Нов случај на изживување врз куче предизвика бурни реакции на социјалните мрежи. Изутринава граѓани пријавиле дека виделе куче, повредено со секира, како лута по улиците на Охрид. Повреденото животно напладне било фатено од хумани граѓани и однесено во ветеринарна амбуланта, каде што ќе му биде извршена операција. Тие најавуваат пријава, но нудат и награда да се најдат оние што го нападнале кучето.

Климент Арнаудов, активист за заштита на животните, на „Фејсбук“ објави дека нуди награда од 200 евра за секој што има информација, која ќе го доведе до откривање на личноста што со секира му ја расцепи главата на куче во Охрид.

„Ова е втор случај на удар со секира во рок од една недела – за првиот во Скопје уште изостануваат истрага и евентуално осомничено лице и тоа само кажува дека злото од овој вид се толерира и поттикнува од државата и не е далеку денот кога и за уште еден ваков случај ќе посведочиме (да не зборувам за двата случаја во скопско Драчево на сечени мачиња на половина). Воедно, замолувам за доверлива информација (случајот ќе го пријавам лично, па нема да ве изложам на ризик ако се плашите) доколку знаете кој му го сторил ова и би одел до крај за овој монструозен лик да не помине само со глоба, но и да оди во затвор (Законот за заштита и благосостојба на животните и Кривичниот закон тоа и го налагаат). Не е далеку и денот кога таа секира и кон човек ќе ја насочи, психата човечка е таква“, напиша Арнаудов на „Фејсбук“. Тој додава дека ќе биде поднесена пријава против непознат сторител и нуди награда од 200 евра за секаква информација за сторителот на оваа монструозност.