Македонија
Костадинов: „Енерготек“ има 99 проценти удел во конзорциумот што добивал бизниси од владата

Пратеникот од СДСМ, Костадин Костадинов, денеска на прес-конференција обвини дека на виделина излегле шемите што актуелниот претседател на ВМРО-ДПМНЕ, Христијан Мицкоски, ги има со поранешниот премиер Никола Груевски.
Тој образложи дека конзорциумот „Минка – Енерготек“, во кој удел имал Христијан Мицкоски, добил согласност од владата на Груевски за користење вода и закуп на земјиште за изградба на хидроцентрали.
„Во 2015 година, кога Мицкоски бил советник кај неговиот ментор Груевски, конзорциумот во кој удел има Мицкоски токму од владата на Груевски добива државно земјиште од речиси 33 илјади квадратни метри за изградба на хидроцентрала. Хидро Мицкоски и антизападното раководство на ВМРО-ДПМНЕ повторно се фатени во лага. Но, очигледно, ниту антинародното раководство на ВМРО-ДПМНЕ не знае каде сè и колку точно удел има Мицкоски во компании и конзорциуми кои добиле тендер од владата на Никола Груевски“, рече Костадинов.
Тој додаде дека ВМРО-ДПМНЕ првично тврдела дека Мицкоски има удел од 7 отсто во компанијата „Енерготек“ ДОО Скопје, а пред неколку денови истото тоа раководство тврдело дека Мицкоски имал удел од 7 отсто во сосема друга фирма -„Енергомонт“. Вчера, пак, рече Костадинов, раководството на ВМРО-ДПМНЕ тврдеше дека Хидро Мицкоски имал удел од 7 отсто во фирмата „Минка-Енерготек“.
„Денеска пред јавноста го презентираме вистинскиот процент на удел на антизападниот Мицкоски. Конзорциумот ‘Минка-Енерготек’ е составен од компанијата ‘Енерготек’ ДОО Скопје во која удел има Мицкоски и компанијата ‘Минка ДА’ ДОО Струмица. Во првичната сопственичка структура на конзорциумот, 60 отсто од уделите ѝ припаѓале на ‘Минка ДА’ ДОО Струмица, а 40 отсто на компанијата ‘Енерготек’ ДОО Скопје, во која удел има Мицкоски. Но, во втората половина на 2017 година во конзорциумот ‘Минка-Енерготек’ била направена промена на сопственичката структура, со пренос на уделите. Со таквиот пренос, ‘Енерготек’ ДОО Скопј“ на Мицкоски во конзорциумот ‘Минка-Енерготек’ има удел од 99 отсто, додека ‘Минка ДА’ ДОО Струмица има удел од само 1 (еден) отсто“, тврди СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.