Македонија
Директорот на МКЦ поднесе оставка од здравствени причини, негира незаконско работење за прославата со Дино Мерлин

Русе Арсов се повлече од директорската функција на Младинскиот културен центар (МКЦ).
Како што информираше, оставката ја поднесува од здравствени причини.
„По три и пол години, премногу љубов, страст и жар – не издржа срце јуначко 🙂 па од здравствени причини ќе морам самиот да се повлечам од оваа функција“, пишува Арсов во оставката.
Тој потсети дека во последните години МКЦ реализираше бројни кинопроекции, културни настани и фестивали. Во однос на барањето на Антикорупциска, Обвинителството да ја истражува новогодишната прослава во Скопје на која настапи Дино Мерлин, Арсов рече дека е уверен оти во овој предмент нема никаков криминал.
„Ги донесовме Лиза Жерар во Филхармонија, Љубомир Мелник во Пошта… И да, паднавме на Дино Мерлин. Ох судбо клета! И додека ги градевме убавите работи, четири години континуирано се дружевме и со Финансика полиција и со Јавно обвинителство и со разни ревизии… Се вадеа документи, се уништуваа животи… а на крај едно по едно обвинувања завршуваа како неосновани. Затоа ДА, ве молам слободно затворете го веќе и овој предмет Дино Мерлин. Уверен сум дека нема никаков криминал ни таму, а од последниве години го научивме и гадното чувство на обвинување – па затоа, ајде ве молам“, вели Арсов.
Тој нагласи дека се повлекува само од директорската функција, но останува во МКЦ. На оној што ќе дојде на неговата позиција му порача: „Не грижи се, МКЦ не е загубар!“.
„МКЦ и покрај пандемијата, кога сериозно беа намалени приходите од влезници и производи, и кога сериозно беа намалени дотациите за режиските трошоци, успеа со максимум од своите можности да ја даде својата поддршка на целата независна сцена – и на крај повторно да ги плати сите свои сметки и да забележи позитивно финансико работење. Па така, во следната јубилејна година да пренесе сопствени средства во висина од 4.000.000 денари, и уште толку сè уште ненаплатени побарувања. За оние кои раководат културни институции јасно им е дека ова е сума за почит, на што сме посебно горди. Ја користам оваа шанси да им се заблагодарам на сите мои колеги кои и по сите притисоци успеаја да останат најголеми професионалци. Другари фала ви на довербата и поддршката!“, додаде Арсов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЛДП со осуда за скандалозната објава на Касами: „Македонија е мултиетничка држава“

Либерално-Демократската партија најостро ја осудува скандалозната објава на лидерот на БЕСА и градоначалник на Тетово, Билал Касами, во која на социјалната мрежа Фејсбук напиша „Добредојдовте во албанскиот главен град во Северна Македонија!“.
Од партијата велат дека во недостаток на идеи и проекти дел од опозициските партии продолжуваат да играат на картата на национализмот и да се обидуваат да ги влошат меѓуетничките односи и да ги разнишаат европските вредности.
Либерално-Демократска партија упатува порака дека Македонија е мултиетничка држава и Тетово е и ќе биде мултикултурен град, а не главен град на Албанците.
„Како либерал-демократи секогаш приоритет ќе ни биде почитување и обезбедување еднакви права и можности за сите граѓани на Македонија“, велат од партијата.
Според нив, симптоматично е што оваа објава доаѓа само неколку недели по барањето за формирање Заедница на албански општини, по теркот на она што се договара за Косово, барање кое дојде од Алтернатива, уште една опозициска партија од албанскиот политички блок.
Македонија
Kасами: Тетово е главниот град на Албанците во Северна Македонија

Добредојдовте во главниот град на Албанците во Северна Македонија, напиша на „Фејсбук“ градоначалникот на Тетово oд партијата БЕСА, Билал Касами.
Неговата објава предизвика бројни реакции кај корисниците на социјалните мрежи.
„Немој да бараш втор мандат“, „Дали вие сте градоначалник на Тирана?“, се само дел од коментарите.
До овој момент, ниту еден функционер не се огласи со реакција за скандалозната објава.
Македонија
Германската шефица на диплoматијата ќе допатува во посета на Македонија

Министерката за надворешни работи на Германија, Аналена Бербок, ќе оствари официјална посета на Македонија утре, на покана на министерот за надворешни работи, Бујар Османи.
Разговорите меѓу двајцата министри ќе се сосредоточат на пристапниот процес на државата во ЕУ, меѓудругото и на претстојните уставни измени, како наша преземена обврска за продолжување на процесот на преговори со Унијата. Како теми на разговорите ќе се најдат и билатералните односи меѓу двете земји со акцент на богатата економска соработка, нашето претседавање со ОБСЕ и соработката во рамките на НАТО алијансата во светло на разнишаната европска безбедносна архитектура.
Во рамки на својата прва посета на земјава, министерката Бербок, покрај средбата со нејзиниот хомолог, министерот за надворешни работи Бујар Османи, ќе биде примена од претседателот Стево Пендаровски, претседателот на Собранието Талат Џафери, претседателот на Владата Димитар Ковачевски и заменик претседателот на Владата задолжен за европски прашања Бојан Маричиќ, а ќе оствари средби и со парламентарната Комисија за надворешна политика, како и со претставници на опозициските партии.
Посетата на германската министерка Баербок се толкува како јасен сигнал на Сојузна Република Германија за интересот на германската надворешна политика во насока на целокупна поддршка на нашата земја и нашиот евроинтегративен процес, особено во годината во која прославуваме значаен јубилеј – 30 години од воспоставувањето на дипломатските односи со пријателска Германија.