Македонија
Едукативна тура низ отоманското наследство на Скопје
Центарот за научни истражувања „ХАЕМУС“ од Скопје ја истражува Македонија во рамки на кампањата „Дестинација Македонија“! Дел од активностите се: едукативна тура низ „Отоманското наследство на Скопје“ која ќе се одржи на 14 октомври, едукативна тура низ „Палатите на старо Скопје“ на 21 октомври и едукативната тура „По стапките на древните Римјани“ закажана на 28 октомври.
Сите тури се осмислени со цел учесниците да поминат низ искуство, знаење, интеракција и секако многу забава додека го запознаваат културното наследство на Република Македонија.
,,Турите кои ги организира „ХАЕМУС“ се необични и ретко може да се најдат на пазарот, бидејќи се создадени на тој начин додека трае прошетката да бидат во активна интеракција со учесниците. Посетителите се едуцираат, но и споделуваат знаење и информации за локациите кои се посетуваат, покрај кои поминуваат катадневно, а сепак многу малку знаат за нивното пошироко антрополошко значење”, изјави Василка Димитровска, директор на „ХАЕМУС“.
Целта на eдукативните тури на „ХАЕМУС“ е промоција и популаризација на богатото културно-историско наследство на Република Македонија од различни периоди.
Настаните се организираат под мотото на УНЕСКО за Отворени Едукативни Ресурси (ОЕР), а во рамките на Европската година на културното наследство. Дел од турите се поддржани со логистика од град Скопје, а за сите учесници се обезбедени обемни печатени водичи во издание на Агенцијата за промоција и поддршка на туризмот на Република Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Општина Центар продолжува со бесплатниот транспорт за лицата со попреченост
Општина Центар и Црвениот крст потпишаа договор за продолжување на соработката за користење на услугата за бесплатен транспорт до здравствените установи.
Градоначалникот на Општина Центар, Горан Герасимовски, истакна дека станува збор за проект кој се покажа како значаен и корисен, и ги повика граѓаните кои имаат потреба од ваква услуга активно да ја користат.
„Со овој проект им го олеснуваме животот на лицата со попреченост. За реализација на услугата, Општина Центар издвои 500.000 денари од сопствениот буџет, со цел да им го олесни пристапот до болниците и лекарите на граѓаните на кои тоа им е најпотребно“, посочи Герасимовски по средбата со претставниците на Црвениот крст.
Услугата подразбира бесплатен превоз до здравствените установи со наменски возила на Црвениот крст за лица над 18 години кои користат ортопедско помагало (инвалидска количка, дубак или одалка) и живеат на територијата на Општина Центар, како и лица над 18 години кои не користат ортопедско помагало, но поради болест се во лежечка, односно неподвижна состојба.
Транспортот треба да се закаже минимум 24 часа однапред (од понеделник до петок) со телефонски повик на бројот на Црвениот крст. Со остварување на еден телефонски повик може да се закаже превоз за еден корисник до една конкретна дестинација. Термините се закажуваат по принципот „прв дојден – прв услужен“, од понеделник до петок, од 08:00 до 16:00 часот.
Корисниците имаат право на бесплатен превоз во еден правец максимум 10 пати во текот на една година, но доколку имаат потреба од повеќе, истиот може да го платат согласно ценовникот на Црвениот крст на Република Северна Македонија.
Македонија
Мицкоски за туризмот: Очекуваме пет милиони преноќувања до 2028, ако сè оди по планот
Премиерот Христијан Мицкоски очекува Македонија да ја достигне бројката од пет милиони туристички преноќувања до 2028 или 2029 година, доколку сè се одвива според планот.
„Па ако биде сѐ како што треба, не би се изненадил тоа да биде 2028–2029“, изјави Мицкоски, коментирајќи ги очекувањата за растот на туризмот во земјава.
