Политичката партија Левица објави дека периодов добиле голем број пријави за ненајавени отпуштања, доцнење со плати и непочитување на препораките за заштита на работниците во време на светска пандемија.

Случај со непочитување на препораките, велат од Левица, е забележан во фабриката „Џојсон систем сејфти“ (поранешно „Ки сејфти системс“) која е лоцирана во технолошко индустриската развојна зона во Кичево.

„Според нашиот извор, во оваа фабрика работниците (коишто се во број поголем од 1000!) сè уште немаат добиено елементарни средства, како сапун, маски, ракавици, со коишто ќе се придонесе за заштита и превенција од коронавирусот. Дополнително, во компанијата не се почитуваат мерките за одалеченост, при што огромен број од работниците се сè уште распоредени во огромни групи со што се зголемува опасноста од ширење на овој вирус“, велат од Левица.

Од партијата додаваат дека станува збор за компанија во која пред две години  избркала работници поради обиди за синдикално организирање.

„Конкретниот случај веќе е пријавен до Државниот инспекторат за труд и Државниот пазарен инспекторат и очекуваме соодветен и навремен одговор од надлежните институции. Иако правните механизми за заштита на работниците континуирано се минираат од капиталистичката владејачка класа, во периодот што следи Левица ќе ги искористи сите механизми  што ни стојат на располагање против самоволието на капиталот и неговите владејачки елити“, додаде Левица во соопштение.