Македонија
„Го сакам Водно“: Од сите владини заклучоци итно се испочитува само тој да продолжи изградбата низ шумата
По месечна борба на претставки и жалби, стигнавме до амбис, велат од граѓанска иницијатива „Го сакам Водно“ во врска со градежните активности за изградба на гасовод низ оваа планина.
Од иницијативата јавно ги прашуваат надлежните како планираат да донесат закон за Водно кога во исто време се копа и корне низ него.
„Пред повеќе од месец дена Министерството за животна средина требаше да подготви предлог-закон за Водно, за Матка и за парк-шумата Гази Баба, за која тогаш, меѓудругото, никој не кажа дека има веќе донесен закон. Дали Град Скопје донесе програма за рекултивација и пошумување? Ветувања многу, реализација нема. Од сите донесени заклучоци на Владата пред два месеца, само еден се испочитува, и тоа веднаш. МЕР да продолжи со изградбата на гасоводот низ парк-шума Водно“, се наведува во соопштението.
Оттаму додаваат дека за да се донесе закон за Водно најпрво треба да се дополни инвентарот со нови податоци за природни живеалишта и видови во парк-шумата Водно од национално и ЕУ значење.
„Како да се направи тоа кога на дневна основа се уништуваат природните живеалишта и видови со продолжување на овој ужасен проект?! Мисли ли некој во оваа држава на општото добро? На почитување на закони и прописи? Законот за Водно требаше да го донесете за 30 дена, кон крајот на септември. За да е готов, треба да се направи биомониторинг на живеалишта и видови, а тоа е невозможно да се направи ако се гради низ Водно. Или планот ви е прво да го изградите гасоводов, да уништите живеалишта и видови, па после да носите мртов Закон за немање потреба од заштита на Водно“, ги прашуваат од граѓанската иницијатива, надлежните.
Од „Го сакам Водно“ истакнуваат дека студијата за оцена на влијанието врз животната средина (ОВЖС) на овој проект е можен фалсификат.
„Еден од професорите потпишан како соработник сам, јавно се иззема, изјавувајќи дека прв пат слуша дека бил дел од изработката на ваков проект. Директорката на фирмата ‘Технолаб’, која стои зад изработката на студијата потврди пред сите, пред Реџепи, Макрадули, Шилегов, пред член од инспекцискиот совет, пред професорот од шумарски Иван Блинков и редица други, дека е во прашање печатна грешка каде што стои името на професорот Мицевски како соработник“, објаснуваат од „Го сакам Водно“ и велат дека несфатливо е како лажирано име на соработник може да се изедначи со печатна грешка и сите глумат дека не е страшно што имаат потенцијален фалсификат во рацете.
Од иницијативата од каде за борат за заштита на шумското подрачје и еко-системот на Водно, додаваат дека на спустот кон Шишево багерите се на ивица од провалија и прашуваат дали се потребни жртви за да запре, како што велат, лудилото.
„Се работи на исклучително тежок терен со наклони од 63% во должина од 107 метри, од 71% во должина од 163 метри, итн. Работниците треба да ги носат багерите во амбис, зошто така оди трасата на гасоводот. Неколку дрвја се гледаат напред и после тоа пука видик, зошто дрвјата се удолу. Треба да го ризикуваат својот живот за да се продолжи лудилово – по секоја цена гасовод низ Водно“, се наведува во соопштението на граѓанската иницијатива од каде додаваат дека досега до разни инспекторати имаат испратено околу 30 претставки и жалби во кои укажуваат на пропусти и недозволени состојби.
Од „Го Сакам Водно“ нагласуваат и дека мерките за заштита од ерозија не се применуваат, зошто, како што истакнуваат, постапката за јавна набавка за избор на фирма која ќе ги спроведе не е завршена.
„Дали некој од надлежните излезе со став да не се гради зошто нема кој да ги спроведе мерките за заштита од ерозија? Не. Се има правосилно одобрение за градење. Толку. Преведено на јазикот на институциите: може да се прави што се сака, по секоја цена“, стои во соопштението.
Од иницијативата пишуваат и за симптоматично обновување на решението за сеча од скопскиот градоначалник Шилегов.
„Решението за сеча на Град Скопје, истото она што истече пред повеќе од месец дена, е бесправно издадено, бидејќи е издадено за реализација на правосилно одобрение за градење, но проектираната траса не е користена за да се пресмета проценката за штета и висината на средствата од МЕР исплатени на Град Скопје, што е предуслов за да се издаде Решението. За тоа е користена изменета траса, која не е дел од тоа одобрение за градење и која сè уште не е одобрена. Владеење на правото? Секако дека не. На ова вакво истечено Решение од повеќе од три недели, после нашето алармирање, МЕР бара да му се измени рокот и Град Скопје веднаш го менува од 30 дена, до 1 март 2019. Ние, граѓаните и жители на Скопје, не сме имале право да се жалиме на ова бесправно Решение за сеча во парк-шума Водно, добро од јавен интерес, бидејќи не сме била странка“, потенцираат од „Го Сакам Водно“.
