Македонија
Кривичниот суд бара да се истражат заканите од адвокатите во случајот ТНТ

Кривичниот суд побара од Адвокатската комора, МВР и од Обвинителството да преземат соодветни мерки и да ги истражат елементите на закани и притисоци упатени кон судијата поротник Лилјана Ивановска-Кочкова од страна на адвокатите на поранешниот градоначалник на Гази Баба, Тони Трајковски, и на поранешниот министер за транспорт и врски, Миле Јанакиески, во случајот ТНТ.
„Зачудува фактот што јавните закани, т.е. притисоци, се генерирани од поединци што се странки во судска постапка. Изненадува нивниот неетички и непрофесионален однос, кој е без почит кон судот и е надвор од надлежностите на еден адвокат бранител на обвинет. Притисок/закана со поднесување кривична пријава кон судски поротник, кој активно учествува во водењето на судската постапка и учествува во носењето на одлуката, е сериозен акт и класичен пример на атака врз независноста и непристрасноста на судското одлучување дотолку повеќе што во конкретниот случај заканата е генерирана од адвокат кој е учесник во истиот судски предмет во кој постапува нападнатиот судија поротник“, се вели во соопштението.
Доколку странките имаат забелешки на работењето на судот, постојат правни лекови и законски инструменти со кои може да се побиваат судското постапување и судските постапки. Заканите и притисоците, особено во време на активна судска постапка, не смее и не може да биде опција во една демократска држава, во која сите тежнееме кон владеење на правото.
„Општо познато е дека обврска на судијата поротник е да ја извршува својата функција сè додека не биде разрешен од страна на Судскиот совет на РСМ, што е во согласност со Законот за судовите. Во тој правец е и досега воспоставената пракса за разрешување судии и судии поротници создавана преку т.н. common sense и common low.
Како суд укажуваме дека ќе инсистираме на судење во разумен рок, што е законска обврска, но и интерес на обвинетите што тежнеат да ја докажат својата невиност, како и на оштетените што ги бараат своите права. Судењето во разумен рок е во интерес и на правната држава и владеењето на правото. Во правец на горенаведеното е и барањето да се продолжи мандатот на конкретниот судија поротник бидејќи нелогично е и неиздржано е поротник кој 2,5 години посветено учествувал во судската постапка да се разреши поради истекување мандат, што би иницирало постапката да почне одново.
Имајќи го предвид горенаведеното, очигледно е дека поединци/адвокати се вистински кочничари на оваа судска постапка, па дури во дадена ситуација може да се каже дека работат и спротивно на интересите на обвинетите. Во таа смисла судот го перципира и инсистирањето на друг адвокат од истата постапка, кој и покрај фактот што тој лично во мноштво други судски постапки го користел исклучиво службениот јазик, чие активно користење е услов за добивање на адвокатска лиценца, во согласност со Законот за адвокатурата, во оваа постапка инсистира да го користи својот мајчин јазик, кој дури ни неговиот клиент не го разбира. Какви било отстапки од ЗКП, кој го регулира користењето на јазиците во судската постапка, може да повлече низа опструкции во сите други судски предмети во државата, што може да доведе до колапс на правосудниот систем.
Ова обраќање на Кривичниот суд има една и единствена цел, а тоа е да се избегне вршење опструкција во работата на судските предмети што се во завршна фаза и оневозможување да се одолжат судските постапки во смисла на повторување или застарување. Судот цени дека оваа пракса мора да престане и да прекине, а цени дека на тој начин ќе се придонесе во реформирањето на судскиот систем“, се вели во соопштението.
По двете писма упатени на претседателот на Судскиот совет во врска со пензионирањето на поротничката во случајот ТНТ, адвокатот Јовица Страшевски, бранител на поранешниот градоначалник на Гази Баба, Тони Трајковски, во овој процес, испрати отворено писмо до претседателот на Основниот кривичен суд, Иван Џолев. Писмото следува како реакција на Судот, во кој се бара од институциите да се испита дали адвокатите во ТНТ се закануваат и вршат притисок на судиите.
„Писмата испратени до судот и до судијата поротник не се никакви закани нити притисоци, само се укажувања во согласност со важечките закони во Македонија и тие се со една единствена цел за доследно почитување и владеење на правото“, се вели во писмото на адвокатот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Вреди“: Поранешниот државен секретар за култура Азири го продаде албанскиот идентитет за работно место

