Македонија
(Видео) Достовски ја користел марихуаната за лечење а не за продажба, порача неговиот адвокат

Во Основниот суд Скопје 1 – Скопје денеска се одржа првото рочиште од случајот во кој активистот од „Зелена алтернатива“ Филип Достовски е обвинет за одгледување и продажба на канабис. Во воведните зборови, адвокатот на Достовски, Сашо Дукоски истакна дека пронајдениот канабис во домот на обвинетиот не е за препродажба туку за лечење на ракот, со кој Достовски се бори веќе 15 години.
„Ова обвинение не може да опстои затоа што марихуаната која е пронајдена во домот на Достовски има многу мал процент на ТХЦ односно тетрахидра канабинол. Марихуаната се состои од во најголем дел од ЦБД што не претставува екстракт од опојна дрога и обвинетиот ја користи за лечење.“, рече Дукоски.
Бранителот на Достовски исто така побара вештачење од фармацевтскиот универзитет кое ќе биде дел од доказите и со што би се увидело дека во марихуаната на Достовски има само ЦБД, лековитата состојка од канабисот.
-Она што е пронајдено во домот на Достовски не е дрога, тоа е див коноп кој се користи за изработка на јажиња, Филип не е дилер, и нема никаков обид за препорадавање на марихуаната, рече Дукоски.
Што се однесува до семките од канабис кои се пронајдени во домот на Филип Достовски, одбраната рече дека таа се користи како храна за птици и од нив не може да се произведе опојна дрога.
Обвинетиот Достовски пред судијката рече дека не се чувствува нималку виновен бидејќи не станува збор за никакво препродавање на опојна дрога, туку за канабис кој го чувал за да ја третира својата болест.
На 28.07.2016 година при претрес во домот на Филип Достовски од страна на МВР пронајдено е 8 милилитри масло од хашиш, 238,4 грама марихуана и 54 грама семки од канабис по што Обвинителството го товари за нелегално производство и пуштање во промет психотропни супстанции.
Следното рочиште не кое ќе бидат изнесени доказите ќе се одржи на 9-ти септември.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.