Од ЈСП „Скопје“ преку соопштение информираат дека од утре, вторник, па сè до недела, во редовниот линиски превоз ќе бидат вклучени и две привремени линии што ќе сообраќаат до СЦ „Борис Трајковски“. Станува збор за линиите 100 и 200, првата ќе сообраќа од Ново Лисиче, а втората од Дексион, а и двете линии, како што посочуваат од ЈСП, се воведуваат по барање на „Скопски саем“ за полесен пристап на посетителите на „Саемот на мебел 2018“.

Двете линии, како што посочуваат од ЈСП, ќе сообраќаат по 11 часот.

Возниот ред 100, кој ќе трга од Ново Лисиче, па сè до СЦ „Борис Трајковски“, ќе се движи по улицата Февруарски поход, булеварот В. С. – Бато“, булеварот Јане Сандански, булеварот К. Ј. – Питу, булеварот Кочо Рацин, улицата 11 Октомври, улицата Димитрие Чуповски, булеварот Св. Климент Охридски, булеварот Партизански одреди, улицата Бледски договор, СЦ „Борис Трајковски“ и обратно по истата траса, соопштуваат од ЈСП.

Возниот ред 200, пак ќе трга од Дексион и ќе оди до спортскиот центар „Борис Трајковски“, ќе се движи по улицата Црногорска, улицата Кузман Шапкарев, улицата Ѓорче Петров, булеварот Партизански одреди, улицата Бледски договор, па сè до СЦ „Борис Трајковски“ и обратно по истата траса, велат од ЈСП.

И двете автобуски линии, како што информираат од ЈСП, ќе сообраќаат до 19 часот.