Пратеничката Лидија Петкоска, во име на пратеничката група на ВМРО-ДПМНЕ, од собраниската Комисија за еднакви можности и од Унијата на жени на партијата, остро реагираше на постапките на претседателот на ССМ, Слободан Трендафилов, во контекст на нападите кон пратеничката Дафина Стојаноска.

„Она што го видовме од страна на Трендафилов е директен атак, обид за замолчување и брутален притисок врз жена во политика,“ изјави Петкоска. Таа оцени дека нападот врз Стојаноска е класичен пример на мизогинија, во кој функционер се обидува да дискредитира жена само затоа што таа, како што рече, ја обелоденила вистината за злоупотребите во ССМ.

„Слободан Трендафилов е во тотална паника затоа што е фатен жив во злоупотреба на својата положба. Наместо да се соочи со одговорноста за тоа како и за што ги троши парите на работниците, тој избра да се крие зад емотивни манипулации и евтини политички драми“, рече.

Според Петкоска, Трендафилов се обидува да го пренасочи фокусот од прашањето за користењето на службеното возило за приватни цели, манипулирајќи со темата за семејството и децата. Таа истакна дека снимките се направени со заштита на идентитетот на малолетни лица и дека целта не била напад кон семејството, туку разобличување на „расипништвото“ и „двојните аршини“ на функционерот.

„Трендафилов е целосно нелегитимен претседател. Подгответе си ја оставката веднаш – Македонија веќе нема трпение за вакви ликови кои возат службени автомобили, а народот го лажат и повикуваат да оди пеш“, порача таа.

Петкоска повика и на итна истрага од Јавното обвинителство по допрен глас, со конкретни прашања: Колку пати службеното возило било користено за приватни цели? Колку гориво платено од членарини е потрошено за лични потреби? За што сѐ е злоупотребена функцијата?

ВМРО-ДПМНЕ истакнува дека стои зад пратеничката Стојаноска и бара институционална и јавна поддршка, а воедно изрази жалење што, според партијата, од Клубот на пратенички поддршка не била добиена – особено од неговата претседателка, пратеничката Јована Тренчевска.

Заменик претседателот на Владата и министер за транспорт, Александар Николоски, денеска оствари работна средба со Никол Варнс, вршител на должноста амбасадор на САД во земјава.

На средбата се разговараше за реализацијата на капиталните проекти со посебен фокус на изградба на автопатите Битола – Прилеп, Кичево -Гостивар (Стража) и Тетово -Гостивар.

САД се долгогодишен стратешки партнер и силен подржувач на Македонија во реформските процеси во државата, јакнење на институционалните капацитети, владеење на правото и борбата против корупцијата, беше истакнато на средбата.

„Стратешкото партнерство меѓу двете земји е гарант за обезбедување на стабилност во земјата и регионот, особено во услови на силни економски и геополитички потреси во различни делови во светот“, соопштија од Министерството.

Економските односи уште еднаш беа во фокус на разговорите каде беа потенцирани добрите трговски врски меѓу двете земји кои, како што се наведува во соопштението, бележат континуиран раст и се од огромно значење за деловната клима и инвеститорите.

Вицепремиерот Николоски ја нагласил силната заложба на Владата за економски развој преку реализација на крупните капитални проекти, со посебен акцент на регионалното поврзување и интеграција. Истакнал дека предвидените проекти на главните транспортни коридри ќе придонесат за зарбрзан економски и инфраструктурен развој во државата и регионот.

На средбата била нагласена и поддршката на САД во делот на размена на искуства и знаења во различни дејности.

„Двајцата говорници потеницираа дека постојат реални можности за интензивирање на економската и трговска соработката и во насока на добрите пријателски односи меѓу двете земји, истакнаа заедничка подготвеност за унапредување на соработката во области од заемен интерес“, соопшти Министерството.

Ниту истраги од МВР и Обвинителството ниту одземање на имунитетот, премиерот Христијан Мицкоски смета дека претседателот на Сојузот на синдикати на Македонија (ССМ), Слободан Трендафилов, треба да ѝ се извини на пратеничката Дафина Стојановска оти ја навредувал откога таа објави видео од него со децата за да објасни како го користи службениот автомобил. Премиерот Мицкоски жали што Трендафилов не е навикнат на јавни критики.

„Го видов тоа што го кажуваше господинот Трендафилов. Јас видов еден човек кој што беше, би рекол, премногу нервозен. Истури една салва навреди, но ние сме јавни личности, навикнати сме на тоа. Жал ми е што и други што пледираат да бидат јавни личности не се навикнати на јавна критика. Јас многупати сум рекол, секој оној кој пледира да биде јавна личност треба да биде свесен дека ќе биде подложен на јавна критика. Некогаш тоа е вистина, некогаш е невистина“, рече премиерот и нагласи дека во неговиот случај во најголема мера она што се кажува како јавна критика, на социјалните мрежи и во одредени медиуми, е невистина.

Премиерот Мицкоски рече дека е загрижен за нивото на култура што вчера го покажа Трендафилов.

„Како загрижен родител, таков се обидуваше да се претстави, барем речникот да му биде попристоен бидејќи сепак станува збор за жена, мајка. На тоа видео никој не ги покажува малолетните деца на господинот Трендафилов. Напротив, колку што јас можев да видам, многу е внимавано на тоа. Мораше господинот Трендафилов да биде малку покултурен со својот речник. Сите оние навреди кои ги кажа заслужуваат, во најмала рака, денеска пратеничката Дафина Стојановска да добие извинување од него. Доколку тоа не го стори уште еднаш ќе ја пропушти шансата да видиме човечки материјал во него. Сето она што го кажа, оној фројдовски модел, претпоставувам длабоко во него работи потсвеста, токму тоа го мисли за самиот себе “, рече премиерот Мицкоски.

И денес премиерот уверуваше дека протестите за минимална плата 600 евра и 100 евра зголемување на останатите плати се политички мотивирани и дека се неуспешна стратегија на опозицијата која настојува преку Трендафилов да наштети на Владата.

„Тие мислеа дека ќе најдат прокси преку Трендафилов кој што е влезен во една специфична состојба кога се обидува да биде на сцената во Македонија, а од друга страна кога ќе биде критикуван тогаш почнува да навредува и со крвави зеници и белки во очите напаѓа мајки, сестри, сопруги и така натаму. Тие мислеа дека на тој начин ќе нанесат штета на Владата, и тоа е легитимно. Ние можеме само да се бориме и да докажеме дека тоа не така“, вели Мицкоски.

Во следните денови тој најави дека ќе објаснат на македонската јавност кои се лицата кои излегуваат на блокадите за кои тврди дека се поврзани со опозицијата, а тоа ќе го видат сите од она што Владата го поседува.

Премиерот денес уште еднаш, по кој знае кој пат, кажа дека зголемување минималната плата се договора во Економско – социјалниот совет, а Владата како работодавач се договорила за зголемување на минималната плата до 2028 година.

ССМ излезе на протести оти две годни нема договор за зголемување на минималната плата. Протестите продолжија денес со блокада на Стопанската комора, а во вторник ССМ најави блокада на Владата.

По завчерашната блока ма Собранието, откога пратеничката Стојановска објави видео од Трендафилов со децата, тој објаснувајќи дека „монструмите се меѓу нас“ побара МВР и Обвинителството да направат истраги, Собранието да ѝ гоодземе имунитетот, а најави дека за случајот ќе ги извести сите амбасади во земјава и сите братски синдикати на ССМ.