Времето денеска ќе биде сончево со мала до умерена облачност. Ќе дува слаб до умерен ветер од јужен правец. Максималната температура ќе биде во интервал од 12 до 19 степени.

Во Скопје ќе биде сончево со мала до умерена облачност и со слаб до умерен јужен ветер. Максималната температура ќе достигне 15 степени.

Лидерот на ВМРО-ДПМНЕ, Христијан Мицкоски, повика на протест во 18 часот, кој ќе почне пред Обвинителството, а ќе заврши пред Врховниот суд.

„Ги повикувам сите граѓани, од сите националности и убедувања да ни се приклучат. Протест на кој ќе порачаме дека одговорност мора да има за неправдите, но и порака за чуварите на неправдите, обвинителството и судството, дека ова е борба во која Македонците се борат за своите правдини, мора да се спротивстават на неправдите“, рече Мицкоски, кој рече дека нема информации за нов материјал доставен од укажувач.

Протестот доаѓа откако вчера на прес-конференција пратеникот од опозицијата, Антонио Милошоски, објавуваше аудиоматеријал со глас за кој рече дека е на лидерот на СДСМ и експремиер Зоран Заев.

Минатата недела владејачкиот СДСМ маршираше од Собранието до кривичниот суд, при што порачаа на судиите дека се „ослободени и дека треба да работат независно со донесениот Закон за Јавно обвинителство“.

Лицето кое синоќа беше примено на Инфективната клиника во Скопје е тестирано и нема коронавирус, потврдија од Министерството за здравство. Пациентот имал лесна клиничка слика, нема покачена телесна температура и неговата состојба е стабилна.

Тој пристигнал од Милано во Скопје со попладневниот лет на „Визер“. Патникот поминал низ термалната камера, која кај него не дијагностицирала симптоматологија на болест. Првите симптоми ги почувствувал по доаѓањето дома, по што се јавил на Инфективната клиника во Скопје и бил примен во 22 часот. Од неговото пристигнување на клиниката, пациентот е ставен во изолација, по што му се направени тестови согласно со утврдениот протокол.

Од министерството велат дека будно ја следат состојбата и во континуитет се постапува по препораките на Светската здравствена организација, а од вчера се применуваат и нови зајакнати мерки за превенција од коронавирус.

„Го подигнавме степенот на подготвеност на највисоко ниво. Се формира Кризен штаб во рамките на Министерството, а на сила стапија и нови зајакнати мерки за превенција од и справување со евентуални заболени од коронавирус“, соопштија надлежните.

Министерот за здравство, Венко Филипче, вчера апелираше до граѓаните доколку немаат потреба да ги одложат патувањата во регионот на Северна Италија. На аеродромот во Скопје мерките се прошируваат, не само за патниците кои доаѓаат од Кина, преку конекциите од Истанбул и Дубаи, туку практично за сите патници, со тоа што сега ќе бидат скринирани на местото каде што се влегува во делот за царина.