопјани ќе изберат „пред сè човек, а потоа и градоначалник“ кој знае да работи за граѓаните, истакнувајќи дека кандидатот на ВМРО-ДПМНЕ, Орце Ѓорѓиевски, е вистинскиот избор за чисто и модерно Скопје.

„Со Орце Ѓорѓиевски и мнозинството во Советот ќе ги поставиме темелите на промените што му се потребни на главниот град“, рече Манасиевски, додавајќи дека поддршката од над 91.000 граѓани во првиот изборен круг е голема чест и уште поголема обврска.

Тој нагласи дека довербата од граѓаните е резултат на реални резултати кои Ѓорѓиевски ги покажа на локално ниво во Кисела Вода, како и на државно ниво, каде што Владата предводена од ВМРО-ДПМНЕ во изминатите 16 месеци значително помогна во развојот на општините.

Манасиевски потенцираше дека мнозинството во Советот на Град Скопје ќе овозможи стабилност, координација и побрзо реализирање на ветените проекти – нови мостови, почист воздух, повеќе зелени површини и поефикасен јавен превоз.

Во однос на опозицијата, тој оцени дека СДСМ како „петта партија во Скопје со околу 26.000 гласови“ доживеала сериозен пад и покажала дека нема доверба кај граѓаните.

„Наместо да понудат аргументирана критика или решенија на проблемите, тие продолжуваат по истата погрешна насока“, рече Манасиевски.

„Разликата е јасна – ВМРО-ДПМНЕ е партија која работи чесно, одговорно и транспарентно, а нашите ветувања се реални и остварливи“, додаде тој.

На крајот Манасиевски порача:

„На 2 ноември изборот е едноставен, а тоа е вистинскиот избор – глас за Орце Ѓорѓиевски, глас за бројот 9, за твојот човек, за твоето место, за твојата иднина.“