Зад заканите по животот на новинар од Костадинов, стојат Филипче и Заев, затоа и нема осуда и оградување од СДС, обвини Бране Петрушевски, пратеник на ВМРО-ДПМНЕ.

„Имено, не сме изненадени што Венко Филипче молчи. Тоа што Костадинов зема сила и се заканува со убиство на новинар е и директно мотивирано од Венко Филипче, кој шири атмосфера на паника и хаос, а со цел дестабилизација. Венко Филипче и СДС стојат зад заканите на Костадинов, а со тоа што досега не се оградија, ниту го осудија, говори дека со таквиот однос сакаат да мотивираат и други да го направат истото. Венко Филипче нема друг начин како да привлече внимание, па ги пушта своите пулени како Костадинов да разгоруваат тензии“, рече тој.

Петрушевски кажа дека очекува обвинителството да постапи и да отвори постапка против Костадинов.

Истовремено, додаде тој, очекуваме од Филипче јасно да каже што точно застапува и која му е целта.

Министерот за внатрешни работи Панче Тошковски оствари работна средба со делегација на Министерството за внатрешни работи на Литванија, предводена од министерот Владислав Кондратович.

На средбата фокусот беше ставен на унапредувањето на меѓусебната соработка и продлабочување на пријателските врски меѓу двете министерства и полициите во борбата против организираниот криминал, ситуацијата со илегалната миграција и соработката помеѓу центрите за обука на полициските службеници.

Централен момент на средбата беше потпишувањето на протоколот меѓу двете влади за спроведување на спогодбата за преземање лица што престојуваат без дозвола, кои двајцата министри го потпишаа на средбата.

„Првата и основна причина поради која мојот колега е во Македонија е потпишувањето на протоколот за реадмисија, кој по повеќе години е усогласен како текст и денес официјално го потпишавме. Втора точка на која разговаравме, а ќе биде круцијална за понатамошниот развој за нашата соработка, е потпишување договор за полициска соработка, кој би се фокусирал на борбата против криминалот, организираниот криминал, корупцијата, илегалната миграција. Третата тема на која разговаравме е соработка на центрите за обука во Македонија и во Литванија во однос на професионализација на нашите полициски службеници, размена на знаења и искуства“, образложи министерот Тошковски.

Тошковски потенцира дека Литванија преку министерот Кондратович ја изразува својата поддршка во процесот на евроинтеграциите, со тоа што се вложи со целиот негов тим да бидат на располагање на македонските полициски службеници и на МВР во однос на исполнување на сите услови и критериуми зададени од Европската Унија.

„Ми претставува чест што сум во Скопје и ќе можеме да ја продолжиме нашата соработка. Оваа година се одбележуваат 30 години од воспоставување на дипломатските односи помеѓу двете земји. Двете земји имаат одлична билатерална и мултилатерална соработка, ги делат европските вредности. Денес, зборувавме како да ја унапредиме соработката во областа на внатрешните работи, борбата со криминалот, менаџирањето на границите и миграциите. Со потпишување на договорот за реадмисија ја засилуваме уште повеќе нашата соработка на темата на безбедноста“, потенцира литванскиот министер Кондратович.

Кондратович истакна дека Литванија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат, кој на крајот носи огромни бенефити за граѓаните и за функционирањето на институциите и изрази надеж дека заслуженото место на Македонија во ЕУ ќе дојде што побргу.

„И јас и ти сме пешаци“, ,, Носи кацига“, „ Користи пешачки“, „Одговорно паркирај“, „Спречи кражби“, се новите превентивно-едукативни кампањи што, СВР Охрид отпочна да ги реализира, во пресрет на главната туристичка сезона.

Целта, според надлежните, е подигнување на безбедносната култура кај граѓаните, јакнење на свеста и совеста за поголема внимателност во заштита на личниот имот и сопственост нај граѓаните, одговорно однесување во сообраќајот и подигнување на сообраќајната безбедност.

Полициски службеници од отсекот за превенција, на повеќе локации во градот, остваруваат кратки средби со граѓани и туристите кои престојуваат во Охрид, ги посетуваат плажите и туристичките комплекси на подрачјето и, низ кратки разговори, ги потсетуваат на потребата од поголема грижа за паричниците и другите лични и вредни предмети што ги имаат, да не ги оставаат необезбедени со што стануваат лесно достапни до сторителите и се предмет на кражби и џепни кражби.

Притоа, прецизно им се укажува на можните форми и начини на вршење на овие казнени дела, како и за неопходните основни мерки за заштита од сторителите на имотните и други деликти. Низ кратките контакти на пофрекфентните сообраќајници, се потсетуваат возачите на моторни и други возила, крајно внимателно да ги управуваат, да ги почитуваат сообраќајните знаци и другата вертикална и хоризонтална сигнализација, возилата да ги паркираат исклучиво на означени паркинг места и простори а не на коловози, тротоари и вело патеки. Се советуваат пешаците, велосипедистите и моторциклистите како учесници во сообраќајот, да бидат совесни и одговорни, пешаците да ги користат обележаните пешачки премини за премин на коловозите, велосипедистите да ги користат обележаните велосипедски патеки и воедно, со моторциклистите да користат заштитни кациги и друга неопходна опрема. Секое спротивно однесување како и зборување на мобилен телефон при управувањето со возилата, ќе биде санкционирано согласно одредбите од Законот за безбедност во сообраќајот на патиштата.
На граѓаните и туристите, им се делат едукативни флаери со низа практични совети, со цел поефикасна заштита на нивните вредни предмети и друга лична сопственост, како и зголемување на нивната безбедносна култура. Оваа проектна активност е во рамките на концептот „Полициско работење во заедницата“, кое подразбира градење посилен партнерски однос помеѓу полицијата и граѓаните во спречување, намалување, откривање и решавање на безбедносните проблеми и предизвици, соопшти полицијата.