Претседателот на СДСМ реагира на последните одлуки на Владата на Мицкоски и бруталната партизација на Советот за граѓански надзор на комуникациите и најавува дека СДСМ ќе се спротистави, ќе преземе мерки за заштита на граѓаните и институциите од партиската хегемонија.

„Како претседател на СДСМ, чувствувам должност да предупредам за сериозната опасност која ја носат последните одлуки на Владата на Мицкоски. Само пред еден ден, слушнавме големи зборови за деполитизација и департизација на институциите, а денес гледаме целосно спротивно – брутална партизација на Советот за граѓански надзор на комуникациите. Ова тело, кое треба да биде столб на независност и заштита на правата на граѓаните, сега се претвара во алатка за партиска контрола и злоупотреба.

Ваквата лицемерност на Владата е опасна за демократијата и ја враќа земјата назад во мрачните времиња на режимскиот систем, кога безбедносните структури беа под целосна партиска контрола, а правата на граѓаните беа системски кршени. Мицкоски не само што ги изневерува своите ветувања, туку и директно ги загрозува темелите на демократскиот поредок.

СДСМ нема да остане нем набљудувач. Ќе ја информираме меѓународната заедница за оваа скандалозна партизација и ќе преземеме се што е неопходно за да ги заштитиме граѓаните и институциите од оваа партиски брутален напад. Македонија заслужува независни и професионални тела, а не репродукција на режимски практики“. вели претседателот на СДСМ, Венко Филипче.

Градоначалникот на Општина Центар Горан Герасимовски денеска лично им врачи решенија за еднократна парична помош на 100 семејства кои имаат новороденче. Еднократната парична помош којашто редовно Општина Центар ја доделува е во висина од 7.000 денари.

Герасимовски потенцираше дека Општина Центар вложува многу во растот и развојот на децата.

„Децата се нашето богатство и наша иднина, затоа и јас како градоначалник и ние како општина вложуваме многу во нивниот раст и развој. Посветуваме посебно внимание во нивен квалитетен развој, но и во поминување на нивните школски денови. Ги подобруваме условите со цел да им овозможиме достоинствен престој во градинките и во основните училишта. Упатувам благодарност до општествено одговорните компании за соработката. Радувајте се секојдневно на вашите најмали, затоа што они се и нашата светла иднина“, рече Герасимовски.

Покрај финансиските средства, новите родители добија и пакет педијатриски производи и услуги од општествено одговорните компании Жан Митрев, Mollers, Веледа, Хип, Европа лек фарма и Би-МЕК.

Општина Центар продолжува да инвестира и да се грижи за најмладите.

На денешната седница за пратенички прашања во Собранието на Република Македонија, пратеникот од редовите на ВМРО-ДПМНЕ, Бојан Стојаноски ја критикуваше опозицијата за тоа што само тројца пратеници присуствуваат на седницата во Собрание додека видните функционери на СДС, не ја користат собраниската говорница, туку се кријат зад својата партиска говорница.

„Од партиската говорница, од собраниската говорница, од прес-конференциите можете да обвинувате, да инсинуирате, да лажете, да делите квалификативи, но кога ќе дојде тоа сето да се соочи со оние коишто се одговорни за водење на политиките, кога ќе треба директно да ги прашате, тогаш ги нема“, посочи Стојаноски.

Стојаноски истакна дека истите тие пратеници, доста активно делувале од партиските прес центри, но кога ќе дојде моментот за соочување со претставниците на Владата, доаѓаат само тројца пратеници. Тој додаде дека лидерот на СДС по минатиот дебакл на седницата за пратенички прашања, не се осмелува да дојде повторно.

„Веројатно, богаташот од Дубаи, по она коешто го доби како средување претходниот пат, на памет не му паднало да дојде тука да постави прашање“, нагласи Стојаноски.

Стојаноски појасни дека, доколку пратениците од опозицијата имаат некакви прашања поврзани со конкретна тема, можат да се обратат во Собранието, на седница за пратенички прашања и да се обратат кон претседателот на Владата и кон министрите.