Македонија
Демократското движење: Да престане срамниот политички притисок на Груби кон претседателката на Врховниот суд преку неговите портали

Соопштение на Демократското движење
„Денес, ќе ви презентираме докази со кои уште еднаш ќе потврдиме дека јазборуваме вистината. Од порталите ‘Индекс.мк’ и ‘Деск.мк’ деновиве се води срамна негативна кампања кон претседателката на Врховниот суд, Беса Адеми, која, пред сѐ, е почитувана жена.
Зошто? Затоа што таа не сака да предложи и усвои начелно мислење со кое Врховниот суд ќе ги оживее аболициите на поранешниот претседател Ѓорге Иванов.
Што е целта? ДУИ да го врати Никола Груевски од Будимпешта по секоја цена. Не заради ЕУ туку заради теснопартиски интереси. Одат контра на нашите меѓународни стратешки партнери САД и ЕУ.
Суспендирањето на правната држава е меѓу главните забелешки на најлошиот досега извештај за напредокот на Северна Македонија во ЕУ. ДУИ и СДСМ, кои се претставуваат како европскиот фронт, всушност се главните кочничари на европската перспектива на нашата земја.
Еве ги доказите:
Интернет-порталите ‘Индекс.мк’ и ‘Деск.мк’ се сопственост на актуелниот директор на Државната лотарија и десна рака на Артан Груби, жртвеното јагне Прпарим Бајрами, чие име во последно време се поврзува со многу криминални афери.
Јавно прашуваме дали канцелариите на гореспоменатите портали се во објектот на Министерството на Артан Груби?
Има ли посилен доказ од ова дека причина за најлошиот извештај на ЕУ за Северна Македонија е ДУИ.
Со своите подземни дејства буквално ги рушат правосудниот систем и правната држава.
Да ти е полна устата со ЕУ, а да шуруваш со Груевски, е тешка манипулација и потценување на интелегенцијата на Албанците. Затоа следува жестока казна на изборите. Одговорност ќе има. Никој не може да биде посилен од владеењето на правото, еднаквоста пред законите и правната сигурност.
Промените доаѓаат!“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Невреме во Скопје: паднати дрвја, поплавени улици, заглавени возила кај „Мавровка“

Поплавени улици, паднати дрвја и пречки во сообраќајот во Скопје по денешното силно невреме проследено со пороен дожд, град и грмежи. Од Центарот за управување со кризи соопштија дека нема повредени лица.
ЦУК преку бројот за итни повици 112 прими пријава за паднато дрво на ул. „Кочо Битолјанов“, од спротивната страна на „Алкалоид“, во близина на Скопска Пивара. Постои опасност дрвото да оштети електрични кабли. Надлежните служби се известени и ќе постапат согласно своите надлежности.

На бул. „Никола Карев“ кај Бит Пазар, под Стоковна куќа Мост, има приближно 50 см вода. Целиот булевар е блокиран, а повеќе возила се заглавени.
Дополнително, пријавено е дека на ул. „Петар Манџуков“ во населба Бутел улиците се поплавени, шахтите се запушени и водата не се повлекува.
Добиена е пријава и за паднато дрво на ул. „Рузвелтова“, во близина на Сетек, Општина Карпош. Дрвото има блокирано три сообраќајни ленти, и во моментов проодна е само една лента.
Добиена е пријава и за поплавена улица на булеварот „Македонска Косовска Бригада“ во Општина Чаир. Неколку возила се заглавени, а паркот во близина е исто така поплавен.
Дополнително, пристигната е пријава за навалена бандера од уличното осветлување на улицата „Народни Херои“ кај Мечкаров, во Општина Кисела Вода.
„По денешното невреме кое ја зафати територијата на државата, Центарот за управување со кризи (ЦУК) веднаш ги активираше своите механизми за следење и координација. Директорот, Мухамет Али, во текот на целиот ден ја следеше ситуацијата и беше во континуирана комуникација со сите надлежни институции, со цел навремено и ефикасно справување со последиците од невремето“, велат од ЦУК.
Според моментално достапните информации, на повеќе локации се евидентирани материјални штети – поплавени улици, паднати дрвја и пречки во сообраќајот. Не се пријавени повредени лица.
Од ЦУК велат дека известени се и надлежните служби за водовод и канализација, противпожарната служба и Дирекцијата за заштита и спасување (ДЗС), кои се во подготовка за постапување согласно своите надлежности.
ЦУК ги повикува сите граѓани да останат внимателни и да ги почитуваат препораките на надлежните служби, како и навремено да пријавуваат опасни или животозагрозувачки состојби на бројот за итни случаи 112.
Македонија
Николоски: Судството и обвинителството целосно потфрлаат

Перформансот на економијата е одличен, ги гледате бројките и резлтатите, ќе се почуствуваат, граѓните го гледааат ама не го чуствуваме. Потребно е најмалку една година откако ќе се случи тој економски напредок за да го почуствуваат луѓето на својот џеб и тоа ќе има континуитет, оценува вицепремиерот Александар Николоски.
„Во однос на корупцијата можам да кажам дека можеме повеќе и подoбрo пред сe во делот на судството и обвинителството. Мислам дека МВР коректно си ја работи својата работа, но МВР е една од алките во системот. Мислам дека судството и обвинителството целосно потфрлаат и оваа ситуација не може да остане вака. Знаете дека ние поведовме постапка за разрешување на пет члена на Судскиот совет на крај најдоа дупка во Законот и велат не поднесуваме оставка. Што морал да имаш да ти изгласаат недоверба во Собрание, а ти да продолжиш да седиш на таа маса и да носиш одлуки?“, истакна вицепремиерот Николоски.
Негова оценка за судството и обвинителството е дека не се на својата задача и не можат да ја следат оваа Влада предводена од ВМРО -ДПМНЕ.
„Перформансот што го дава оваа Влада на ВМРО -ДПМНЕ, судиите и обвинителите не можат да го следат”, изјави вицепремиерот Николоски.
Македонија
Муцунски во Париз ја реафирмира стратешката ориентација на државата кон членството во ЕУ

Во рамки на работната посета на Париз, министерот за надворешни работи и надворешна трговија, Тимчо Муцунски, оствари одделни средби со претседателката на Интерпарламентарната група за пријателство Франција – Западен Балкан, сенаторката Марта де Сидрак, и со советникот на францускиот претседател Емануел Макрон за Континентална Европа и Турција, Бертран Бишвалтер.
На средбата во францускиот Сенат беше истакнато значењето на парламентарната дипломатија во градењето на стабилни и севкупни односи меѓу двете земји. Се разговараше за европската перспектива на Северна Македонија и регионот, како и за можностите за унапредување на парламентарната соработка и продлабочување на политичките и економските врски. Посебен акцент беше ставен на доследната поддршка од француска страна за македонските евроинтеграции.
На средбата со советникот Бишвалтер беа отворени прашања од заеднички интерес, вклучително и актуелните геополитички предизвици во Европа, важноста на регионалната соработка, партнерството и придонесот на Република Северна Македонија во рамките на НАТО Алијансата, како и понатамошното јакнење на соработка во контекст на европската и регионалната стабилност.
Министерот Муцунски ја реафирмираше стратешката ориентација на државата кон членството во Европската Унија, како и континуираната посветеност на реформските процеси и на добрососедските односи. Воедно, беше потврдена значајната улога на Франција како силен поддржувач на европската перспектива на Северна Македонија и на регионот, со цврста определба оваа поддршка да продолжи со несмален интензитет и во наредниот период.