Во рамките на официјалната посета на Словенија, претседателот на Владата, Зоран Заев, придружуван од заменик-претседателот на Владата задолжен за економски прашања, Кочо Анѓушев, и министерката без ресор задолжена за странски инвестиции, Зорица Апостолска, оствари средби со претседателот на Словенија, Борут Пахор, и со претседателот на Државниот збор на Словенија, Дејан Жидан.

На заедничката средба премиерот Заев и претседателот Пахор ги потврдија одличните билатерални односи меѓу двете земји и традиционалното пријателство и разменија мислења за идните можности за развивање на односите, особено за интензивирање на економската соработка и на планот на заедничките активности во НАТО и во процесот на интеграцијата на нашата земја во ЕУ. Заев изрази голема благодарност до претседателот Пахор за големата и безрезервна поддршка што Словенија и ја дава на Северна Македонија во процесот за нашето пристапување во НАТО и ЕУ.

На средбата со претседателот на Државниот збор на Словенија, премиерот Заев и претседателот Жидан ги нагласија исклучително добрата парламентарна соработка и можностите за продлабочување на економската соработка меѓу двете земји, а се зборуваше и за поддршка и размена на искуства од Словенија во процесот на почнување на преговорите на нашата земја со Европската Унија.

Во оваа пригода претседателот на Владата, Зоран Заев, му се заблагодари на претседателот на Државниот збор, Дејан Жидан, за ратификацијата на протоколот за пристапување на нашата земја во НАТО и информира дека веќе 13 земји членки на НАТО го ратификуваа документот, со што се отвора шанса Северна Македонија до крајот на годината да го добие статусот полноправна членка на алијансата.

На средбите беа упатени честитки за степенот на реализацијата на реформските процеси во нашата земја и беше нагласена огромната поддршка од Република Словенија за добивање датум за почнување преговори за членство на Република Северна Македонија во ЕУ.