Оттаму како недозволен го сметаат и фактот што не постои дозвола односно мислење од Министерство за одбрана за градба во непосредна близина на бункери и загрозување на јавната безбедност.
„Го сакам Водно“ ги повикуваат сите движења, организации, професори кои се бават со правата на работниците и човековите права да се огласат и да го дигнат својот глас против спроведувањето на гасоводот низ Водно, кои, како што наведуваат оттаму, го става на ризик и животот на обичниот работник.
Воедно ја повикуваат и министерката за труд и социјална политика, Мила Царовска да преземе итни мерки веднаш и го запре загрозувањето на животот на работниците, а министерката Шекеринска да се изјасни по прашањето на загрозување на јавната безбедност, во контекст на бункерите и гасоводот.
„Ги повикуваме да ги прекинат сите понатамошни дејствија и повикаат на ревизија на проектот, во надлежност на министерот Сугарески, за да се запре лудилото пред да биде предоцна“, се наведува во соопштението на граѓанската иницијатива „Го сакам Водно“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДУИ во коалиција со Унијата на Ромите
По потпишувањето на коалицијата за Европскиот фронт со ДПA на Мендух Тачи, Народното движење на Скендер Реџепи Зејд, ДЕП на Аријан Хоџа и Демократска партија на Турците (ТДП), претседателот на Демократската унија за интеграција, Али Ахмети одржа конференција за медиумите, каде што беше потпишан коалицискиот договор со Фатма Османоска, претседател на партијата Унија на ромите.
Претседателот на Демократската унија за интеграција , Али Ахмети ја истакна важноста на коалицијата помеѓу двете заедници, онаа на Ромите и Албанците и силата што ќе ја има Европскиот фронт во борбата против дискриминацијата и маргинализацијата на секоја заедница.
„Општина Шуто Оризари е единствената општина во Европа на ромската заедница и тоа е навистина за радување и за поддршка во сите сфери на животот. Почитувана претседателка на партијата, на средба со градоначалникот на општината, му реков, почитуван градоначалнче, немавте претставници за време на Охридскиот договор, јас ги претставував сите заедници кои немаа претставници таму, Роми, Турци, Власи, Бошњаци како и Трајковски чија евангелиска вера не ја признаваа. Г-ѓо претседателке, нема потреба да поставувате барања, ја имате нашата поддршка, јас доаѓам од народ кој бил дискриминиран, надгласуван и маргинализиран, затоа сите заедно ќе се бориме против дискриминацијата и маргинализацијата. Ромската заедница рамноправна со сите на истиот фронт. Сакам да му честитам на градоначалникот на Шуто Оризари за работата и соработката, кој оствари извонредна соработка со Албанците и советниците кои работат заедно, бидејќи градоначалникот е тој што доближува. Зборувам со голема одговорност, ќе не испробате и ќе видите какви партнери сме. Не само со зборови, туку и со дела. Ќе бидеме заедно на нашето патување, ќе ја направиме нашата земја членка на ЕУ, во нашата земја мора да владее правото, во нашата земја мора да владее вистинска демократија, а ние, Европскиот фронт, сме тие кои ќе ги градиме овие вредности. Вака како што сме заедно, на 24-ти април, да извојуваме убедлива победа и на 8-ми мај, неспорна победа. ДУИ ќе го направи невозможното, во овој мандат мора да има пратеничка Ромка, и таа ќе биде Фатма. Честитки, здравје и успех! Без дилеми, Европскиот фронт е победник на овие избори“, рече Ахмети.
Претседателката на Партијата на Унијата на Ромите, Фатма Османоска, рече дека денес единствен начин ромската заедница да најде поддршка и потпора е да се приклучи на еден единствен фронт каков што е Европскиот фронт.
„Почитуван премиере, почитуван господине Ахмети, почитувани сопартијци, советници и граѓани. Во кој фронт да се вклучи нашата партија, ако не во Европскиот фронт? Кого да избереме ако не оние со кои имаме иста визија. Ни рекоа, немате политичка сила, немате образован кадар, немате партија. Сега сме тука пред вратата на Европа, за да влеземе во ЕУ како рамноправни. Овој сојуз ќе ни даде можност да бидеме рамноправни. Како претседател, а и како партија гарантираме дека оваа соработка ќе успее“, рече Османовска.
Исто така, за важноста на Фронтот зборуваше и градоначалникот на општина Шуто Оризари, Курто Дудуш, кој истакна дека со овој фронт Ромите ќе почнат да го живеат сонот кој требаше одамна пред многу години, додавајќи дека фронтот ќе добие повеќе од 20 пратенички мандати.
„Ова што се случува во наше време, жалам што претходните ромски политичари не ја сфатија оваа можност, за да го искористат Рамковниот договор како што денес браќата Албанци ја искористија да бидат рамноправен народ со Македонците, но велам дека никогаш не е доцна. Оваа коалиција ќе донесе голема победа со плус 20 пратеници“, изјави градоначалникот на општина Шуто Оризари, Курто Дудуш.
