Првиот заменик-претседател на Владата и министер за политички систем и односи меѓу заедниците, Артан Груби денеска одржа прес-конференција на која истакна дека неговата мисија е рамноправноста, рамноправност во правата, но и во одговорноста.

„Јас сум почестен да ви служам како Прв вицепремиер во историјата на нашата земја, позиција која е договорена за да гарантира кохезија и координација во владината коалиција и за спроведување на политиките од ресорите и колективот, но и за замена на премиерот во негово отсуство. Оваа поинаква кохезија, оваа конструктивна работна атмосфера ја чувствуваат нашите граѓани и нашите меѓународни пријатели уште од првиот ден. Граѓаните му веруваат на овој голем чекор кон потполната рамноправност која ќе се спроведе и во последните 100 дена со изборот на првиот Премиер Албанец по полн политички мандат. Сето ова, заедно со начелото на искрено партнерство и консензуалност ја направија оваа Влада издржлива и силна, направија оваа Влада да го претставува целото општество“, рече Груби.

Додаде дека како Прв заменик на претседателот на Владата, надлежен за координација помеѓу политичките ресори обврска му е да се грижи за спроведувањето на Охридскиот рамковен договор, но и за добра и ефикасна кохезија на општеството еднакво за сите.

Најави дека во соработка со министерот за информатичко општество и администрација, во најкус можен рок, ќе обезбедат распоредување на сите вработени во согласност со Охридскиот рамковен договор во државните институции. Ќе ги признаат факултетските дипломи на сите административци и ќе ги мотивираат да се надградуваат и својата иднина да ја гледаат во земјата.

„Ќе започнеме да ги мониторираме потребните реформи за потполна рамноправност на граѓаните, вклучувајќи ја и не селективната правда преку ветингот. Не може да постои една правда за едниот а различна за другиот, ниту пак една за граѓаните а друга за политичарите. На правдата испорачана по телефон и дојде крајот“, рече Груби.

Додаде дека ќе ја интензивираат динамиката на спроведувањето на Законот за употреба на јазиците, ќе ги комплетираат Агенцијата за употреба на јазиците и на Инспекторатот за употреба на јазиците.

„Ќе соработувам со моите колеги за зголемување на квалитетот на образованието и културата, како области кои придонесуваат за зближување на граѓаните. Исто така ќе соработувам со бизнис-секторот за поддршка на добрите меѓуетнички односи и вредностите на толеранција и почитување, правична и соодветна застапеност и меѓусебна доверба и во нивните работни средини, за да се искористи целокупниот човечки потенцијал со кој располага нашата земја, Исто така силно ќе го поддржам спротивставувањето на верската индоктринација, религиозната и етничката нетрпеливост која се продуцира во медиумскиот простор и социјалните мрежи; Силно ќе работиме во насока на одржување на постојаното пријателство со Соединетите Американски Држави и Европската Унија“, рече Груби.

Тој додаде дека оваа Влада ги става граѓаните во првите ВИП седишта и ќе ги слуша и ќе работи за нив.