Државниот завод за ревизија утврди серија нерегуларности во работењето на Општина Свети Николе за 2024 година, поради што изрази неповолно мислење за реалноста и објективноста на финансиските извештаи, како и за усогласеноста со законската регулатива и воспоставените политики.

Според ревизијата, општината со несоодветно постапување овозможила бесправно изградени објекти на земјоделско земјиште да вршат дејност. Од вкупно 110 барања за утврдување правен статус на бесправно изградени објекти, 79 не биле доставени до надлежното министерство за добивање согласност, а за дел од нив не бил извршен ни увид на самото место.

Ревизорите утврдуваат дека за објект на земјоделско земјиште со катастарска култура „нива“, за кој барање било поднесено уште во 2017 година, не е спроведен увид, ниту е побарана согласност од надлежното министерство. Иако објектот извршувал угостителска дејност, контролата на МВР и ДЗС во април 2025 година резултирала со решение за забрана за користење.

Дополнително, во 2024 година одобренија за поставување урбана опрема биле издадени само за три објекти, додека останатите угостителски објекти користеле јавна површина без одобрение и без уплатена комунална такса. Општината нема донесено годишна програма за поставување времени објекти, ниту издадени одобренија за нивно поставување.

Ревизијата нотира и дека општината не остварува приходи по основ на комунални такси за користење музика во јавни локали, реклами и огласи, а нема ни програма за туристичка пропаганда. Нема воспоставен Зелен катастар, нема стратегија и годишна програма за зеленило, ниту приходи по основ на надомест за одржување градско зеленило.

Во однос на работењето на објектот „Детско одморалиште во Стар Дојран“, ревизијата утврдува дека општината извршувала услуги за сместување без согласност од надлежните институции, дека сметките се издавале без спецификација од фискална каса, а сместувачките капацитети биле застарени и руинирани.

Изградената детска градинка „Рахилка Гонева“ во село Ерџелија, вредна 437.154 евра, не е пуштена во употреба бидејќи не се обезбедени средства за пристапен пат од 793.821 евро и не е инсталирана потребната опрема за третман на вода за пиење.

Општината исто така има ненаплатени побарувања од 1.070.520 евра, резултат на непреземени мерки за наплата и неутврдена старосна структура на побарувањата. Побарувањата за одржување јавна чистота меѓу општината и ЈКП „Комуналец“ не се усогласени за 8.650.000 денари, а комуналното претпријатие нема уплатено 27.419.000 денари во буџетот на општината.

Ревизорите нотираат дека дел од даночните обврзници со нов или дополнителен имот не се задолжени со данок на имот, а последното ажурирање на регистарот е направено во 2021 година.

Дополнително се утврдени слабости во евидентирањето на имотот, неевидентирано земјиште, несоодветно книжење на инвестициите по нивното завршување, непостоење материјална евиденција при прием и издавање материјали, како и слабости во спроведувањето на пописот на средствата и обврските.

Државниот завод за ревизија даде препораки за надминување на утврдените состојби и преземање мерки од страна на надлежните институции и одговорните лица.

Премиерот, Христијан Мицкоски, денес ја промовираше новата Платформа за следење на проектите финансирани од Владата, оценувајќи дека алатката претставува чекор напред во политичката култура, модерното управување и транспарентноста.

Мицкоски истакна дека платформата овозможува секој граѓанин, општина, новинар и претставник на граѓанскиот сектор во реално време да го следи текот на проектите што ги финансира Владата. Според него, со ова се воспоставува нова рамка на доверба во која јавноста има директен увид во потрошувачката на јавните средства.

Тој нагласи дека транспарентноста е суштинско демократско правило и одговор на дезинформациите, оценувајќи дека платформата е политичка порака дека Владата работи чесно и во интерес на граѓаните. Мицкоски посочи дека медиумите добиваат моќен алат за следење на секоја фаза од реализацијата на проектите.

„Ниту еден проект веќе не е некаде таму, скриен во институционални лавиринти. Сега е јавен, видлив и проверлив“, рече премиерот

Премиерот ги презентираше и резултатите од јавните повици за финансирање. Преку првиот повик се опфатени 288 проекти во вредност од речиси 4,6 милијарди денари. Според Мицкоски, сите проекти се започнати, за сите се склучени договори, 193 се завршени, 26 се во целосно завршна фаза, 89 активно се реализираат, а за уште шест проекти тендерската постапка е завршена.

Тој истакна дека проектите опфаќаат инфраструктура, животна средина, спорт, култура и образование, нагласувајќи дека тоа значи подобри услуги и подобар квалитет на живот.

Премиерот се осврна и на вториот јавен повик финансиран преку унгарскиот кредит, во кој се опфатени 828 проекти со вредност од 13,8 милијарди денари. Според него, над 50 од нив се завршени или во завршна фаза, а за повеќе од 500 се потпишани договори.

Мицкоски рече дека Владата работи транспарентно и современо, дека јавните средства се под јавен надзор и дека платформата воспоставува нова култура на владеење во која секоја информација е достапна и секое ветување е проверливо. Тој порача дека ова е следната фаза на институционална зрелост, каде резултатите се одговор на јавните очекувања.

Љупчо Николовски набавил поскапо жито за стоковите резерви за 1,3 милиони евра, откако претходно Заев и Филипче му го отпишаа кусокот, обвини Валентин Манасиевски, член на ЦК на ВМРО-ДПМНЕ.

„Љупчо Николовски треба да даде јасни одговори дали грантот за фирмата Тргопродукт вреден 1,4 милиони евра од ИПАРД програмата е подарок за Заев и Филипче затоа што му потпишаа отпис на 2000 тони жито? Љупчо Николовски треба да даде јасни одговори дали отписот на 2000 тони жито од стоковите резерви на државата е направен за да може во 2022 година, да направи набавка на 20000 тони жито поскапо за 1,3 милиони евра? Исто така, Љупчо Николовски треба да даде одговори, прво зошто е направена оваа набавка на 20.000 тони жито едно по друго, по отписот на кусокот што го потпишале Заев и Филипче кога велеа дека стабилни и доволни се стоковите резерви на државата? Дополнително, зошто набавките за житото биле поскапи за цели 1,3 милиони евра? 20.000 тони пченица државата ја чинело 532 милиони денари или 8,6 милиони евра, односно еден тон жито бил 26.625 денари, а килограм 26.6 денари“, рече тој.

Тој вели дека ова е многу важен сегмент, бидејќи пченицата која била набавена од Србија, цената на берзата во Нови Сад била 20,5 денари, дополнително трошоци за транспорт од 1,5 до 2 денари по килограм се доаѓа до цена од 22,5 денари, што, како што рече, е за цели 4 денари помалку од оние кои државата ги платила поради Љупчо Николовски, Заев и Филипче, или 1,3 милиони евра повеќе пари биле потрошени на граѓаните.

„Николовски треба да одговори зошто државата платила 1,3 милиони евра поскапа сума за житото и дополнително, зошто оваа сума од 1,3 милиони евра е скоро идентична на онаа која Заев преку својата фирма Тргопродукт ја добил од грант, а таа е 1,4 милиони евра? Ги повикуваме и ДКСК и ЈО да постапат по овој случај и да го истражат“, рече Манасиевски.