Премиерот Зоран Заев се сретна со Штефан Холтхоф-Пфорнер, германскиот покраински министер за федерални, европски и меѓународни прашања на Северна Рајна Вествалија.

„На средбата е пренесена силна поддршка од премиерот на покраината, Армин Лашет, и од Сојузна Република Германија, за придонесот на премиерот Заев во напредокот на Република Северна Македонија. Изразена е силна поддршка и за евро-атлантските перспективи на нашата држава, во коишто се гледа потреба како за нашата земја и за регионот, така и за самата Европа. Во таа насока, изразено е охрабрување, граѓаните и институциите во земјава да ја задржат проевропската ориентација“, соопштија од Владата.

Премиерот Заев се заблагодарил за големото и искрено пријателство од Северна Рајна Вествалија и од цела Сојузна Република Германија, од Бундестагот, од германскиот народ и посебно од германската канцеларка Ангела Меркел за помошта и придонесот на Германија во сите демократски процеси во нашата држава и во развојот на економијата.

„Ќе продолжиме да даваме аргументи за нови германски инвестиции во нашата земја. Дадовме аргументи на почитување и примена на европските вредности, како што е успешниот дијалог и функционалната дипломатија, изразени преку договорите со Бугарија и со Грција. Продолживме со уште поголема посветеност и кон реформите. Демократијата, слободата, владеењето на правото се европски вредности што Република Северна Македонија докажа дека е подготвена да ги спроведе. Но тие се и потреба за граѓаните, значат стабилност и економија и затоа остануваме ориентирани кон евро-атлантските интеграции“, рекол Заев.

Вицепремиерката и министерка за одбрана Радмила Шекеринска денеска во Брисел се сретна со Андреас Шидер, копретседавач на Заедничкиот парламентарен комитет на Северна Македонија и ЕУ.

Како што соопштија од Министерството за одбрана, на средбата Шекеринска ги истакнала приоритетите на нашата земја во следниот период поврзани со односите со Унијата и ставот кон новата методологија за преговори и проширување што ја препорачуваат некои од земјите членки.

„Владата останува посветена на реформскиот процес кој ги опфаќа владеењето на правото, судскиот систем, унапредувањето на демократијата”, рекла Шекеринска.

Министерката додала дека по успехот со НАТО граѓаните на нашата земја ја продолжуваат поддршката за членство во ЕУ.

„Уверени сме дека отворањето на преговорите со Унијата ќе биде силно охрабрување за земјата и за регионот и ќе придонесе кон негово натамошно стабилизирање. Ќе прифатиме секакви фер услови кои ќе произлезат од договорите за идната методологија, но очекуваме нашите напори да бидат вреднувани”, истакнала министерката.

Шидер рекол дека напредокот на Северна Македонија е евидентен и дека земјата заслужува позитивен став и доследност од страна на Унијата.

Тој најавил дека Заедничкиот парламентарен комитет ќе ја интензивира својата работа и веќе идната седмица ќе се состане во Стразбур. Шидер ја истакнал поддршката од Заедничкиот парламентарен комитет и рекол дека односите ќе продолжат во истиот дух на разбирање и соработка.

Жители на општината Ѓорче Петров повикаа на масовен протест за расчистување на најголемиот проблем со загадувањето во оваа скопска општина, депонијата во Ново Село. Една недела по првиот протест, граѓаните преку „Фејсбук“ повикуваат в недела во 12 часот на масовен собир против загадувањето.

„Ѓорче Петров е НАЈЗАГАДЕНАТА општина во Република Македонија! На 7 декември ПРОТЕСТИРАВМЕ и упативме јавен апел до надлежните институции да преземат мерки за расчистување на најголемиот проблем за загадувањето во Ѓорче Петров, депонијата во Ново Село, а една недела потоа нема НИКАКВА реакција.

Протестот е против неконтролираното депонирање отпад со камиони на оваа депонија додека рампите се кренати‼️ Оваа депонија се наоѓа до реката Лепенец, во близина на сливот со реката Вардар!

Со тоа оваа депонија нема влијание врз здравјето само на граѓаните од Ѓорче Петров, туку и на граѓаните на Карпош, Влае, Бардовци и Злокуќани“, велат организаторите.