Македонија
Запленети девизи, златни монети и накит
Во текот на минатите две недели царинските службеници открија три обиди за нелегално изнесување на готовински платежни средства од државата, еден обид за криумчарење златни предмети, еден обид за внесување фалсификати и еден обид за криумчарење мигранти.
Притоа привремено се задржани:
Девизи
– 25.000 евра, откриени од страна на мобилните царински тимови, при контрола на српски автомобил и личен претрес на двајца српски државјани кои со возилото се пријавиле за излез од државата, на граничниот премин Богородица. Кај двајцата патници биле пронајдени по 10.000 евра, додека во кутијата за прва помош, сместена во багажникот на возилото, биле пронајдени уше 25.000 евра, за кои возачот изјавил дека се негова сопственост. Согласно законските прописи, на патниците им биле вратени по 10.000 евра, износ што нерезидент може слободно да го изнесе од државата, а против возачот е поднесено барање за поведување прекршочна постапка.
– 20.000 евра, откриени во два одвоени случаи на граничниот премин Богородица.
Во првиот случај, при личен претрес на грчки државјанин кој, управувајќи грчки автомобил, се пријавил за излез од државата, во предните џебови од неговите панталони биле пронајдени 20.000 евра. Согласно законските прописи, на патникот му биле вратени 10.000 евра, износ што нерезидент може слободно да го изнесе од државата, а 10.000 евра биле привремено задржани.
Во вториот случај, двајца босански државјани, кои со босански автомобил се пријавиле за излез од државата, пријавиле дека со себе носат 20.000 евра, но при извршениот личен претрес кај возачот биле пронајдени 20.000 евра, а кај сопатничката, сопруга на возачот, биле пронајдени уште 10.000 евра.
Согласно законските прописи, на патниците им биле вратени по 10.000 евра, износ што нерезидент може слободно да го изнесе од државата, а 10.000 евра биле привремено задржани.
Во двата случаи, против двајцата возачи се поднесени барања за поведување прекршочни постапки.
Златни монети и накит
– 56 златници и 5 парчиња златен накит, со вкупна маса од 429 грама, откриени од страна на мобилните царински тимови, при контрола на македонски автомобил со кој за излез од државата на граничниот премин Блаце се пријавиле двајца сопружници, македонски државјани. Непријавените златници и златниот накит биле откриени во еден сошиен чорап, сместен во несесер, и во алуминиумска фолија, сместена во паричник, пронајдени во чантата на сопатничката. Истите се привремено задржани, а случајот е предаден на Одделението за истраги при Царинската управа, за понатамошно постапување.
Делови за багер
– 1 употребуван ладилник за багер, откриен при контрола на стока со потекло од Албанија, пријавена за увозно царинење во царинската испостава Струга. Непријавениот ладилник, кој не бил опфатен со царинската декларација, е привремено задржан, а против увозникот ќе биде поведена соодветна постапка
Стока за која постои сомневање дека повредува права од интелектуална сопственост
– 336 пластични капачиња и 149 пластични стикери за бандажи со лого на заштитени трговски марки, откриени во царинската подружница Аеродром Скопје – отсек за стоково царинење, при контрола на брза пратка од Хонгконг, наменета за физичко лице од Скопје. Поради сомневање дека производите повредуваат права од интелектуалана сопственост, истите се привремено задржани, и согласно законските одредби ќе биде поведена постапка за утврдување на нивната оригиналност.
Мигранти
Во царинската подружница Скопје 3, возач на ирански камион паркиран во терминалот пријавил дека слушнал човечки гласови од приколката кои повикувале за помош. Преку Дежурниот царински центар биле известени мобилните царински тимови, кои по пристигнувањето на терминалот извршиле контрола на приколката, при што биле пронајдени 6 илегални мигранти. Според нивните изјави, петмина биле државјани на Бангладеш, а еден бил државјанин на Пакистан.
