Премиерот Зоран Заев должи одговори зошто е сменет член на историската Комисија, посочи денеска на прес-конференција потпретседателот на ВМРО-ДПМНЕ, Владо Мисајловски.

Тој јавно запраша дали со тоа се прави директен притисок и врз останатите членови за прифаќање на, како што рече, историските невистини и дали премиеорт сака од Комисијата наместо историски орган, да направи политички орган.

„Владата и Заев да одговорат дали тајната смена на членот на историската комисија, не е притисок врз одлучувањето и увертира во ново попуштање на сметка на интересите на Македонија. Зошто се крие смената на членот на Комисијата. Историјата е јасна. Науката е јасна. Чепкање во македонскиот идентитет, јазик и историја не смее да има“, порача партискиот потпретседател.

Мисајловски воедно потсети на изјавата на бугарскиот министер Каракачанов дека во игра бил анекс на постојниот договор од 12 точки и кажа дека до денес, нема информации за демант на македонската влада, додавајќи дека врз осова на тоа може да се заклучи оти Заев преговара за анекс на договорот во кој се вклучени елементи од нашиот идентитет, историја и јазик.

На крајот, потпретседателот на опозициската партија порача дека историските комисии треба да преговараат необременети од политички притисоци, а идентитетските обележја не смеат да бидат на маса на преговори.

Министерството за здравство информира дека денеска на Kлиниката за детски болeсти беше предадена донација од страна на амбасадата на Израел на иницијатива на амбасадорот Ден Ориан.

Донацијата се состои од перфузори (инфузиони пумпи) за правилно дозирање терапија и венвјуери за скенирање вени кај критични новороденчиња. Со венвјуер-апаратите првпат ќе се врши одредување пневмоторакс, односно зголемен воздушен притисок во белите дробови кај бебиња.

Овие апарaти ќе се монтираат во амбулантни возила за транспорт на критично болни деца, кои во државата треба да стигнат до крајот на 2021 година.

Денешната донација е дел од проектот „Перимак“ на „Проџект хоуп“, кој има цел да го организира неонаталниот транспорт во државата и да ја редуцира перинаталната смртност. Овој проект е имплементиран со поддршка на МЗ и почна во 2017 година.

ВМРО-ДПМНЕ поднесе претставка до антикорупциската за фирмата „Бригада дизајн“ на советникот од СДСМ во Град Скопје, Бојан Ивановиќ, изјави Димче Арсовски, портпарол на ВМРО-ДПМНЕ.

„Денеска сме пред антикорупциската комисија и ќе поднесеме претставка за фирмата ‘Бригада дизајн’ ДООЕЛ Скопје, чиј директор и еден од сопствениците е Бојан Ивановиќ, советник од редовите на СДСМ во Град Скопје. Фирмата на Бојан Ивановиќ, советник и член на СДСМ, зела тендери од Фондот за иновации и Регулаторната комисија во висина од над 10 милиони денари, а јасно е каде е сомнежот и тоа веќе неколку дена го говориме, а од СДСМ и од власта има единствено молк“, рече Арсовски.

Дополнително, рече тој, бараме антикорупциската комисија да се разбуди од зимскиот сон и да почне да работи, да не чека дозвола ниту од Љупчо Николовски ниту од Зоран Заев,.

„Би сакал уште еднаш да ги потсетам антикорупционерите и нивната претседателка дека се независно тело, а не тело што треба да ја командува Владата, како што впрочем гледаме дека, за жал, сега се случува тоа, и да отворат случај да ги истражат овие сомнителни тендери за кои говориме неколку дена, а има класичен молк, кој, најверојатно, значи потврда дека се фатени живи во сомнителен криминален тендер со СДСМ“, рече Арсовски.

Во спротивно, додаде тој, уште еднаш антикорупционерите ќе покажат и докажат дека само се партиски приврзоци на СДСМ и на власта и соучесници во криминалот на власта.