Бидејќи е познат по своите хидроцентрали за производство на струја, го повикуваме Христијан Мицкоски струјата да им ја даде бесплатно на граѓаните. На што личи тоа Мицкоски наутро да лаже на прес конференции а навачер да брои пари од високите фактури за струја од неговите хидроцентрали?, изјави на денешната прес-конференција Дарко Каевски, пратеник и портпарол на СДСМ.

Христијан Мицкоски е основач и сопственик на фирмата „Енерготек“ со која влегува во конзорциумот „Минка – Енерготек“, додава пратеникот од СДСМ.

„Во 2015 година од Владата на Груевски добива 33 илјади метри квадратни државно земјиште и гради хидроцентрали. Мицкоски токму во тој период во истата таа Влада од која добива земјиште и концесија е советник за енергетика на неговиот шеф и ментор, тогаш премиер, Никола Груевски. Затоа и меѓу своите од ВМРО-ДПМНЕ го добил и надимакот Хидро Мицко“, истакна Каевски.

Според него, во време на светска економска и енергетска криза, но и години претходно, Мицкоски го полнел џебот продавајќи електрична енергија од своите хидроцентрали.

Ако е загрижен за струјата и стандардот на граѓаните, Мицкоски ќе ја отстапи бесплатно струјата од своите хидроцентрали за граѓаните, додаде Каевски.

Заменик-претседателката на Владата задолжена за политики за добро владеење Славица Грковска денеска имаше средба со претставничката на Канцеларијата на УСАИД во Македонија, Џери Дајбл со која разговараа за интензивирање и продлабочување на меѓусебната соработка.

Вицепремиерката Грковска изрази благодарност за поддршката што УСАИД ѝ ја дава на нашата земја во сите сфери, но особено во делот на дигитална трансформација на општеството, како и креирањето на антикорупциски политики, проблематики на кои особено е фокусиран Кабинетот на вицепремиерката Грковска.

Двете соговорнички разговараа за динамиката со која се имплементираат заедничките проекти, при што претставничката од УСАИД Дајбл, оцени дека се отворени за унапредување на механизмите за имплементација, со цел да се обезбеди побрза реализација на проектите чија основна цел е зајакнување на капацитетите на институциите во интерес на граѓаните.

Дајбл ги поздрави редовните координативни состаноци меѓу надлежните институции за сајбер безбедност и донаторите во оваа област, што месечно ги организира вицепремиерката Грковска, што придонесува за поефективно и покоординирано дејствување.

Двете соговорнички се договорија таква месечна координација да се организира и во делот на дигитализацијата, со што ќе се овозможи взаемен координиран пристап во процесот на дигитална трансформација на општеството.

Градоначалникот Орце Ѓорѓиевски денес го потпиша Договорот со Рамиз Реџепи, директор на Бирото за регионален развој, преку кое Министерството за локална самоуправа ѝ додели на Општина Кисела Вода средства во висина од 2.294.571,00 денари за санирање на Домот на културата „Билјана Беличанец“.

Со финансиско партнерство меѓу локалната самоуправа и оваа институција, ќе се извршат градежни зафати за санирање на штетите настанати поради неодржување на објектот, кои го направија речиси сосема нефункционален. Градежните работи ќе можат да започнат по тендерската постапка, чие распишување е следен чекор на Општина Кисела Вода.

Во овој објект беше сместено некогашното кино во Кисела Вода. По темелната обнова во 2015 година, беше пренаменет во Дом на култура, кој потоа го доби името “Билјана Беличанец”. Сепак, поради одредени судски спорови, во владение на Општината беше предаден дури шест години подоцна, а во меѓувреме, поради несовесното управување на претходните општински власти, ова место поради штетите не можеше да се користи за она коешто беше предвидено, да биде центар на културата на локално ниво.

Со санацијата на Домот на култура “Билјана Беличанец” културните манифестации ќе бидат достапни не само за жителите на Кисела Вода, туку и на општините Зелениково, Сопиште и Студеничани и Аеродром кои немаат кино и дом на култура, па целиот проект има и поширока, регионална димензија. Дополнително, до овој објект е лоциран паркот Македонија, а во непосредна близина ќе се гради и затворен пазар кој освен што ќе им овозможи на граѓаните квалитетни услови за набавка на овошје и зеленчук, ќе има и модерна надворешност, па освен што се подобрува функционалноста, се подигнува и естетиката на овој дел од градот.