Македонија
Дескоска: Кривичните постапки за одговорност за злоупотреба на АКМИС-системот даваат резултати

Министерката за правда, Рената Дескоска, се обрати на денешната конференција со наслов „Поглавје 23: Македонското сидро или едро“, која се одржа во организација на Институтот за европска политика (ЕПИ).
Изгласаните закони во областа на правосудството и борбата против корупцијата, како Законот за судовите, Законот за Судскиот совет и Законот за управните спорови, Законот за спречување на корупцијата и судирот на интересите и новоформираната ДКСК, овозможувањето пристап до правда за маргинализираните категории граѓани, драстично намалените казни за фирмите и граѓаните, новата тарифа за извршителите и нотарите – се дефинитивно едро и ветар во грбот за целокупниот процес на интеграции што нè придвижуваат кон заедничката цел: членство во Европската Унија.
„Денешната конференција има многу креативен наслов – ‘Поглавје 23: Македонското сидро или едро’, кој, претпоставувам, упатува на една метафора на целокупниот процес на евроинтеграции како еден тип што нè влече напред кон подобри состојби во државата, но кога ќе ги постигнеме стандардите, се надевам дека ќе успееме тие вредности да ги закотвиме во нашата држава и да ги исполниме очекувањата на граѓаните во делот на правосудството и заштитата на човековите права, нешто што се наметнува како насушна потреба на сите граѓани“, потенцира Дескоска.
Како своевидна потврда за успешно спроведените реформи министерката Дескоска ja цитира изјавата на еврокомесарот Хан од отворањето на Виенскиот економски форум: „Чест ми е да ја презентирам успешната приказна на Северна Македонија. Приказна за тоа како една визија, политичка промена и определба може да го измени патот на земјата. Честитки за Северна Македонија“.
Во насока на воспоставување независно, непристрасно, одговорно и ефикасно судство, министерката Дескоска елаборира за преземените активности за реконструирање на законската рамка во правосудството.
„Изготвивме нов Закон за Судскиот совет, како и измени на Законот за судовите за кои Венециската комисија даде позитивни мислења. Имено, Комисијата заклучи дека реформите во правосудството се позитивни и дека постои усогласување на домашното законодавство со меѓународните стандарди. По однос на предлог-законот за Судскиот совет, Венециската комисија оцени дека одредбите се јасни и во согласност со меѓународните стандарди, а нивната правилна имплементација може да обезбеди независност и ефикасност на судството“, истакна Дескоска.
Со измените на Законот за судовите се доуредија и зајакнаа одредбите за дисциплинска одговорност на судиите, прецизни основи за разрешување на судиите, покачување на критериумите за избор на судии, како и задолжителна академија за избор на судии.
„Во новиот Закон за Судскиот совет имаме воспоставени механизми за одговорност на самиот Судски совет доколку не ја врши својата работа. Значи, одговорните судии доколку не бидат казнети или разрешени од страна на Судскиот совет, ќе повлечат одговорност на самите членови на Судскиот совет“, потенцира Дескоска. По однос на наодите од претходната година, утврдени во првиот извештај од надзорот за функционирање на АКМИС-системот, во моментот пред Основното јавно обвинителство Скопје се води предистражна постапка.
„За злоупотребата на АКМИС-от или распределбата на предметите, ставена е основа за одговорност на судија што ќе прими предмет распредлен надвор од АКМИС-системот, следува постапка за разрешување, исто така и за претседател на суд што ќе распредели предмет надвор од АКМИС-от, ќе биде разрешен. Поведените кривични постапки за одговорност за злоупотреба на АКМИС-системот даваат резултати. Од почетокот на оваа година формиравме комисија што прави надзор во повеќето судови како функционира АКМИС-системот. Досега е завршен надзорот над шест суда, поднесени се извештаи, веќе гледаме драстично различна ситуација од она што го имавме во претходниот период. Сега резултатите покажуваат дека претседателите не се дрзнуваат да распределуваат предмети под рака или на начин недозволив од законот“, истакна Дескоска.
