Петар Рупески, 30-годишник од Варош, беше најсреќен меѓу неколкуте стотини верници кои денеска влегоа во студените води на Охридското Езеро и успеа прв да дојде до светиот крст. Ова е петти пат во изминативе години како Петар го фаќа крстот, а првиот пат тоа се случило во 2005 година.

Чинот е дел од традицијата на големиот христијански празник Богојавление – Водици, денот кога православните свештеници на овој начин ги осветуваат водите низ целата земја.

Се верува дека на Богојавление Свети Јован Крстител го крштевал Исус Христос во водите на реката Јордан.

На чинот на осветувањето на водите на Охридското Езеро, што го спроведоа свештеници од Дебарско-кичевската епархија, присуствуваа десетина илјади луѓе, православни верници од Охрид и од други делови на Македонија, но и гости од странство.

Претседателот Стево Пендаровски, по повод големиот христијански празник Богојавление – Водици, упати честитка до поглаварот на Македонската православна црква – Охридска архиепископија, г.г. Стефан и до сите православни христијани.

„Богојавление нè потсетува на значењето на светата тајна на крштевањето како еден од столбовите на христијанската вера. Преку овој чин на ново, духовно раѓање се потврдува смислата на суштествувањето на секој верник. Да не дозволиме во постојаната борба со материјалните предизвици нашите животни врвици да останат без идејна и морална крепост и да продолжиме да се стремиме кон зачувување на духовните вредности“, се наведува во честитката на претседателот.

Пендаровски на членовите на Светиот архиерејски синод и на сите православни верници им посакува празникот да го минат во мир, радост и среќа.

„На Водици кога се осветуваат водите, посакувам најискрено во срцата на сите верници да се вселат мирот, хармонијата, љубовта и милосрдието кои ќе ги споделуваме со сите наши сограѓани придонесувајќи за наша лична и добробит на целата заедница“, истакнува претседателот.

Времето во државава утрово е умерено до значително облачно со магла во одделни котлини, информираат од управата за хидрометеоролошки работи.

Во текот на денот ќе биде променливо облачно, а во западните делови на повисоките места и на планините ќе има услови за повремен снег. По одделни котлини ќе има појава на магла. Ќе дува слаб до умерен северен ветер.

Максималната температура ќе се движи во интервалот од 0 до 7 Целзиусови степени.

Во Скопје, магливо и тивко. Максималната температура ќе достигне до 3 степени.