Претседателката на државата, Гордана Сиљановска-Давкова, упати велигденска честитка до поглаварите на верските заедници и до сите верници од христијанска вероисповед во земјава, по повод Воскресението Христово – Велигден, кој годинава се празнува на ист ден од страна на сите христијани ширум светот.

Во честитките упатени до Архиепископот охридски и македонски г.г. Стефан, до бискупот д-р Киро Стојанов и до претседателот на Црковното претставништво на Евангелско-методистичката црква, д-р Емил Заев, Сиљановска-Давкова упати пораки за духовна сила, надеж и солидарност во овие празнични денови.

„Христовото воскресение е симбол на животот, стожер на верата и инспирација за љубов и духовност. Велигден ни дава сила да ја негуваме човечноста и да даруваме добрина секому и секаде,“ се наведува во честитката до г.г. Стефан.

Таа потсети и на трагедијата што ја погоди земјата за време на велигденскиот пост, изразувајќи надеж дека празникот ќе донесе утеха и ќе биде поттик граѓаните да бидат посилни и посплотени.

„Да покажеме дека од несреќата и неволјата можеме да излеземе помудри, подобри и похумани“, порача таа.

Во честитките до останатите поглавари, Сиљановска-Давкова истакна дека годинашното заедничко славење на Велигден е симболична можност за сплотеност и заедништво, не само во земјава, туку и на глобално ниво.

„Да шириме позитивни мисли и да бидеме поткрепа едни на други. Со љубов и оптимизам, заеднички да чекориме кон подобра иднина“, порача претседателката на државата.

Претседателот на Собранието на Република Северна Македонија, Африм Гаши, упати велигденска честитка до граѓаните од христијанска вероисповед, со порака за надеж, обнова и заедништво.

„Во овие светли денови на радост и духовна обновеност, дозволете ми од свое лично име и од името на Собранието на Република Северна Македонија да Ви ги честитам Велигденските празници. Велигденската порака е порака на надеж и обнова“, се наведува во пораката.

Гаши истакна дека празникот е потсетник на заедничките вредности како што се почитувањето, солидарноста и човечката добрина – вредности што се основа за напредок на секое општество.

„Како граѓани на нашата заедничка татковина, нашата должност е заеднички да градиме мостови на разбирање, хармонија и мир, кои ќе бидат цврст темел за просперитетна и стабилна иднина“, порача тој.

На крајот, Гаши им посака на сите граѓани семејна среќа, лична радост и благосостојба: „Нека овие велигденски денови бидат исполнети со топлина, љубов и заеднички спокој. Честит Велигден!“

Директорката на Педијатриската клиника при Универзитетската болница во Парма, проф. д-р Сузана Езпосито, денеска пристигна во Штип за да го посети Симон Крстев – младиот штипјанец кој преживеа во трагедијата во дискотеката „Пулс“ во Кочани.

Посетата, како што соопшти директорот на Фондот за здравствено осигурување Сашо Клековски, била остварена по покана на родителите на Симон, кои сакале лично да ѝ се заблагодарат на д-р Езпосито за грижата и поддршката што нивниот син ја доби во критичните денови по несреќата.

Симон бил префрлен во Парма на 18 март, два дена по катастрофалниот пожар во кој животот го загубија 62 лица. Во италијанската болница бил примен со тешки изгореници од втор степен и хемиска пневмонија, а таму добил сеопфатен третман и, според лекарите, и емотивна поддршка која му помогнала да се опорави и да се врати дома веќе на 1 април.

„Симон не само што беше лекуван, туку и доби поддршка која толку силно допре до него и неговото семејство, што тие ја поканија проф. Езпосито да дојде во Штип. Денеска таа ја исполни таа покана. Ѝ се заблагодарив за сè што направи за Симон и ѝ порачав дека секогаш е добредојдена во Македонија“, напиша Клековски на својот фејсбук-профил.