„Круна на целокупната работа беа донесувањето на Законот за спречување на корупцијата и судирот на интереси и изборот на новата антикорупциска комисија, што покажува дека навистина имавме искрена и добра волја во креирањето на законската рамка. Оваа искреност се одразува во секојдневните активности на ДКСК, каде што гледаме посветено работење кое ги дава своите резултати“, потенцира министерката.
Министерката Дескоска се надева дека со почетокот на имплементацијата на Законот за Судскиот совет и Законот за судовите таквата промена ќе ја видиме и почуствуваме во Судскиот совет како резултат на она што е направено со креирањето на законската рамка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Апелирам Македонците од Албанија масовно да учествуваат во пописот, порача Мицкоски

Додека се случуваат сите овие проблеми, пропагандите на соседите никогаш не престанаа. Додека оваа власт не убедува во придобивките од добрососедскиот договор кои самите го склучија, Бугарија тера отворена пропаганда против Македонија и како тоа да не е доволно, овие денови тие вршат жесток притисок и терор при пописот во Албанија, македонското малцинство да се впишува како етнички Бугари. И сега познати ни се намерите на бугарската политика, но необјаснив е молкот на македонската власт. Да бидам искрен не очекувам дека Али Ахмети ќе се прекрши за Македонците во Албанија, но барем Ковачевски да преземе мерки и да реагира на ваквиот отворен притисок за асимилација која гледаат како им се случува пред очи, рече лидерот на ВМРО-ДПМНЕ, Христијан Мицкоски говорејќи од Велес.
Мицкоски ги повика Македонците да бидат дел од пописот во Албанија.
„Од овде, од срцето на Македонија јавно повикувам и апелирам Македонците од Албанија да излезат и да се попишат како Македонци, она што со векови биле и ќе продолжат да бидат. Апелирам дека сега е моментот да не потклекнуваат, и одговорот на сите туѓи пропаганди да биде масовност. Следуваат промени во Македонија и како Македонци и Македонија како нивна држава од која тие влечат потекло, ќе им помогне во иднина, и ќе ни биде полесно повеќе да се вклучиме во поддршката за развој и негување на македонските особености и култура. Апелирам сега кога притисоците и заканите се методот со кој Бугарија врши пропаганда, одговорот на Македонците од Албанија да биде масовност на пописот“, кажа Мицкоски.
Според него она што се случува во политиката тука во Македонија, се уставните измени.
„Позади измените на Кривичниот законик, амнестијата која сами си ја гласаа, и оние јавни превирања и препукувања со сеништата од минатото, се основата на валканиот план на Владата, валканиот план на власта се само уставни измени. Бидејќи ја знаат непопустливоста на пратениците, ја знаат и одлучноста на раководството на ВМРО-ДПМНЕ и народот против прифаќање на бугарски диктати, тие пробуваат да создадат непринципиелни коалиции кои би можеле да доведат до уставни измени. Иако шансите реално тие да се случат не се ни ниту теоретски“, заклучи Мицкоски.
