Седумдесет годишната Виолета Мирчевска од Прилеп три неделната битка со коронавирусот ја поминала емотивно и стресно, но голема мотивација и било семејството кое ја охрабрувало да издржи и повторно цврсто да застане на нозе.

Таа раскажува дека била ставена на кислородна поддршка и се чувствувала многу лошо.

„По една недела со симптоми на Ковид-19, бев хоспитализирана во инфективното одделение во Општата Болница во Прилеп. Моето лекување беше едно од потешките, бев ставена на кислородна поддршка и се чувствував многу лошо. Во текот на целиот престој во болницата, медицинскиот персонал го даде својот максимум. Неуморно работеа за подобрување на мојата состојба“, вели Виолета.

Додава дека без лекарите немала да успее да ја преживее оваа битка. Исклучително е благодарна за грижата, но и за хигиената во установата.

„Голема мотивација ми беше семејството, децата, мојот брат и сопругот кои ја поминаа приказната заедно со мене. Упатувам апел до граѓаните да носиме маски, да се грижиме за нашата хигиена и да држиме растојание од 2 метра“, вели Виолета чиешто сведоштво го сподели министерот Венко Филипче на социјалните мрежи.

Град Скопје ги повикува граѓаните да ја искористат можноста за бесплатно собирање на остатоците од бербата, со што ќе се придонесе за спречување на палење на стрништата.

„Заинтересираните граѓани може да се јават на телефонскиот број 071 395 395 и да договорат бесплатно подигање на органскиот отпад. Оваа кампања годинава ќе го опфати целиот Скопскиот плански регион“, информираат градските власти.

Покрај бесплатното подигање на органскиот отпад, градот како дополнителна мотивација годинава нуди можност секој што ќе ја искористи оваа мерка, во сезоната на садење да добие околу 30 килограми органско ѓубриво на секои 100 килограми отпад.

Скопје е прва единица на локалната самоуправа која спроведува кампања за елиминирање на палењето на нивите и стрништата, за да се намали загаденоста на воздухот, да се зачува плодноста на почвата, но и да се спречи ширењето на евентуални пожари кои неретко предизвикуваат материјални штети, а понекогаш загрозуваат и човечки животи.

Генералниот секретар на СДСМ, Љупчо Николовски, информира дека тој и лидерот на партијата, Зоран Заев, се откажале од патните трошоци.

Вели дека укинувањето на патните трошоци за пратениците е изборно ветување на СДСМ и нивна програмска определба.

„За да дадеме пример, да бидеме оние од кои оваа иницијатива тргнува во пракса, вчера со претседателот на СДСМ, Зоран Заев, ги потпишавме изјавите со кои јас и тој официјално се откажуваме од средствата што ни следуваат на имe патни трошоци. Ги охрабрувам колегите од сите партии да го следат овој чекор. Да дадеме мал придонес во насочување на што повеќе пари кај граѓаните, кај оние на кои им се најпотребни“, напиша Николовски на социјалните мрежи.