Македонија
Лидерот на Преродба побара присоединување на Македонија кон Бугарија

Лидерот на крајнодесничарската бугарска партија Преродба, Костадин Костадинов, ја повика владата во Софија официјално да излезе со претензии за присоединување на Македонија и на украинската област Јужна Бесарабија кон Бугарија.
Во објава на социјалната мрежа „Фејсбук“, Костадинов напиша дека претензиите на Трамп кон Канада се целосно оправдани и нема ништо пологично и понормално од тоа две земји со заедничка историја, заедничко потекло, заеднички јазик и во голема мера ист народ, како што се САД и Канада, да станат една земја. Истото важи и за претензиите на Трамп за Панамскиот Канал.
Тој вели дека иста е ситуацијата и со Македонија.
„Нема ништо пологично од тоа две земји со заедничка историја, заедничко потекло, заеднички јазик и народ да станат една земја. Сличен е случајот и со Јужна Бесарабија. Таа е дел од бугарската држава повеќе од 450 години, Бугарите се домородното население на оваа област (од 6 век) и до денес се мнозинство од населението. За споредба, Украина ја поседува Јужна Бесарабија само 34 години. Затоа нема ништо пологично од обединување на Бугарија и Македонија во една заедничка држава, како и враќање на Јужна Бесарабија назад во Бугарија. Украина се распаѓа и на идниот мировен конгрес, кој ќе одлучува за судбината на неуспешната т.н. украинската државност, Бугарија треба да ги потврди своите претензии кон бугарска Бесарабија,“, напиша Костадинов.
Преродба на Костадинов на претходните избори стана трета политичка сила во 240-члениот бугарски парламент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Неформалната коалиција на Венко, Али и Димче има само една цел, да дојде на власт по било која цена, без вредности и било какви заеднички идеи

На овие локални избори се судруваат две дијаметрални различни понуди, едната понуда е од една неформална коалиција којашто ја сочинуваат СДСМ, ДУИ и политичката партија Левица и втората понуда е понудата којашто ја нуди ВМРО-ДПМНЕ со коалицијата Твоја Македонија, рече претседателот на ВМРО-ДПМНЕ, Христијан Мицкоски на денешниот народен митинг во Чаир, во рамки на изборната кампањата со слоган „Вистинскиот избор! Со твојот човек! За твоето место! За твојата иднина!“.
Мицкоски истакна дека во неформалната коалиција сочинета од Венко, Али и Димче има само една цел, а тоа е да се дојде на власт по било која цена, без вредности и било какви заеднички идеи.
„Во оваа неформална коалиција кадешто се здружиле Венко, Али и Димче можеме да забележиме две клучни работи, првата е дека се здружиле да дојдат на власт по било која цена, без вредности, без било каква идеја заедничка којашто ги поврзува, само да се дојде на власт“, рече Мицкоски и додаде:
„Втората е патолошката омраза кон ВМРО-ДПМНЕ, која мојот колега, универзитетски професор Венко Филипче ја надгради и тој рече дека мене тие во суштина и не ме мразеле, туку тоа било чекор над тоа, тие ме презирале и тоа следеше веднаш од како еден нивен перјаница, ми порача дека би било штосно во оваа кампања да го најделе моето распарчено тело спакувано во еден куфер, одприлика на ова се сведува кампањата на СДСМ на овие избори, додека овие вториве ДУИ, првите десет дена од кампањата не ме извадија од уста, Кристијан, Кристијан“, рече Мицкоски.
Објасни дека Левица се обидува да најде нов стопан кој најпрвин тоа беше Зоран Заев а сега е Али Ахмети од Зајас.
„На овие третиве тие коишто се претставуваат како чесни, тие се обидуваат само да си најдат нов стопан, ако најпрвин тоа беше Зоран Заев, но сега тој стопан е минато, сега си најдоа нов стопан, овој новиот стопан се вика Али од Зајас“, посочи Мицкоски.
Македонија
Ѓорѓиевска: СДСМ и Мартин Костовски во очајнички обид да се спасат од агонија, измислуваат физички напад

СДСМ и неговиот кандидат за градоначалник Мартин Костовски денеска се послужија со класична лага и инсинуација во обидот да добијат ситни политички поени, надевајќи се дека тоа нешто ќе им смени на 19 октомври на изборите. Го обвинија нашиот кандидат за советник Самет Салиевски дека, наводно, тој нападнал членови на еден од изборните штабови на Костовски во Куманово. Тоа е целосна лага од Костовски, ја демантираше изјавата на кандидатот за градоначалник на СДСМ – за наводен физички напад врз активисти на социјалдемократите, носеителката на советничка листа на Движењето ЗНАМ – За наша Македонија, Ивана Ѓорѓиевска.
„Вистината е сосема поинаква. Нашиот кандидат за советник Салиевски бил сведок на меѓусебна вербална расправија на активисти на СДСМ во близина на неговиот дом каде што живее. Немало никаков физички контакт што може да се карактеризира како атак од него. Во меѓувреме веќе станал цел на вербални провокации и довикувања на кои реагирал смирено и воздржано.
Ова се очајнички обиди а СДСМ со лаги и манипулации на низок, дрзок и целосно некоректен обид да добијат ситни поени пред кумановци и јавноста. Таквите очајнички чекори се резултат на агонијата во која се наоѓаат како последица на анкетите направени во предизборието кои велат дека ги очекува убедлив пораз. Поточно, убедлива победа на Движењето ЗНАМ и кандидатот за градоначалник Максим Димитриевски“ потенцираше Ѓорѓиевска.
Ние, рече таа, немаме намера да се занимаваме со ваквите политикантски игри на некои истрошени политичари. „ЗНАМ и Максим Димитриевски во изминатиот период покажаа и докажаа како се сака Куманово, како се води најголемата општина во државата и како со труд, професионалност, посветеност и отчетност се создаваат услови секојдневно да се менува на подобро. А, граѓаните тоа го препознаваат. Затоа на 19 октомври Максим Димитриевски и ЗНАМ ќе освојат голема победа. Победа за Куманово да продолжи да се менува“, посочи Ивана Ѓорѓиевска.
Македонија
Утре претежно облачно со повремени врнежи од дожд кои ќе бидат пообилни во западните делови

Времето во текот на утрешниот ден, претежно облачно со повремени врнежи од дожд кои ќе бидат пообилни во западните делови, каде се очекува локално да наврнат и над 25 l/m²дожд. Ќе дува слаб до умерен ветер од југоисточен правец.
Минималната температура ќе биде во интервал од 7 до 12, а максималната ќе достигне од 11 до15 степени.
Во Скопје, ќе биде претежно облачно со повремени врнежи од дожд, повремено пообилни. Ќе дува слаб до умерен ветер од југоисточен правец. Минималната температура ќе се спушти до 12, а максималната ќе достигне до 14 степени.
Во сабота времето ќе биде променливо облачно со повремени локални врнежи од дожд со послаб интензитет. Потоа следува претежно стабилно време со потпросечни температури за овој период од годината.