Доколку продолжи бугарската блокада на Македонија, Брисел би можел да ги раздвои разговорите со Скопје и Тирана за членство во ЕУ и да ги продолжи пристапните преговори со Албанија, вели комесарот за проширување Оливер Вархели, во интервју за Еуроњуз.

Иако понудите за преговори за членство во ЕУ отсекогаш биле заедно за двете земји, сепак би можело да дојде до измени на процесите, додава Вархеји.

„ Ако повторно наидеме на тешкотии со Северна Македонија, што значи дека не сме успешни во убедувањето на Бугарија и Северна Македонија за заемно согласно решение, тогаш прашањето е дали можеме да одиме напред само со Албанија. И ќе мора да го разгледаме тоа прашање“, рече тој.

На прашањето дали формално „раздвојување“ е опција, тој одговори: „Можеби е опција, да“.

Оваа можност за раздвојување на преговорите со двете земји Вархеји ја најави и за време на посетата на Скопје.

За разлика од Вархеји, некои земји членки на ЕУ како Германија и Австрија се против можноста да се разделат преговорите, поради бугарската блокада кон Скопје.

Заменик претседателот на Владата задолжен за европски прашања Никола Димитров, денес ќе престојува во работна посета на Естонија.

Предвидени се средби со министерката за надворешни работи Ева-Марија Лииметс, со претставници на естонскиот парламент (Riigikogu) – Марко Микелсон, претседател на Комитетот за надворешни работи и Сиим Каалас, претседател на Комитетот за европски прашања, како и со претставници од кабинетот на премиерката Каја Калас, задолжени за европски прашања.

Вицепремиерот Димитров ќе се сретне и со директорот на Естонскиот центар за источно партнерство – Герт Антсу.

По неодамнешните посети на Вилнус и Рига, со Талин, Димитров ја заокружува балтичката турнеја, надоврзувајќи се на серијата посети на главни градови на ЕУ земји членки, значајни за евроинтегративниот процес на Северна Македонија.

Во светло на поддршката за пробив на нашиот европски пат, Димитров ќе ја пренесе пораката за потребата од усвојување на преговарачката рамка и одржување на првата меѓувладина конференција на земјата со ЕУ што побрзо.

На средбите ќе се дискутира и за зајакнување на билатералната соработка меѓу Северна Македонија и Естонија, со особен фокус на процесот на дигитализација. Преку конкретна експертска поддршка, како една од најуспешните европски земји во однос на дигитализацијата, Димитров ќе разговара за пренесување на естонските искуства со е-влада, како и дигитализација на процесите и услугите за граѓаните и бизнис заедницата.

Претседателот Стево Пендаровски денеска ќе се сретне со лидерот на ВМРО-ДПМНЕ, Христијан Мицкоски.

Тие ќе разговараат за настаните од 27 април и за општата состојба во државата, како политичка, така и економска.

По завршувањето на средбата, најавено претседателот Пендаровски да одржи прес-конференција.