Свесни за недостигот на искрена желба за брзо решение, но и за критичниот момент во кој се наоѓаат Македонија, граѓаните и стопанството, ќе ги повлечеме сите амандмани на Законот за државјанството сѐ со цел конечно да се изгласа петтиот пакет-мерки за помош на граѓаните и стопанството, најави координаторот на пратеничката група на ВМРО-ДПМНЕ, Никола Мицевски.

„Дури и во вакви моменти, кога над 55 илјади граѓани останаа без работа и едвај врзуваат крај со крај, кога македонската економија е на колена и илјадници компании се затворија, Заев и СДСМ без око да им трепне покажуваат огромна неодговорност и негрижа за граѓаните и стопанството. Од друга страна, бидејќи Владата до предлагачот достави негативно мислење, а со недели Зоран Заев и други официјални лица на СДСМ даваат изјави за неприфаќање на текстот на законот, кој е во процедура, ги повикуваме веднаш да го стават на комисија бидејќи нема деловнички пречки, односно нема амандмани, да ја продолжат пленарната седница и да се гласа за овој закон“, рече Мицевски.

Истовремено, додаде тој, ја повикуваме коалицијата „Алтернатива/Алијансата за Албанците“ да ги повлече амандманите од петтиот пакет-мерки за да може компаниите и граѓаните да ги добијат и онака недоволните и задоцнети средства како помош за справување со последиците од ковид-пандемијата.

„Неодговорното однесување на Заев и власта редно е да престане. Македонските граѓани и македонската економија немаат време за чекање, немаат време за игри и пазарења на Заев, ним им е потребна помош веднаш, без одлагање. На крајот, како одговорни пратеници од оваа говорница уште еднаш апелираме до парламентарното мнозинство веднаш да се одржат и да продолжат со работа матичните комисии, каде што се наоѓаат законите од петтиот пакет-мерки, а потоа во текот на денот или најдоцна утре да се одржат и пленарните седници на кои би се гласало по овие точки“, рече Мицевски.