Горди сме дека како власт овозможивме услови независниот правосуден систем да работи и да го врати владеењето на правото, изјави премиерот и претседател на СДСМ, Зоран Заев, во изјава за новинарите по завршувањето на седницата на Централниот одбор на владејачката партија.

„Веруваме во презумпцијата на невиност и веруваме во исправноста на независност со силата на аргументите да се докажуваат постапките за можен криминал на секој кој евентуално се огрешил пред законот. Верувам дека тоа се исправни чекори. Вакви случаи се мачнина и тешкотија за сите во општеството, но истовремено се предизвик“, рече Заев алудирајќи на притворот за Катица Јанева и случајот „Рекет“.

Тој изрази увереност дека Северна Македонија и граѓаните ќе излезат како победници и порача дека секој што се огрешил пред законот треба да одговара.

Кривичен совет од тројца судии ѝ ја одбил жалбата на специјалната јавна обвинителка Катица Јанева за определениот 30-дневен притвор, потврдија од скопскиот Кривичен суд. Тоа значи дека Јанева останува во истражниот затвор „Скопје“ во Шуто Оризари.

Доцна синоќа судијата Седат Реџепагиќ ѝ определи притвор на шефицата во оставка на СЈО, по барање на Обвинителството за гонење организиран крииминал и корупција.

Јанева е третоосомничена во истрагата „Рекет“. Таа, според обвинителството, му овозможила на осомничениот Орце Камчев поповолна позиција во истрагата на обвинителката Лиле Стефанова за предметот „Империја“, при неизменети околности и предложила да излезе од притвор.

Освен тоа, во план било Камчев да добие статус на заштитен сведок или да му биде понудена спогодба.

Јанева вчера беше уапсена во нејзината куќа во скопско Козле и однесена првин во СЈО, па потоа и во Кривичниот суд. Утрово беше донесена на погребот на нејзината мајка во родната Гевгелија.

Шефицата на СЈО е осомничена за злоупотреба на службената положба и овластување. Доколку биде поднесено обвинение и биде осудена, ѝ се заканува казна затвор од најмалку три години.

Министерот за надворешни работи, Никола Димитров, денеска го прими на проштална средба амбасадорот на Кралството Шведска во Република Северна Македонија, Матс Стафансон, пред завршување на неговиот мандат и заминување од земјава.

Министерот Димитров се заблагодари за исклучителниот придонес на амбасадорот Стафансон во развивањето на македонско-шведското пријателство за што му врачи и благодарница за неговиот плоден ангажман и искрена, отворена и конструктивна поддршка кон демократската трансформација и европските аспирации на нашата земја.

„Вашата мудрост, добронамерни и пријателски совети, како и професионалниот пристап во работата, оставија силен печат во нашето општество, а воедно и меѓу дипломатскиот кор како доајен. Особено ми претставува задоволство што, меѓу другото, за време на Вашиот мандат беше интензивирана и размената на посети на високо ниво, а притоа беше усвоена и декларација за соработка меѓу нашите две земји во 2017 година. Кралството Шведска продолжува да служи како наш модел и инспирација при преземање на реформските чекори во духот на европските вредности, а притоа уверен сум дека и Вашиот наследник ќе продолжи со иста динамика да го негува позитивниот тренд на билатерални односи“, рече Димитров.