Македонија
Родово заснованото насилство на националните телевизии во фокусот на првиот јавен состанок на АВМУ
Агенцијата за аудио и аудиовизуелни медиумски услуги денес го одржа првиот јавен состанок за оваа година, на кој директорот д-р Зоран Трајчевски направи пресек на реализираните активности согласно Годишната програма за работа во изминатите три месеци.
Присутните имаа можност да слушнат за активностите поврзани со спроведените надзори врз радиодифузерите, операторите на јавни електронски комуникациски мрежи, издавачите на печатени медиуми, изречените мерки јавна опомена, активностите на полето на меѓународната соработка.
На состанокот беа презентирани и наодите од Истражувањето за начинот на известување за родово заснованото насилство во информативните програми на националните телевизии во 2023 година, кое за потребите на Агенцијата го изработи Институтот за социолошки и политичко-правни истражувања при Универзитетот „Св. Кирил и Методиј“ во Скопје. Во него се опфатени првите десет дена од месеците јануари, февруари и март 2023 година.
Истражувањето опфаќа две целини, од кои едната се однесува на прилози кои прикажуваат конкретни случи/настани на родово засновато насилство, додека втората, на прилози кои презентираат одредени состојби поврзани со оваа појава, како податоци од истражувања, статистички податоци, однос на релевантните институции и мерките што тие ги преземаат.
Од анализирани прилози, идентификувани се 22 кои обработуваа конкретни настани што се однесуваат на родово засновано насилство. Анализата покажа дека тие се најчесто во форма на вест или извештај, актерите и изворите на информации се прецизно наведени и најчесто се емитуваат на крајот на иформативните емисии.
Во однос на прилозите кои го обработуваа родово заснованото насилство како појава, идентификувани се 11 прилози, во кои најчестите типови на насилство беа видови на економско насилство, фемицидот, семејното и психолошкото насилство.
Целото Истражување е достапно на веб страницата www.avmu.mk.
Македонија
Ковачевски: Со државната поддршка за македонските комапнии создадовме нови 5.000 работни места
Претседателот на Социјалдемократскиот сојуз на Македонија, Димитар Ковачевски денеска учествуваше и дискутираше на панел дискусија „Креираме развој преку поддршка на инвестиции“ во организација на ТИРЗ и Кабинет на ЗПВ Битиќи.
Денешната трибина, ја посочи претседателот Ковачевски, како добра можност да се сублимираат досегашните преземени мерки и резултатите во делот на поддршката на инвестициите и економијата, но истовремено и да се види што е она што треба да се преземе за уште подобри резултати.
Ковачечевски истакна дека за силна економија е потребно ликвидно и силно стопанство, нови фабрики, раст на инвестициите, капитални инвестиции во инфраструктурата, развиено земјоделство, подобар животен стандард преку повисоки плати и пензии, пристап до ЕУ пазарите.
Справување со предизвици, поддршка на домашната економија и компаниите преку правилни таргетирани мерки, финансиска поддршка, раст на платите, беа во фокусот на дискусијата, кои воедно се и дел од столбовите во новата програма на СДСМ, вели Ковачевски.
„Економијата и поддршката на компаниите и инвестициите беа високо на агендата на Владата која јас ја предводев и на претходната Влада, природно доаѓа тоа бидејќи јас сум економист, но уште поприродно доаѓа во време на криза кога мора да работите прво на спасување на ликвидноста на компаниите, второ спас на работните места и трето одржување на животниот стандард на граѓаните со оглед на тоа дека секој е погоден од кризата и компаниите и граѓаните и оние што се најзасегнати а тоа се ранливите категории на граѓани. И затоа во изминатите 7 години ние генерално имавме многу силен акцент ставено на економијата“, истакна Ковачевски.
Додаде дека со 100 милиони евра Владата предводена од СДСМ поддржа 919 компании, за разлика од 2017 година, кога имало нула поддршка за домашните компании. Во последниот деветти пакет во вредност 662 милиони евра, 492 милиони евра се предвидоа за поддршка на приватниот сектор, преку мерки за одржување на ликвидноста на компаниите, конкурентноста, поддршка за инвестиции во обновливи извори, зачувување на работните места, поволни заеми за мали и средни претпријатија во износ од вкупно 2,6 милијарди евра преку антикризни мерки се вратија назад кај граѓаните и стопанството.
Ковачевски, особено се осврна на домашните компании кои се двигател на економијата.
„До 2017 година македонскиот работник беше евтина работна сила и компаниите имаа нула поддршка. Јасна е разликата кога ќе ви кажам дека изминатите 6 години, 919 домашни компании добија поддршка во вредност од 100 милиони евра со кои тие реализираа 500 милиони евра инвестиции“, рече тој додавајќи дека секоја стратешка одука што ја имал како премиер има стратешка цел, а тоа е развој на економијата, развој на приватниот сектор, нови вработувања и подобро платени работни места.