Вкупната бројка на пациенти позитивни и суспектни на коронавирусот што се лекуваат на инфективните одделенија во главниот град и во болниците во земјава е 96 и има околу 460 празни болнички кревети во ковид-центрите, информираат од Министерството за здравство.

Оттаму потсетуваат дека поради намалениот број болни, болниците затворија дел од капацитетите наменети за ковид-пациенти.

Во изминатите 24 часа во ковид-центрите во болниците во земјата е пријавено дека се лекуваат вкупно 66 пациенти позитивни и суспектни на коронавирусот. Во Скопје е хоспитализиран еден нов пациент, а се лекуваат 30 лица сомнителни и потврдени на Ковид-19.

„Во болницата во Битола хоспитализирани се 3 пациенти позитивни и суспектни на Ковид 19. Во болницата во Штип хоспитализирани се 6 пациенти. На инфективното одделение во Тетово има 2 пациенти, во Велес се лекуваат 2 болни, а во Куманово 15 пациенти позитивни и суспектни на Ковид 19. Во ковид-центарот во Охрид хоспитализирани се 8 пациенти, во Прилеп – 5, во ковид-центарот во Гостивар – 8, а во Струга – 3 болни. Во болницата во Струмица хоспитализирани се 13 пациенти, во Кичево – 1 и во Кавадарци и во Гевгелија нема хоспитализирани лица позитивни и суспектни на коронавирусот“, се наведува во извештајот.

Сите одделенија на клиничките болници располагаат со болнички места до кои има довод на кислород.

Министерството за здравство има увид во состојбата со капацитети и доколку има потреба, одделенијата ќе бидат дополнително проширени.

На седница што ќе почне денеска во 13 часот, според соопштение од владините служби, на дневен ред пред министрите за разгледување ќе се најде и записникот од четириесет и првиот состанок на Главниот координативен кризен штаб за обезбедување целосна координација во врска со спречување внесување и ширење на коронавирусот, одржан на 14.6.2021 година, во кој се вклучени најновите предлози на Комисијата за заразни болести.

Во препораките на Комисијата беше напоменато од утре да има целосно укинување на полицискиот час и на ограничувањето од максимум 100 гости на свадби и прослави, како и дозвола за организација на настани, концерти и забави во клубовите и локалите само на отворено, со капацитет до максимум 50 отсто од објектот и не повеќе од 1.000 лица, ова беа препораките што ги донесе Комисијата за заразни болести и ги прифати Главниот координативен кризен штаб против Ковид-19, а се очекува денеска на својата седница да ги усвои Владата.

Покрај седница за носење на најновите препораки од Комисијата за заразни болести, Владата, денеска, со почеток во 11 часот, ќе ја одржи и редовната 78. тематска седница, на која ќе се разгледуваат повеќе информации за склучување договори за инфраструктурни проекти од ТАВ-програмата со 23 општини.

Според предложениот дневен ред, пред министрите за разгледување ќе се најде и информацијата за усвојување текст на меморандум за разбирање помеѓу Владата на Република Северна Македонија и Командата на врховниот сојузнички командант за трансформација и Врховната команда на сојузничките сили на Европа, во врска со обезбедувањето поддршка од земја домаќин за спроведување НАТО-операции, вежби и слични воени активности.

За заклучоците и одлуките од денешните владини седници јавноста ќе биде информирана со соопштение.

Времето денеска ќе биде сончево со мала до умерена облачност. Ќе дува умерен до засилен северен ветер, најизразен по должината на Повардарието. Минималната температура ќе биде во интервал од 6 до 15, а максималната ќе достигне од 18 до 26 степени. УВ = 6

Во Скопје променливо облачно со сончеви периоди и со умерен до засилен северен ветер. Минималната температура ќе се спушти до 8, а максималната ќе достигне до 24 степени.

До утре наутро ќе биде посвежо, а преку денот ќе биде променливо облачно и особено по должината на Повардарието ќе се засилува северен ветер. Од четврток температурите ќе бидат значително повисоки и ќе има услови за појава на нестабилност во попладневните часови.