Претседателот и врховен командант на вооружените сили, Стево Пендаровски и претседателот на Република Словенија, Борут Пахор денеска во Охрид го посетија Кампот за обука на вода на Армијата на Република Северна Македонија.

Претседателите Пендаровски и Пахор, заедно со началникот на генералштабот на армијата, генерал-потполковник Васко Ѓурчиновски се запознаа со дел од обуката која ја изведуваат припадниците на баталјонот за специјални сили, како и со можностите и начинот на работа коишто ги нудат овие капацитети на Армијата во состав на Командата за обука и доктрини.

Припадниците од Баталјонот за специјални сили пред претседателите Пендаровски и Пахор, преку методско-показни вежби прикажаа постапки кои се применуваат за ситуација на заложничка криза на пловен објект. Во вежбата беа вклучени и хеликоптери од воздухопловниот ВИНГ на Армијата при што се демонстрираше висок степен на обученост и извежбаност за извршување на сложени задачи на вода согласно НАТО стандардите кои се применуваат во вакви ситуации.

Пред вежбата, словенечкиот претседател Пахор беше запознаен со мисијата и задачите на Армијата на Република Северна Македонија, а припадниците на баталјонот за специјални сили пред присутните изведоа кратка показна вежба на која презентираа дел од боречките вештини.

Потенцирајќи го високото ниво на стручност на припадниците на Армијата на Република Северна Македонија за извршување на задачите коишто произлегуваат од нашето полноправно членство во НАТО, претседателот Пендаровски по завршување на вежбата истакна дека припадниците на Армијата се обучени и подготвени за реакција на сите предизвици во рамки на нивната мисија.

Претходно во Охрид, претседателите на Република Северна Македонија и на Република Словенија, Стево Пендаровски и Борут Пахор посетија дел од културните знаменитости. Домаќинот, претседателот Пендаровски го запозна својот словенечки колега Пахор со дел од историјатот на црквата Света Богородица Перивлепта, Галеријата со икони, како и со богатата историја на црквата Света Софија.

Со престојот и активностите во Охрид заврши дводневната, официјална посета на претседателот на Република Словенија, Борут Пахор на Република Северна Македонија.

Во организација на Швајцарската програма за зголемување на пазарната вработливост – ИМЕ и Ски центар Панорама – Крушево, на 25 и 26 септември беа одржани неколку активности за да се одбележи Светкиот ден на туризмот, кој традиционално се одбележува на 27 септември.

На 25 септември, новиот заменик-амбасадор на Швајцарија, Луциен Аегертер, го посети Крушево и оствари средба со градоначалникот на Крушево, Томе Христоски, директорот на Агенцијата за промоција и поддршка на туризмот, Љупчо Јаневски, и други локални партнери. Целта на овие средби беше да се разговара околу минатите и сегашни активности за развој на активниот туризам во Крушево кои се реализираат со швајцарска поддршка.

„Чест ни е што по повод Светкиот ден на туризмот го посетивме Крушево за да посведочиме за огромниот потенцијал што Крушево, но и цела Пелагонија, ја имаат за активен туризам. Швајцарија го поддржува развојот на активниот туризам во Крушево уште од 2014 година. Отворањето на Инфо-центарот за активен туризам, подобрена безбедност при параглајдинг и поддршка за фестивалот  When in X, се само дел од иницијативите кои имаат придонесено за зголемен број туристи преку целата година во Крушево, со што се придонесува и за зајакнување на локалната економија“, изјави Луциен Аегертер заменик-амбасадор на Швајцарија.

Во сабота, 26 септември, организаторите Ски центар Панорама и Швајцарската програма ИМЕ организираа средба со локални чинители од Крушево, како што се сместувачки капацитети, бајкинг заедницата во Македонија, претставници од тур операторите и други локални чинители. Целта на оваа средба беше дискусија за потенцијалите на Крушево да прерасне и да се промовира во вело туристичка дестинација.

Со ова беше најавена новата иницијатива што ќе се спроведува во Крушево со швајцарска поддршка. „Денеска, заедно со Ски центар Панорама, Општина Крушево, Агенција за развој и промоција на туризмот, бајкинг заедницата и останатите локални партнери, го одбележуваме почетокот на уште една инвестиција во Крушево. Во наредниот период, експерти од Швајцарија ќе обезбедат поддршка во трасирање висококвалитетни рути за планински велосипедизам и со тоа Крушево може да стане топ велосипедска дестинација. Се надеваме дека ова ќе придонесе за што поголем број професионални велосипедисти, но и туристи кои сакаат активен одмор да го истражуваат Крушево и околината на велосипед“, изјави Тања Георгиевска, претставник на Швајцарската програма ИМЕ.

„Создавање на вело патеките е од одгромна важност за дополнување на туристичката поддршка, и промоција на активниот туризам во Крушево“,изјави Јаким Митревски, преставник на Хотел Панорама.

„Нам како велосипедисти важно ни е обележување на се повеќе велосипедски патеки, и поголема и подбра интраструктура низ целата дестинација”, рече Здравко Ристевски, еден од организторите на фестивалот „Крушево низ корија“.

По седми пат, Делегацијата на Европската Унија во Република Северна Македонија и Здружението на преведувачи и толкувачи ЗПРМ ја доделија Наградата за најдобар млад преведувач „Вавилон“ по повод Европскиот ден на јазиците. Дејвид Гир, амбасадорот на Европската Унија и Огнена Никуљски, претседателката на Организациониот одбор на наградата „Вавилон“, ги доделија наградите на победниците на церемонијата што се одржа на 25 септември во Europe House.

Оваа година, првата награда му беше доделена на Сашо Данилов, за неговиот превод на делото „Телефонската говорница на другата страна од мостот“ од Аријане Грундис, од германски на македонски јазик и на Ардита Зулфиу за нејзиниот превод на делото „Место на чекање“ од Соња Хернандез, од шпански на албански јазик. Наградите за второ место беа доделени на Благица Димитрова, за преводот на „Господин Плата“ од Сали Руни, од англиски на македонски јазик, и на Кристина Стаменкова за нејзиниот превод на „Месечевата дама“ на Андреа де Карло, од италијански на македонски јазик.

Наградата „Вавилон“, иницирана од Делегацијата на Европската Унија во 2013 година, настојува да се промовираат младите преведувачи, како и да се поттикне извонредност во преводот на книжевни дела. Конкурсот е отворен за млади преведувачи до 26 годишна возраст, кои може да се пријават на конкурсот со превод на книжевни дела од некој од 24 службени јазици на Европската Унија на некој од јазиците што се зборуваат во земјата.