Министерството за здравство (МЗ) информира дека 453 здравствени работници, кои работат во ковид-центрите, се вакцинирале со вакцината од производителот „Фајзер“ во изминатите два дена.

Од МЗ потсетуваат дека кон крајот на месецот во нашата земја се очекува да стигне и вакцината на кинескиот производител „Синофарм“, од каде што во директни преговори купени се 200.000 вакцини против Ковид-19.

Министерството за здравство информира дека Македонија преку Ковакс-механизмот има обезбедено 833.000 дози вакцини, а правата испорака што ќе пристигне во нашата земја ќе биде вакцината на „Астра зенека“, од која првата количина е планирано да стиге во март.

„Од оваа вакцина за Северна Македонија се предвидени помеѓу 103.200 и 175.200 дози, од кои околу 35 % треба да пристигнат во првиот, а преостанатите во вториот квартал од годината. Во правата испорака на Ковакс-механизмот за вакцините на ‘Фајзер’ вклучени се само 18 земји, а не се вклучени земјите што почнале сопствени програми за вакцинација против Ковид-19“, велат од МЗ.

Министерството за здравство апелира дека сите вакцини што се на пазарот се развиени на безбедни платформи, односно тие се безбедни за граѓаните.

Во меѓувреме, тече пријавувањето на веб-страницата vakcinacija.mk, како и преку матичен лекар за сите граѓани над 70-годишна возраст за кои вакцинацијата почнува веднаш по здравствените работници опфатени во правта фаза. Досега на веб-страницата 58.500 граѓани изразиле желба за вакцинација, а преку матичен лекар 32.917 граѓани над 70-годишна возраст.