Македонија
„Екогерила“: „Југохром“ ќе се рестартира без филтри, ни се закануваат да молчиме

Движењето „Екогерила“ тврди дека во текот на изминативе денови различни поединци им испраќале заканувачки пораки и финансиски понуди на неговите членовите со цел, како што велат, да ги замолчат и да не реагираат за „Југохром“.
Од таму велат дека за ова ја известиле полицијата и за денеска побарале средба со премиерот Зоран Заев. Исто така, од „Екогерила“ велат дека информацијата ќе ја споделат и со амбасадите и организациите кои ги поддржале во нивната мисија за почиста животна средина, како и институциите на Европската Унија во Брисел.
„Сакаме да се потсетиме дека имавме уште поголеми предизвици со претходната влада, и не се повлековме, а камоли сега. Каузата на ‘Екогерила’ никогаш не зависела од неколку поединци, туку од волјата и големата поддршка на граѓаните. Валканите игри со мафијашки тенденции не само што нема да нè спречат туку напротив, само нè мотивираат да не се откажуваме од нашата мисија. Граѓанската реакција ќе биде многу остра за секоја уцена од ‘Југохром’ или од одредени кругови во Владата“, велат од таму.
Од движењето велат дека со оглед на фактот дека во 2013 година од страна на Светската здравствена организација Тетово беше рангиран како најзагадениот град во Европа, не смее да се толерира ниту една можна манипулација и поставување на филтрите без ригорозен надзор од независни меѓународни експерти, кој ќе утврди дали проектот и системот за филтрирање ги исполнува соодветните стандарди и го спречува ослободувањето на штетните гасови.
„Без веродостојна меѓународна гаранција нема да се прифати никаква манипулација од страна на сопствениците, без разлика дали е и во соработка со вицепремиерот Анѓушев. Затоа сметаме дека е тенденциозно и опасно неговото инсистирање на реотворањето на ‘Југохром’ паралелно со воспоставувањето филтри, а не по завршувањето на нивното распоредување и како што е предвидено со законот“, велат активистите.
Од таму потсетуваат дека официјалните мерења на Министерството за животна средина покажале дека оваа фабрика предизвикува 60% од вкупното загадување во Тетово и околината. „Југохром треба да го плати скапо труењето на тетовчаните бидејќи бројот на болни деца беше двојно повисок додека работеше оваа фабрика. Во 2015 година, кога работел ‘Југохром’, овој број изнесувал 31.446 случаеви, додека во 2017 година кога не работел овој број се намалил на 18 578 случаеви. Со оваа предизвикана штета од страна на ‘Југохром’, пред да ги постави филтрите, бараме од сопствениците да платат милионски отштети и да имаат законска одговорност за загрозување на животот и здравјето на луѓето во градот Тетово и околината. Мотивирани од случајот на Битола, каде што беа поднесени обвиненија против раководните лица за огромно загадување, ние ќе бараме компензација за предизвиканите болести и смртни случаи, кривично дело, казниво со 4 до 10 години затвор“, велат од движењето.
Во исто време, велат од таму, вицепремиерот Анѓушев треба да знае дека здравјето и почитувањето на законот е повеќе вредно за граѓаните отколку цената на феролегурите на берзата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од Охрид почна промоцијата на порталот на кој ќе има 200 електронски услуги за граѓаните

Министерството за дигитална трансформација денеска од Охрид ја почна кампањата за промоција на Националниот портал uslugi.gov.mk, преку кој граѓаните можат да добијат повеќе од 200 електронски услуги.
Стартот на кампањата го означи ресорниот министер Стефан Андоновски, кој најави дека промоцијата на порталот ќе продолжи во сите градови низ државата, на плоштадите во парковите, но и на универзитети, училишта, работни места…
– Очекувам интересот значително да порасне. Секоја услуга која граѓаните можат да ја искористат на порталот е скратено време, скратени трошоци и скратено чекање во редови, како и зголемена ефикасност на институциите. Се надевам ова ќе наиде на добар одѕив кај граѓаните, рече Андоновски.
Тој посочи дека Националниот портал uslugi.gov.mk, нуди повеќе од 200 електронски услуги за граѓаните и вкупно 300 електронски услуги заедно со други портали.
Прашан за најновиот ревизорски извештај, кој покажува недостиг на ИТ програмери во институциите, министерот Андоновски подвлече дека ревизорските извештаи се патоказот кој им кажува каде треба да се движат.
– Недоволната популаризација на порталот и неорганизирањето промотивни кампањи беше една од забелешките минатата година и затоа со добра организација успеавме да го реализираме тоа годинава. Остануваат недостатоци во однос на кадарот, предизвици со бројот на вработени, но со бројка од 15-тина нови вработени во Министерството, мислам дека уште повеќе ја зголемивме динамиката на дигитализција на услуги. Наредниот период ќе промовираме и нови. Со овој пакет на активности, следејќи ги новите трендови ќе имаме успешна реализација и дигитализацијата ќе фати по драматичен чекор, изјави Андоновски.
Појасни дека според систематизацијата, во Министерството за дигитална трансформација предвидени се околу 250 вработувања, а во моментот бројката достигнува до 180.
– Во моментот бројката на вработени се движи окоу 170, со времени вработувања доаѓа до 180. Исполнувањето на таа квота од 250 би значело целосна активност и полна динамика на Министерството, но и со овие ресурси постигнуваме значителни резултати, споредено со тоа што се случуваше во минатото. При моето доаѓање во Министерството имавме околу 120.000 корисници на порталот, денеска имаме околу 190.000. Тоа е сериозна бројка. Ако до 2024 година сме имале 1.000 трансакции месечно, сега имаме 9.100 последниот месец, додаде Андоновски.
Македонија
Утре почнува учебната година, во клупите ќе седнат 177.800 основци и 67.200 средношколци

