Во дводневна заедничка акција на Секторот за контрола и истраги при Царинската управа и Министерството за внатрешни работи запленети се 22 патнички моторни возила со странски регистарски таблички управувани од македонски државјани.

Запленетите возила се од разни водови марки, а меѓу нив, четири возила се „мерцедес, три патнички возила се „ауди“, две „бмв“, едно патничко товарно возило „тесла“ и др., а сите возила биле управувани од македонски државјани на територијата на Република Северна Македонија повеќе од 6 месеци, велат од Царината.

Против сторителите на прекршоците ќе биде поднесено Барање за поведување прекршочна постапката до надлежниот суд.

„Имено, во согласност со законските надлежности на Царинската управа, кои се во согласност со критериумите и условите пропишани во Истанбулската конвенција за привремен увоз, одредби од Царинскиот закон и одредби од уредбата за спроведување на царинскиот закон, граѓаните на РСМ и странците може привремено да внесат и да управуваат возило на територијата на Република Северна Македонија за време на нивниот престој, но најмногу 6 месеци во период од 12 месеци по што возилото мора да ја напушти територијата на Република Северна Македонија.

Во спротивно ќе треба да се пријават на најблиската царинска подружница во местото во кое привремено престојуваат и да почнат соодветна царинска постапка за увоз или привремен увоз на возилото“, се додава во соопштението на Царинската управа.