Македонија
Мицкоски му посака добро здравје на Груевски: „И’ заби нож во грб на сопствената партија“

Морам да кажам дека како човек оваа јавна преписка со поранешниот претседател на ВМРО-ДПМНЕ не ме прави среќен, ниту ова е битка која ја одбрав јас, но недвојбено никој не треба да ја тестира мојата определба да се опстои на нашите ставови дека прифаќање на диктати не доаѓаат во предвид по ниту една цена. Ниту пак дека тоа може да помине низ мала врата или било каква комбинација. Морам да кажам дека сум длабоко разочаран од неговото однесување. Долго време јавно одбегнував да се произнесам за тоа, и за многу, многу други работи кои ми се случуваа мене и на моите најблиски соработници во битката ВМРО-ДПМНЕ да ја ставиме на здрави нозе и она што е денес силна структура на прагот на најголемата победа. Се до извесен период, иако немав и немам никакви контакти, мислев дека делиме иста цел. Патот до оваа цел ВМРО-ДПМНЕ силно и обединето беше трновит, со многу удари, и мене како човек ми е предизвик да се борам против оваа власт и да бидам рамо до рамо со мојот народ во битката да ги смениме, но морам да кажам дека воопшто не ми беше лесно, ниту сеедно да ги примам ударите внатре, од луѓето со кои сум мислел дека делиме иста кауза, рече лидерот на ВМРО-ДПМНЕ, Христијан Мицкоски говорејќи за поранешниот претседател на партијата.
Не можам никако да разберам, додаде Мицкоски, „како воопшто е возможно да се уортачи било кој со истите кои ја предизвикаа и се причина за сите неволји, па дури и неговите лични, прогони и предавства кои се случија на Македонија, да дели УСБ-а и писма по кабинетите на ДУИ, да има непринципиелни разговори“.
„За многу работи од внатрешните работи со поранешниот претседател нема да говорам и ќе оставам историјата да суди, за многу работи ќе се послужам со онаа народната „ти кон мене со клетви, јас со благослови“, но немојте никогаш и никој да ја тестира нашата одлучност да ги браниме нашите ставови, ниту пак намерата да не отстапиме во работите кои веруваме или пак било како да го разочарам народот“, рече Мицкоски.
Според него чудно е проклетството на историјата.
„Чудно е тоа проклетство на историјата, човекот кој збореше за нож во грб, и разни ножиња да стане токму тоа за сопствената партија. Мене не ми беше цел да влезам во конфликт и јавна преписка со него, но овој валкан план мораше да го знае јавноста. И ова е вистински последниот пат кога се осврнувам на оваа тема и нема повеќе да говорам за ова зошто имаме работа, а тоа е пад на оваа криминална Влада. Јас му посакувам добро здравје, добра среќа и да не го прави на другите тоа што нему не сака да му го прават. Имаме работа, нашиот противник е оваа криминална Влада на чело со СДСМ и ДУИ“, заклучи Мицкоски.
Македонија
Мицкоски: Ајде на избори, цунами има да им се случи, ќе ги оддува торнадо

„Ги слушам оние прозивки од СДС дека сме биле разединети и со конфликти, тие кои не смеат ниту името на нивниот поранешен претседател да го кажат. Епа еве една порака до нив и до нивните лакеи и до сите оние подлизурковци кои што мислат дека ВМРО-ДПМНЕ на овој начин ќе се раздели ќе се подели има еден начин да тестирате и да се соочите со вистината, ајде на избори“, повика претседателот на ВМРО-ДПМНЕ, Христијан Мицкоски на денешната конференција на УМС на ВМРО-ДПМНЕ во Велес.
„Еве ако ВМРО-ДПМНЕ е навистина така поделено како што вие викате, ајде избори тоа е единствениот начин како ќе покажете и докажете дека тоа што го зборувате е вистина. Но, тоа вие обични кукавици нема да го направите. Затоа што знаете како ќе поминете. Ќе ве разбиеме сите на купче и СДС и ДУИ. Цунами ќе ви се случи, ќе ве оддува торнадо, затоа што позади нас стои народ, и народ ќе ви се случи“, порача Мицкоски.
Претседателот на ВМРО-ДПМНЕ рече дека на избори ВМРО-ДПМНЕ сите на купче и СДС и ДУИ ќе ги разбие. Цунами има да им се случи, ќе ги оддува торнадо, затоа што позади ВМРО-ДПМНЕ стои народ.
„Ќе ве победиме силно затоа што ја претеравте. Затоа што камен на камен не оставивте. Ајде на избори. Да видите што е сила и посветеност“, повика Мицкоски.