Новата учебна 2025-2026 година утре ќе ја започнат 245 илјади ученици, односно 177.800 основци и 67.200 средношколци. Настава ќе има до 10 јуни, а исклучок ќе бидат матурантите за кои редовните часови ќе траат до 15 мај. Обезбедени се учебници за сите ученици, а за првпат по седум години ќе има и учебници по странските јазици.
Ова денеска на прес-конференција го истакна министерката за образование и наука Весна Јаневска и информираше дека во повеќе училишта условите за настава се подобрени, а инклузијата е подигната со ангажирање на зголемен број образовни асистенти во основното и за првпат во средното образование. Учениците ќе се запознаваат со придобивките од вештачката интелигенција и ќе учат етички да ја користат за образовни цели.
„Втора учебна година по ред започнува со учебници за сите ученици. Целосно нови учебници има за седмо одделение во основното образование и за прва година во гимназиите, поради примената на нови наставни програми и најавувам дека овој процес на обнова на наставните содржини ќе има континуитет. За првпат после седум години, учениците ќе добијат и учебници по странски јазици – англиски, француски, германски и италијански јазик“, истакна Јаневска, нагласувајќи дека сите се испечатени и над 90 проценти од тиражот е веќе испорачан.
Министерката информираше дека системски е решен предизвикот со учебниците кој се провлекуваше со години и дека повеќе нема предмети во основното образование без учебници, нема користење на учебници без склучени договори и регулирани авторски права и нема доцнење на испораката со месеци.
Направени се и крупни инвестиции за подобрување на образовната инфраструктура. Во период од една година отпочнат е инвестициски циклус од 67 милиони евра. Дел од градежните проекти се завршени, а дел во фаза на реализација.
Јаневска рече дека започнува примената на нов електронски дневник кој има значително подобри перформанси од претходниот и наставниците ќе можат да се најават и пополнуваат податоци во секој момент.
„Вештачката интелигенција влегува во наставата. Со задоволство споделувам дека е изготвен сеопфатен прирачник за едукација и на наставници и на ученици, со јасни инструкции за етичка и ефикасна примена на новите технолошки алатки за образовни цели“, нагласи министерката.
Освен 1.346 образовни асистенти во основните училишта, Јаневска информираше дека за првпат, образовна асистенција ќе добијат и средношколците со посебни образовни потреби, а нив ќе им помагаат 130 образовни асистенти.
„За првпат е воведено и формално образование за децата на долготрајно болничко лекување и тие повеќе нема да губат настава. Зависно од нивната состојба ќе можат да се вклучуваат онлајн во својот клас или пак, наставникот индивидуално ќе работи со нив“, истакна Јаневска.
Министерката очекува наставниците мотивирани да ја започнат новата учебна година, во која, како што рече, ќе имаат и ново зголемување на платите, онака како што се договоривме пред една година, од 7,5 до 10 проценти во зависност од степенот на инфлацијата, за да има реален раст без манипулации.
Во новата учебна година, обезбедена е поголема поддршка за талентираните ученици, односно целосно покривање на трошоците за учество на меѓународни научни олимпијади, а за сите ученици е овозможено професионално, односно кариерно насочување.
Македонија
Стојановски: Владата за една година изгради и пушти во употреба 71,2 километри експресен пат и автопат

Владата на ВМРО-ДПМНЕ за една година изгради и пушти во употреба 71.2 километри експресен пат и автопат, изјави денеска на прес-конференција пратеникот на ВМРО-ДПМНЕ, Бојан Стојановски.
Тој истакна дека Владата го завршила и пуштила во употреба експресниот пат Градско – Дреново, при што завршила две делници од 25,7 километри експресен пат, во крајно брз рок.
Додаде дека се завршени и пуштени во употреба се 25,5 километри од експресниот пат Куманово – Крива Паланка.
-Пред нецели два месеци пуштени се во употреба 20 километри од автопатот Кичево – Охрид, и дополнително се очекува наскоро да биде пуштена уште една делница, а до крајот на 2026 година ќе биде пуштен во употреба целиот пат. Засилено се гради низ цела Македонија, истакна Стојановски.
Тој додаде дека автопатот Тетово – Гостивар исто така треба да биде готов за две и пол години.
-Засилено се работи и на автопатот Прилеп-Битола кој се очекува да биде завршен и пуштен во употреба 2027 година. Во наредните три до четири години цела држава ќе биде испреплетена со автопатска мрежа и мрежа од експресни патишта. Македонија се трансформира. Промените на дело, истакна Стојановски.