Бугарија ќе го блокира почетокот на преговорите на Република Северна Македонија со Европската Унија  сè додека не го напушти говорот на омраза кон сè што е бугарско, изјави вицепремиерката и министерка за надворешни работи на Бугарија, Екатерина Захариева, пренесува „Бгнес“.

Според неа, односите меѓу Бугарија и Македонија треба да ги имитираат односите меѓу Шпанија и Латинска Америка.

„Проблемот со историјата е дека погрешните и лажни толкувања на настаните, луѓето и настаните имаат директно влијание врз тековните настани и ова создава говор на омраза и негативна кампања против Бугарија и Бугарите, нешто што за нас е апсолутно неприфатливо“, вели Захариева.

Таа ја обвинува македонската политичка елита дека ги потрошила последните 30 години од независноста од Југославија за да го стимулира и толерира овој говор на омраза, нешто што, според неа, на крајот ги погодило обичните луѓе во земјата.

„Бугарија никогаш не го негирала правото на постоење на македонската држава, нејзиниот суверенитет и желбата да го нарекуваат нивниот јазик како што сакаат. Но, сето ова не треба да биде на штета на лагите и негирањето на начинот на создавање на нацијата“, нагласи Захариева.

Таа вели дека, на пример, учебниците учат на омраза и велат дека сите Бугари се фашисти, во врска со фактот дека Бугарија била сојузник на нацистичка Германија, која ја окупирала Македонија за време на Втората светска војна.

Бугарската министерка, исто така, вели дека Македонија има солидно искуство во непочитување на билатералните договори.

Друга загрижувачка точка за Бугарија, според неа, е можноста за македонски територијални претензии и нејзините тврдења за постоење на македонско малцинство во Бугарија.

„Ова е уште еден обид за нарушување на историјата, што создава основа за иредентизам. И земји како Шпанија, на пример, се добро свесни за опасностите од иредентизмот“, рече таа.

„Софија инсистира РСМ да признае дека двете земји имаат заедничка историја и јазик и смета дека Словените од Северна Македонија се Бугари кои зборуваат дијалект на бугарски јазик и на кои им е наметнат нов идентитет и македонски јазик од поранешниот комунистички режим во Југославија“, пишува агенцијата „Бгнес“.

Премиерот Зоран Заев во изминатите три години донесе низа тешки, но целосно исправни одлуки, смета министерот за здравство, Венко Филипче. Тој на „Фејсбук“ напиша дека тоа што Заев и неговиот тим го постигнале во ЕУ интеграциите е за најголема почит.

„Премиерот Зоран Заев во изминатите три години донесе низа тешки, но целосно исправни одлуки со кои ја обезбедивме иднината за нашата земја. Тоа што тој и тимот го постигнаа во сите досегашни преговори, како и напредокот кој го направивме во ЕУ интеграциите се за најголема почит. Мора да продолжиме по овој пат и мудро да градиме пријателства штитјеќи ги нашите интереси и напредувајќи кон Европската унија“, напиша Филипче.

Досегашните политики на отвореност и дијалог, додава тој, решија децениски спорови и така мора да продолжиме.

Секој има право на свое мислење и став, дури и кога доаѓа после години молк. Обраќањето на поранешниот претседател, Бранко Црвенковски, после долги години молк и немање став за важни државни или национални прашања, нека го толкуваат граѓаните, велат од СДСМ, по јавното обраќање на поранешниот претседател и основач и долгогодишен претседател на СДСМ, Бранкo Црвенковски, до раководството и членовите на партијата во кое повикува да се оградат од изјавите на Зоран Зоран во врска со Бугарија, кои, според него, ќе предизвикаат тешки и долгорочни последици за македонскиот народ и македонската држава.

Од партијата велат дека СДСМ и македонските граѓани избрале иднина и избрале да чекорат напред многу одамна, а Црвенковски е историја.

„Секој има право на свое мислење и став, дури и кога доаѓа после години молк. Но граѓаните и СДСМ, одамна и на време избраа европска иднина. Избраа да носат храбри и патриотски одлуки, кои конечно и практично ја движат македонската држава и целиот наш македонски народ кон исполнување на стратешките цели НАТО и ЕУ. Денеска резултатите на политиките на СДСМ и на Владата предводена од СДСМ се видливи на дело, а не само на зборови. Искажаните ставови на претседателот на партијата и премиер, Зоран Заев, се ставови на СДСМ“, се наведува во соопштението.

Овие ставови, велат од СДСМ, се изградени во рамки на партијата и нејзините органи, овие ставови се државни ставови и државни позиции, врз основа на довербата на граѓаните на последните избори.

„Став на партијата, на Владата, на претседателот Заев, но и државна позиција е дека македонската иднина е во Европската Унија, дека Македонците со својот македонски јазик чекорат напред кон Европа, кон просперитет и кон пријателство со сите соседи“, пишува во соопштението.

Од СДСМ велат обраќањето на поранешниот претседател, Бранко Црвенковски, после долги години молк и немање став за важни државни или национални прашања, нека го толкуваат граѓаните.

„Дали е тоа принципиелен однос кон својата партија и кон членството на СДСМ, ќе ценат членовите на СДСМ и граѓаните“, велат од партијата.

Во исто време, се додава во соопштението, СДСМ и натаму ги почитува и ќе ги почитува сите важни политички одлуки кои партијата ги донела во времето кога беше раководена од Црвенковски, а со кои државата беше насочувана кон прогрес и кон демократски и европски вредности.

„СДСМ нема да навлегува во личните мотиви на Црвенковски, искажани во клучни моменти кога на цела држава и е потребен разум за остварување на стратешките цели поставени од независноста, меѓу кои и членство во ЕУ. Знаат граѓаните што е вистина и кој се бори за македонската иднина, кој го заштити македонскиот идентитет во најтешките преговори во историјата на земјата. Знаат граѓаните кој носи одлуки без разлика на политичката кариера, исклучиво водејќи се од интересот на целиот наш народ и татковината“, велат од СДСМ.

Стаутот на СДСМ, додаваат од партијата, утврдува точни демократски процедури по кои низ органите на партијата се спроведуваат внатрепартиските консултации, дискусии и носењето на одлуки.

„Моќта на СДСМ произлегува од секој член на СДСМ и од високата свест за одговорност и државништво на секој член на СДСМ. СДСМ и македонските граѓани избраа иднина и избраа да чекорат напред, многу одамна, а Црвенковски е историја. СДСМ била, е и ќе остане државотворна партија и својата државотворност секогаш ја зајакнувала во вакви исклучително важни моменти“, пишува во соопштението.