Мигрантите биле предадени на Министерството за внатрешни работи за понатамошна постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Донесени пресуди за случајот „Премин“, обвинителството најави жалба
Денеска, во Основниот кривичен суд Скопје, беше објавена неправосилна пресуда во предметот со кодно име „Премин“, застапуван од Специјализираното одделение за гонење на кривични дела сторени од лица со полициски овластувања и припадници на затворската полиција при Обвинителството за гонење на организиран и корупција. Во предметот беа опфатени повеќе царински службеници од Царинските испостави Ново Село и Дојран. Со пресудата, дванаесет обвинети лица се огласени за виновни за сторени кривични дела Примање поткуп и Злоупотреба на службената положба и овластување.
Четворица обвинети се осудени на ефективни казни затвор во траење од една година и шест месеци до три години, додека на останатите осум лица им се изречени условни осуди.
Четворица обвинети на почетокот на главната расправа го признаа делото и тогаш судот ги осуди на ефективни казни затвор во траење од 2 години до 2 години и 8 месеци.
Воедно, на 14 лица во предметот осудени за кривичното дело Примање поткуп судот им изрече и казна забрана за вршење на должност на службено лице, во времетраење од две до осум години, индивидуално определена за секој од нив.
Предлогот на обвинителството за одземање и конфискување на имотната корист прибавена со кривично дело беше делумно прифатен од страна на судот и паричните средства се вратени на еден од обвинетите.
Останатите привремено одземени парични средства пронајдени при извршените претреси се одземени и тоа 18.230 евра, 263.210,00 денари, 4860 швајцарски франци, 443 американски долари, 20 британски фунти, 200 украински гривни, 102 бугарски лева и 100 турски лири, како и 36 штеки цигари.
Обвинителството незадоволно од висината на казните и од висината на одземените парични средства најавува дека ќе го искористи правото на изјавување на правен лек по писмено добивање на пресудата.
Истражната постапка за овој случај беше отворена во октомври 2024 година кога беше спроведена полициска акција под кодно име „Премин“ поради основано сомнение дека обвинетите распоредени во Царинските испостави Ново Село и Дојран, во временскиот период од 21.03.2023 година до 15.10.2024 година, со умисла извршиле повеќе временски поврзани дејствија што претставуваат повеќекратно остварување на исто дело.
Тие искористувајќи ист траен однос, исти прилики и слични околности, при вршење на царински прегледи на стоката што се увезувала во државата преку граничните премини, од превозниците на стоката директно барале и примале парични средства за себе во износи од по 20, 50, 70, 100 и 150 евра, за да не извршат службено дејствие што морале да го извршат.
Македонија
Поранешен градоначалник на Росоман исплатил личен долг од 500.000 денари од општинскиот буџет
Полицијата поднесе кривична пријава против С.Н.(29) од Росоман поради постоење основи за сомнение дека сторил кривично дело „злоупотреба на службената положба и овластување“.
Според информациите на МВР, во периодот од август 2024 година до септември 2025 година, С.Н. во својство на градоначалник на општина Росоман, во два наврати ги пречекорил границите на службеното овластување и од Буџетот на општина Росоман противправно биле прибавени парични средства во вкупен износ од околу 500.000 денари, кои биле присилно наплатени од извршител за личен долг на С.Н..
Македонија
Гаши на работна средба во МАНУ
Претседателот на Собранието, Африм Гаши, одржа работна средба во Македонската академија на науките и уметностите, со претседателот Живко Попов, како и со други претставници на Академијата.
„На средбата се разговараше за значењето на поактивното вклучување на Академијата во стратешките процеси на развој на државата, особено во креирањето политики и во обезбедувањето стручна поддршка при институционалното одлучување“, соопштија од Собранието.
Исто така, Гаши информирал за вчерашната одлука усвоена на седница, со која е овластен, како претседател на Собранието, да склучи поединечен колективен договор со претседателот на синдикалната организација на Академијата.
Тој изразил подготвеност за поддршка на сите иницијативи што ја зајакнуваат улогата на науката и уметноста во развојот на државата.

