Претседателката Гордана Сиљановска-Давкова денеска на свечена церемонија ги прими акредитивните писма на новоименуваната амбасадорка на Република Индонезија, Листиана Оперананта, со седиште во Софија.

Сиљановска-Давкова изрази задоволство од динамиката на билатералните односи, воспоставени на 25 мај 1993 година, истакнувајќи ја важноста на продлабочувањето на соработката на политички план, во меѓународните организации, како и во економијата.

На средбата претседателката ја нагласи важната улога на почесниот конзул на Индонезија, Сашко Кедев, во зацврстувањето на пријателските односи меѓу двете земји, како една од причините за доделување на орденот „8 Септември“.

Таа ја потенцираше важноста на дијалогот меѓу македонската и индонезиската парламентарна група за развојот на демократијата во двете држави.

Според неа, обете држави се познати по извонредните природни убавини и богатото културно наследство што претставува одлична основа за интензивирање на културна соработка и развој на туризмот.

Таа се заблагодари за стипендирањето на македонските студенти во рамките на програмата Дармасисва.

Претседателката ѝ посака успех на амбасадорката Листиана Оперананта во извршувањето на одговорната дипломатска функција.

Фалсификат прашок за перење алишта „Ариел“, кој е штетен по здравјето на луѓето како и за животната средина, е запленет во царинската испостава Тетово. Прашокот бил од Турција, а наменет за увозник од Скопје.

Царински службеници од ЦИ Тетово спречија обид за криумчарње стока која била натоварена во Турција и наменета за увозник од Скопје. Станува збор за 2000 килограми, или 200 вреќи од по 10 килограми прашак за перење алишта со трговска марка „Ариел“.

„Преку одделението за нетарифни мерки и заштита на правата од интелектуална сопственост при Царинската управа известен е правниот застапник на носителот на правото кој потврди дека предметниот прашак Ариел е фалсификат и со тоа ги повредува правата од интелектуална сопственост заради што е согласен за уништување на стоката“, соопшти Царината.

Против сторителот по спроведување на постапка ќе биде поднесена соодветна пријава.

„Секојдневните заложби на царинските службеници во сузбивање на нелегалната трговија и шверцот е многу важно со цел заштита на здравјето на граѓаните и спречување криумчарење на производи коишто се штетни за здравјето на граѓаните, како и заштита на животната средина од загадување предизвикано од неконтролиран хемиски состав“, велат од Царина.

Тим од странски и домашни експерти денеска презентираа дел од решенијата од процесот на изработка на физибилити студија за изградба на гондола на „Пелистер“.

Експертите од Словенија и Франција, како и домашните, ги претстави претседателот на Советот Бојан Бојкоски, пред присутните советници, администрацијата на општината, планинари, здруженија и медиумите. Екипата која ќе ја подготвува физибилити студијата за гондолата, констатирала голем потенцијал на „Баба Планина“ со врвот „Пелистер“.

„Бевме на терен два-три пати, во сите услови и преку зима и преку лето за да ги видиме сите услови и потенцијали кои што ги нуди природата. Потенцијалот е огромен, заради тоа сме и овде, бидејќи мислиме дека луѓето се повеќе ја сакаат природата, но сепак треба некаква инфраструктура како би дошле до таа природа“, вели Франц Фурлан, експерт од Словенија, од компанината „Furlani“.

Тој кажа дека има повеќе опции од каде би тргнувала гондолата и дека денеска ќе се дискутираат и тие теми.

„Мислиме дека ваквиот проект е важен и затоа ги дискутираме можностите, како и тоа што е позитивно, а што би било негативно. Вие подобро знаете од нас, но ние можеме да дојдеме со некои идеи и опции и од технички и од финансиски аспект“, рече тој, кој заедно со неговиот колега Вансент Тасар од компанијата „Stem international“ од Франција имаат бројни искуства низ светот, а задачата им е да понудат инфраструктурни, финансиски, технички решенија.

Тој вели дека трендовите се да се користат еколошки решенија, а гондолите се такви, затоа што не се влегува со возила во националниот парк, а истовремено тие гондоли им овозможуваат на посетителите да уживаат во природата.

„Физибилити студијата треба да ја покаже оправданоста, економските потенцијали и сето она што го очекуваме од гондолата која би се изведувала на ‘Пелистер’“, рече градоначалникот на Битола, Тони Коњановски кој кажа дека издвоени се средства за изработка на таа студија.

„Во опција се повеќе патеки до горе. Почетна станица би била некаде во реонот на Дихово, тоа е едната опција, потоа постои локација и кај Ротино и Цапари, неколку патеки, но не подолги од 9 километри и целта би била со една попатна станица, која ние би сакале да е, бидејќи веќе има инфраструктура да биде кај ‘Копанки’ или ‘Молика’ и би одела до антена“, рече Коњановски.

Според него, целта е да се направи гондола која од една страна ќе ја збогати туристичката понуда, но од друга да се зачува природата.

„Основна цел е и да се зачува екологијата, биодиверзитетот на ‘Пелистер’, да не се уништува, едноставно со најеколошкото средство на електрична енергија да се искачиме и да уживаме во убавините на ‘Пелистер’“, рече Коњановски.

Примерите, како што кажа Коњановски, зборуваат дека изградбата на ваква гондола во други земји ја зголемиле посетеноста, односно туризмот десеткратно, од тоа што веќе го имале. Сепак, додаде дека ова е прв чекор и долг процес додека се реализира.