Министерката за правда, Рената Дескоска, денеска оствари средба со амбасадорите на земјите членки на Европската Унија во организација на Делегацијата на Европската Унија и евроамбасадорот Жбогар. На средбата таа ја истакна својата силна определба за реформи во ресорот.

„Реформите ги правиме за подобрување на човековите права, за создавање систем на владеење на правото, затоа што европските стандарди се потреби на граѓаните на Република Македонија, а не само услов за пристапни преговори со Европската Унија“.

„Кога ќе се загуби довербата во институциите, најтешко е да се врати. Секако, не можеме да очекуваме тоа да се случи преку ноќ, но ќе го ставиме судството на вистинскиот пат“, рече Дескоска.

Дескоска ги информира амбасадорите за тековните реформски активности, како и за плановите за идни активности во приоритетните области – правосудството, борбата против корупцијата и организираниот криминал, забрзување на административните постапки и унапредувањето на човековите права во Република Македонија.

Министерката за правда воедно најави дека во претстојниот период ќе следат многубројни и значајни законски измени од приоритетните области што ќе бидат спроведени во консултација со компетентни лица од областа на судството и обвинителството, експертската јавност и граѓанскиот сектор, а за кои ќе се бара широка поддршка од политичките партии претставени во Собранието на Република Македонија.