Министерството нема да навлегува во „математиките“ на партиите. Културата обединува, а не пресметува, реагираат од Министерството на прес – конференцијата на коалицијата Алтернатива и Алијанса за Албанците.

„Фактот дека лани е направен долг од 3 милиони евра, на штета на културните работници и уметниците, доволно говори за ланската математика која била правена во Министерството, а сега е предмет на финансиската полиција“, велат од таму.

Министерството за култура, пишува во реакцијата, останува доследно на ставот дека основни критериуми според кои работеа комисиите одлучувајќи по пријавите за Годишниот конкурс беа: квалитетот на проектите, нивното значење за јавниот интерес во културата, нивната релевантност во животот на граѓаните, поддршка на автори од различни етнички заедници, стимулирање на креативни млади творци, на ранливи и маргинализирани групи, како и реално вреднување на трудот за да се заштити достоинството на авторот.

„Нашата земја е мултикултурна, вредност која сите заедно мора да ја негуваме и почитуваме“, се наведува во реакцијата.

Министерот за правда Бојан Маричиќ одговарајќи на пратеничко прашање во Собранието кажа дека од Евростат потврдиле дека Законот за попис и методологијата по која ќе биде спроведен е по највисоките пропишани стандарди кои се воспоставени во сите развиени земји.

„По одговорот кој стигна од Евростат се поклопуваат сите сомнежи на опозицијата и за методологијата и за Законот за попис, како и за начинот на кој ќе се спроведе пописот. Ајде да се обединиме, да ја оставиме дневната политиката на страна и заедно да го спроведеме пописот. Ги повикувам сите политички партии и ги охрабрувам да го направат тоа. Пописот и е потребен пред сè на државата, на нас, на сите граѓани, а не на партиите. Вчера беше донесен и здравствениот протокол за изведување на пописот од страна на Комисијата за заразни болести, па оттука ќе бидат исполнети и сите здравствени протоколи за цел безбедно спроведување на пописот“, потенцираше Маричиќ.

Министерот пред пратениците кажа дека веќе следната недела почнува попишувањето на неколку групи граѓани меѓу кои и на дијаспората. Ќе се попишуваат од понеделник и припадниците на Армијата, лицата во Воспитно-поправни установи, затворите, дипломатите и нивните семејства во странство, како и бездомните лица.

Премиерот Зоран Заев донира дел од парите од Хесенската мировна награда за справување со Ковид-19, објави министерот за здравство, Венко Филипче.

„Во свое лично име, во име на Министерството за здравство и сите оние што се на првата линија во борбата со Ковид-19, упатувам благодарност до премиерот Зоран Заев за неговото лично учество во оваа заедничка акција. Премиерот својот дел од Хесенската мировна награда, што ја добија со поранешниот грчки премиер Алексис Ципрас во висина од 12.500 евра, ја донира во солидарниот фонд за справување со Ковид-19“, напиша Филипче на „Фејсбук“.

Тој додава дека огромен број заедници, компании, но и индивидуалци се приклучиле преку оваа иницијатива во заедничкото справување со планетарната криза.

„Солидарноста е клучна во периодот што следува и нашето општество мора да функционира како едно“, напиша Филипче.