Намалувањето на трошоците на граѓаните во постапките пред нотарите е главна цел на предложените измени на Законот за нотаријатот, потенцира министерката за правда, Рената Дескоска, на јавната расправа по предлог-законот за изменување и дополнување на Законот за нотаријатот, организирана од страна на Комисијата за политички систем и односи меѓу заедниците.

Според министерката Дескоска, станува збор за намалување на трошоците во постапките пред нотарите за најсиромашните граѓани, кои не може да си ги платат сметките за комунални трошоци и кои земаат мали потрошувачки кредити.

„За сметки за вода, смет, телефон и одржување заеднички простории во висина до 6.000 денари нема да биде потребно учество на адвокати, како и за сметки за струја и парно до 15.000 денари. Со тоа ќе се исклучат и адвокатските трошоци за лицата што имаат неплатени сметки до одреден износ. Обврската на плаќање судска такса отпаѓа – тоа ќе биде дополнително олеснување на трошоците на граѓаните“, истакна Дескоска.

Како дополнување на намалувањето на трошоците за горенаведената категорија граѓани, една од клучните измени, според министерката Дескоска, е намалувањето на нотарската награда, која со предложените измени ќе биде 10 отсто, но не повеќе од 500 денари, па, така, доколку долгот е 1.000 денари, надоместокот за нотар ќе биде 100 денари. Ако долгот е 10.000 денари, надоместокот нема да биде 1.000, туку 500 денари.