Премиерот Зоран Заев, денеска, заедно со министерот Венко Филипче, ја пречека новата пратка вакцини, која стигна како донација од Србија.

Како што претходно соопшти Владата, станува збор за 20.000 дози од руската вакцина „спутник В“, а по неа ќе следува уште една пратка од 20.000 дози.

Во оваа пригода Заев истакна дека и тој се пријавил за вакцинација, па, како што рече, кога ќе му дојде редот, ќе се вакцинира со онаа што во тој момент ќе биде на располагање.

„Се пријавив за вакцинација, па која вакцина ќе дојде на ред за мене, со таа ќе се вакцинирам. За мене, сите вакцини се во ред“, истакна премиерот.

Тој ги повика и граѓание да го сторат тоа.

„Вакцината е здрава, сите вакцини се здрави. Колку побргу заврши процесот на вакцинација, толку побргу ќе заврши оваа битка со пандемијата“, рече Заев.

Тој исто така ја увери јавноста дека ниту еден министер во Владата нема примено вакцина против Ковид-19.

„Најодговорно тврдам, ниту еден министер, вклучително и министерот за здравство, кој е здравствен работник, се нема вакцинирано. Го чекаме нашиот ред, според планот за имунизација на населението“, нагласи премиерот.

Инаку, денешната пратка е втората донација на вакцини што пристигнуваат од соседна Србија. Првата донација, која впрочем беше и првата пратка вакцини што пристигна во земјата, беа 8 илјади дози од американската вакцина на „Фајзер“, со коiа се вакцинираа здравствените работници.