Претседателот на Владата, Зоран Заев, денеска во Брисел се сретна со претседателот на Европскиот совет, Шарл Мишел.

Двајцата соговорници на средбата се согласија дека иднината на Западен Балкан е во полноправното членство во ЕУ и дека за Северна Македонија и за Албанија треба да се спроведе едногласната одлука на земјите членки на Унијата од март минатата година за почеток на пристапните преговори за овие две земји.

Заев и Мишел изразиле надеж дека со поддршка на португалското претседателство, кое вложува силни заложби и голема политичка волја, ќе биде отворен патот што ќе овозможи Бугарија да се приклучи на консензусот за усвојување на преговарачката рамка и одржување на првата меѓувладина конференција, без натамошно одлагање.

На средбата беше истакнато дека за време на словенечкото претседателство во октомври оваа година, ќе се одржи самит ЕУ – Западен Балкан, кој се очекува да биде заедничка инвестиција за поинтензивна меѓусебната поврзаност и соработка на линија на клучните вредности и принципи на ЕУ за посуштинско вклучување на регионот во тековните значајни проекти на Унијата поврзани со климатската и дигиталната трансформација.

Поддршката и соработката на ЕУ со земјите од Западен Балкан во справувањето со пандемијата на Ковид-19 и социо-економското закрепнување, споделија Заев и Мишел, ќе продолжи со несмалена динамика, вклучително и во поглед на вакцинацијата, каде што ЕУ забрзано вложува во зголемување на производството и достапноста на вакцини.

Премиерот Заев и претседателот на Европскиот совет, Мишел, како добредојдена ја оценија заложбата за вклучување на земјите од регионот во дебатата во рамките на конференцијата за иднината на Европа како особено важна можност за да се чуе гласот на младите и граѓанското општество од Западен Балкан.