Одговарајќи на новинарско прашање за движењата во туризмот, економскиот придонес на секторот, бројките од 2025 година и очекувањата од 2026 година, Мицкоски рече:
„Туризмот е еден од нашите приоритети. Минатата 2025 година, според бројките коишто ги објави Државниот завод за статистика имаме зголемен број на туристи, некаде над 6 отсто. Но, она коешто посебно охрабрува е што е зголемен бројот на странски туристи над 10%, таа е двоцифрена бројка. Се ближиме на бројката од три и пол милиона преноќувања, што исто така претставува многу значаен податок. Оваа година повторно имаме организирани групи, повторно како Влада сме проактивни и работиме. И јас очекувам повторно двоцифрен број на раст кај странските туристи и генерално очекувам 2026 да имаме раст на бројот на туристи во Македонија. Работиме паралелно и во поддршка на изградба и надградба и реновирање на постоечките туристички сместувачки капацитети и угостителски капацитети. Целата наша е да дојдеме до, ако е возможно тоа, до пет милиона преноќувања во Македонија, нешто коешто ќе претставува историски рекорд. Е сега работиме во таа насока. Оваа година, чекор по чекор да дојдеме до три и пол милиона, па потоа и понатаму.“
Македонија
Државниот архив со неповолна ревизија: Неевидентирани објекти, слабости во пописот и пресметката на платите
Државниот завод за ревизија изврши ревизија на финансиските извештаи заедно со ревизија на усогласеност со законската регулатива, упатствата и воспоставените политики на Државниот архив за 2024 година.
Врз основа на извршената ревизија, Заводот изрази неповолно мислење и за реалноста и објективноста на финансиските извештаи и за усогласеноста со релевантните прописи.
Во 2016 година, Архивот добил исто така неповолно мислење за финансиските извештаи и мислење со резерва за усогласеноста со закони. Во 2018 година, Заводот извршил преглед на спроведувањето на препораките од тогашната ревизија – од девет дадени препораки, две биле спроведени, четири делумно, а три биле сѐ уште во тек.
Со извршената ревизија на финансиските извештаи заедно со ревизија на усогласеност за 2024 година, утврдиени се следниве состојби:
– слабости во начинот на спроведување на пописот на средствата и обврските и неизвршено усогласување на сметководствената со фактичката состојба утврдена со пописот;
– за дел од објектите сопственост на Државниот архив не постојат докази дали истите се евидентирани во деловните книги и не се преземени активности за осигурување на постојаните средства;
– не се врши ажурно и хронолошко евидентирање на движењето на залихите на публикуваните изданија;
– неисполнување на основните услови кои треба ги поседуваат депоата на Државниот архив со цел да се заштити архивскиот материјал, како и условите за заштита од неовластен пристап до архивскиот и документарен материјал;
– слабости при пресметката на платите;
– не е воспоставено вршење на внатрешната ревизија, што укажува на не воспоставен механизам кој ќе обезбеди подобрување на работните процеси и зајакнување на внатрешните контроли и
– слабости во спроведувањето и реализацијата на постапките за јавни набавки.
За надминување на утврдените состојби дадени се препораки со цел преземање на мерки и активности од надлежните лица и органи во функција на подобрување на состојбите. Во делот на нагласување на прашања обелоденети се следните состојби:
– во актот за систематизација на работните места не се предвидени сите нивоа на работни места на административни службеници;
– слабости во начинот на пополнување на испразнетите работни места со договори на определено време;
– ново доделениот објект не е во согласност со стандардите за архивско работење, што влијае на основната дејност на Државниот архив
– чување на архивскиот материјал кој претставува културно историско наследство од посебен национален интерес за државата и
– судските постапки во кои Државниот архив е тужена страна што може да има финансиски импликации во иднина.
Во делот на останати прашања ревизорите известуваат за изменување и дополнување на законската регулатива во насока на уредување на начинот на избор на заменик директор на Државниот архив, условите кои треба да ги исполнува како и утврдување на неговите надлежности. Во текот на ревизијата од страна на Државниот архив на Република Северна Македонија извршени се сметководствени корекции по дадените препораки од Државниот завод за ревизија кои предизвикуваат промени во финансиските извештаи. Од страна на одговорните лица на Државниот архив на Република Северна Македонија за периодот предмет на ревизија доставена е забелешка на Нацрт извештајот на овластениот државен ревизор, истата е разгледана и не е прифатена од причина што не се доставени нови докази за промена на утврдениата состојба.

