ВМРО-ДПМНЕ поднесе кривична пријава до секторот за организиран криминал и до јавното обвинителство поради, како што тврдат, наместен тендер од страна на градоначалникот, Петре Шилегов и директорот на „Водовод и канализација“, Душко Весковски Весковски во јавното претпријатие.

„Во текот на 2020-та година во април со рамковна спогодба потпишуваат пет фирми за реконструкција на водоводна мрежа во текот на годината. Потоа во текот на јули и август месец се одвива реконструкција на улица „Варшавска“ од страна на фирмата КБК Инженеринг и КОДИНГ на водоводната мрежа. Да, потоа веднаш после завршување на работата во октомври месец се изврши изборот на најповолен понудувач за истата работа која што веќе е завршена од страна на фирмата КБК Инженеринг што уште еднаш покажува дека овој тендер бил однапред договорен и наместен за оваа фирма КБК Инженеринг и КОДИНГ“, рече портпаролот на ВМРО-ДПМНЕ, Димче Арсовски, кој во изминатите денови во неколку наврати говореше на оваа тема пред новинарите.

Тој денеска истакна дека конечно некој треба да сноси одговорност во однос на парите кои што секојдневно се проневеруваат од страна на власта. ВМРО-ДПМНЕ се надева на реакција од страна на секторот за организиран криминал. Партијата, подвлече Арсовски, поднела обемен материјал со докази кои што го потврдуваат сето она кое што го говореле.

Весковски вчера на прес-конференција ги отфрли обвинувањата на ВМРО-ДПМНЕ за реконструкцијата на улицата Варшавска. Документите што опозициската партија ги објавува, според директорот Весковски, се фабрикувани, нецелосни и непотпишани, а со нив ВМРО-ДПМЕ манипулира. Весковски тврди дека објавените документи не се однесуваат на предметната јавна набавка и истите се прикажуваат за да се креира конструкција за незаконско работење со цел негова лична дискредитација во пресрет на локалните избори. Тој истакна дека ќе поднесе кривична пријава за лажно пријавување и тужба за клевета.