СДСМ е јасен, нема разговори за македонски јазик и македонски идентитет, тие се потврдени, изјави Мартин Костовски, пратеник на СДСМ, на новинарско прашање зошто СДСМ упорно не сака прашањето околу преговорите и разговорите со Бугарија да се најде на разговор во Собранието, дали преку Комисијата за надворешни работи или, пак, на пленарна седница, имајќи ги предвид последните случувања коишто се драматични и укажуваат на вето?

„Дали треба да разговараме дека сме Македонци што зборуваат македонски јазик? Оној којшто смета дека за тоа прашање треба да се разговара, слободно може да разговара но не во македонското собрание. За Социјалдемократскиот сојуз и мнозинството во собранието за ова прашање нема простор за разговор. Ние сме Македонци коишто зборуваат македонски јазик“, изјави пратеникот.

Министерот за надворешни работи, Бујар Османи, заедно со амбасадорката на Обединетото Кралство, Рајчел Галовеј, на свечена церемонија ја потпишаа Спогодбата за партнерство, трговија и соработка меѓу Северна Македонија и Обединетото Кралство.

„Денес одбележуваме крунисување на еден долг, значаен процес, започнат уште пред три години, а кој претставува суштински израз на вредностите на дипломатијата да создава можности и потенцијали за бизнисите, за општествата и воопшто за граѓаните“, истакна Османи.

По тој повод беше оценето дека Обединетото Кралство во изминатите десет години прераснало во еден од најзначајните трговски партнери на Северна Македонија и меѓу десетте најголеми извозни и увозни дестинации на нашта земја.

„Договорот значи потенцијал за бизнисите да ја зголемат економската активност меѓу двете земји, тоа ќе значи потенцијал и за останатите бизниси да оформат нови релации на соработка ослободени од бариерите на границите; ова е потенцијал и за нови британски инвестиции овде во Северна Македонија, за нови работни места, за поголема активност и на домашните компании и, секако, потенцијал за севкупен економски напредок, што претставува круна на одличните односи меѓу двете земји“, истакна Османи.

Министерот додаде дека во овој период, кога нашите амбиции за членство во Европската Унија се исправени пред сериозни предизвици, никој од нас не е среќен што Обединетото Кралство ја напушта Унијата, но претставува вистинска дипломатска победа тоа што потпишуваме договор со кој ги зацврстуваме нашите односи и поставуваме темели за уште подлабока и поширока економска и политичка соработка.

За време на церемонијата на потпишување на спогодбата, свое обраќање имаше и амбасадорката на Обединетото Кралство во Република Северна Македонија, Рејчел Галовеј, а преку видеолинковско вклучување се обрати и Мартин Викерс, специјален пратеник за трговија со Западен Балкан на премиерот, Борис Џонсон.

Поднесените амандмани се наша реакција на неуставноста и насилничкото носење на Деловникот од страна на СДСМ, вели Никола Мицевски, Координатор на Пратеничката група на ВМРО-ДПМНЕ.

Тој образложи дека пратеничката група на ВМРО-ДПМНЕ има поднесено 1.350 амандмани, а вкупно од целата опозиција поднесени се 3.000 амандмани. Мицевски вели дека единствен начин за одбрана на Уставот и Деловникот во Собранието е поднесување на огромен број на амандмани за блокирање на самата седница.

„Се додека вака насилнички и неуставно се однесува власта, тоа ќе биде реакцијата на ВМРО-ДПМНЕ и опозицијата“, нагласи Мицевски.

Тој рече дека во Деловникот јасно пишува на кој начин се одржуваат седниците и во Уставот јасно стои дека присуството на самите седници на пратениците е внатре во салата.

„Онлајн Собрание во моментов не може да се одржи во Република Македонија“, рече Мицевски.

Во врска со обвинувањата од власта за поднесените амандмани, тој рече дека на седницата од 18 јануари 2007 година кога ВМРО-ДПМНЕ било на власт, а СДСМ тогашна опозиција, таа поднела околу 5.000 амандмани за блокирање на Деловникот. Однесувањето на СДСМ кога се на власт и кога се во опозиција е сосема различно, додаде Мицевски.