Валмир Азири, поранешниот државен секретар за култура, направи срамен и неприфатлив чин, кој не само што го посрамува лично, туку и секој Албанец. На конкурсот во 2021 и почетокот на 2022 година, тој без двоумење го промени својот идентитет од Албанец во Македонец, само за да си овозможи лична корист и да обезбеди работно место кое беше наменето за македонската заедница, реагираат од коалицијата „Вреди“.
Ова, според нив, е чин на незамисливо предавство кон Албанците и сериозно кршење на вредностите кои нè дефинираат како нација.
„Демократската унија за интеграција, која постојано зборува за заштита на интересите на Албанците, не се двоумеше да ја продаде секоја вредност и идентитет на Албанците кога станува збор за лични интереси. Овој скандал е јасен одраз на хипокризијата и неспособноста на оваа политичка партија, која продолжува да профитира од позициите и да манипулира на грбот на Албанците. Се поставуваат важни прашања по овој скандал: Која е договорената шема што го натера Валмир Азири да направи ваков чекор? Дали неговото молчење додека беше државен секретар беше дел од агенда за деградирање и маргинализирање на Албанците во културата? Дали може поинаку да се нарече индивидуа која е подготвена да го продаде својот идентитет за лични интереси?“.
Ова, како што оценуваат во „Вреди“ е чин кој не смее да остане без последици.
Коалицијата, нагласуваат од таму, е решена да се бори против секој обид за манипулација и газење на албанскиот идентитет за тесни и лични интереси.
Бараат итна одговорност за овој, како што велат, тежок скандал и се обврзуваат да обезбедат дека лица како Валмир Азири нема да имаат место во институциите што треба да ги штитат интересите и вредностите на Албанците.
Ова, нагласуваат од коалицијата, е јасна порака за сите оние кои мислат дека можат да ја предадат албанската култура и идентитет за лична корист.
„Коалицијата „Вреди“ нема да запре и ќе продолжи да ги брани интересите на Албанците и нашиот национален интегритет“.
Македонија
(Видео) Митева за разрешувањето на Коцевски: Јавниот обвинител покрај правна, подлежи и на општествена одговорност

На денешната седница беше разгледано мислењето од Министерство за правда по кое владата отвори сериозна дискусија, информира на прес-конференција Марија Митева, портпаролка во Владата.
„Постапувајќи по заклучокот кој беше донесен на претходната владина седница со која го задолживме Министерството за правда да преземе активностите во однос на поведување на постапка за разрешување на Јавниот обвинител, Министерство за правда го достави мислењето во кое се нотирани следниве состојби: Како прво: нарушениот углед на институцијата со која раководи јавниот обвинител, затоа што чувањето на угледот на институцијата е должност која потекнува од Законот за јавно обвинителство, конкретно член 4 став 1“.
Целокупната јавност, потсетува Митева, во изминатиов период беше сведок на низа скандали, нарушена функционалност на ЈО, незаконски постапувања и корупција, неефикасност и повреда на принципите и самостојноста во вршењето на функциите на обвинителите.
Ваквите состојби, како што рече, се комплетно спротивни на обврските кои произлегуваат од законските надлежности.
Според неа, во случајот, не станува збор само за перцепција само на Владата, туку тоа е констатирано од стручна јавност, констатирано е во извештаи кои имаат конкретни, мерливи и објективни показатели.
„Во оваа смисла, Владата цени дека придонесот од јавниот обвинител за овие состојби е значителен и е резултат на низа пропусти и повреди во неговото постапување и извршување на функцијата. Овие дејствија со кои се предизвикани тешки последици по функционирањето на јавното обвинителство со што е направено намерна и неоправдана крупна професионална грешка се правните аргументи со кои што ќе побараме разрешување на Јавниот обвинител пред истекот на мандатот. Дополнително како Влада цениме дека јавниот обвинител покрај правна одговорност, подлежи или би требало да подлежи и на поширока општествена одговорност, особено пред органот кој што го избрал, а пред се пред граѓаните чии интереси треба да ги штити. Согласно вака утврденото мислење, Владата го задолжи министерството за правда да достави предлог за разрешување на јавниот обвинител, кое пак Владата ќе го достави до Советот на јавните обвинители од каде согласно законските одредби потребно е да се добие мислење“, нагласи Митева.
Македонија
Извршен увид во документацијата во Вишото јавно обвинителство Скопје

Надлежен јавен обвинител од Основното јавно обвинителство Штип денеска изврши увид во Вишото јавно обвинителство Скопје и обезбеди докази во постапката за кривични дела – Злоупотреба на службената положба и овластување и Малтретирање во вршење на службата поведена против јавен обвинител, се истакнува во соопштението.
„Јавниот обвинител и стручни соработници од ОЈО Штип ги документираа податоците внесени во уписниците и начинот на внесување на предметите. Притоа, се вршеше и споредба со исказите на оштетените лица – пријавители за начинот на кој наведуваат дека се интервенирало при распоредување на предметите.
Увидот во документацијата е извршен во целост во согласност со одредбите на Законот за кривична постапка и за истиот ќе биде изготвен записник со констатации за сите присутни лица“, се истакнува во дописот.