Македонија
Македонски концепт се залага лажните политички ветувања да се водат како кривично дело
Петар Богојески на последната граѓанска трибина која се одржа на кејот на Вардар во Карпош 4 ја повтори програмата на Македонски концепт заснована на концептот 3С, односно Слобода, Спокој и Солидарност. Богојески зборуваше за слободата како една од клучните алки за постоење на едно демократско општество.
Една од клучните програми на Македонски концепт е политиката на воведување ново кривично дело – лажно политичко ветување.
„Ако имавме такво кривично дело денес на овие избори, јавното обвинителство ќе имаше полни раце работа после изборите. Сето она што значи политичко ветување да биде евидентирано во текот на кампањата, програмата да биде депонирана во ДИК и во обвинителство и после периодот назначен за реализација на ветените проекти, по иницијатива на членови на ДИК или било кој граѓанин кој чувствува дека е измамен да има право да отвори постапка за утврдување одговорност за лидерот на политичката партија или самата политичка партија како правно лице“, потенцираше Богојески.
Богојески се осврна и на законот за финансирање на партиите. Како што вели, со тoj закон сега се валоризираат неколку политички субјекти и на тој начин сме сведоци на нерамноправна битка во сите избори однапред да бидат факторизирани истите тие субјекти. Ова е нешто кое се случува со години, само што останатите политички субјекти упорно се прават слепи и тоа не го истакнуваат, исто како што не се истакнува дека само 10% е просторот за целокупната конкуренција за рекламирање и финансирање.
„За да констатираме дека живееме во едно целосно слободно општество во кое нема ограничувања да бираме и да бидеме бирани, многу тешко ќе може да се оствари без да се реализираат овие неколку проекти презентирани од Македонски концепт”, додаде Богојески. Според него, овие политики може да дадат целосна промена и шанса за сите граѓани да можат да дејствуваат во насока на зацврстување на државноста на Македонија.
Д-р Елена Зафировиќ зборување за проектите за деца со пречки во развојот и згрижување на бездомните животни кои се дел од програмата Солидарност. Секоја цивилизирана држава мора да се погрижи за детската и возрасна популација кои имаат пречки во развојот да се чувствуваат не како товар на општеството, туку како рамноправни членови. Грижата за децата и возрасни со попреченост е оставена целосно на нивните родители и најблиското семејство, додека државата има многу мал, ако не и никаков удел во тоа. Ние треба да започнеме од почеток. Тоа значи право на пристоен стандард и квалитет на живеење и на овие лица и нивните семејства како и едукација на поширокото население и прифаќање на овие дечиња од најрана возраст.
„Ова ќе го постигнеме на тој начин што ќе се обезбеди за секое дете во училиштата систем којшто ќе биде или образовен или персонален. За реално остварување на ова треба да се зголеми бројот на тие персонални асистенти кои ќе бидат по еден за секое дете. Дополнително мора да обезбедиме грижа за овие дечиња додека нивните родители работат, со тоа што треба да се даде опција родителот да има статус родител негувател”, изјави д-р Зафировиќ.
Адвокатот Илија Илијевски говореше за третиот столб од програмата 3С – Спокој. Тој нагласи дека во Македонија имаме судска власт која е комплетно монополизирана од извршната и законодавната власт. Политичките елити во овие 30 години најмногу се концентрираат да ја контролираат извршната власт преку која што ја контролираат и законодавната и судската власт.
„Идејата на Македонски концепт и на правниот тим којшто работи на програмата е тоа веќе да запре. Да почнеме да воспоставуваме практики кои што навистина Македонија ќе ја доведат на ниво на една нормална држава каде што особено правосудството ќе ја има улогата која што му е доделена со уставот и ќе ја зајакне”, изјави Илијевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поминаа три години од пожарот во модуларната болница во кој изгореа 14 луѓе
До денес изминаа точно три години од пожарот во модуларната болница во Тетово во кој животот го загубија 14 луѓе, а десетина беа повредени.
Од жртвите кои починаа поради пожарот, 12 беа на болничко лекување таму како заболени од ковид-19, додека двајца беа членови на семејствата на болните.
Основен суд Тетово спроведе судски процес во текот на 2022 и 2023 година, а со решение на Апелациски суд годинава требаше да почне и повторено судење за дел од обвинетите.
По пожарот на 8 септември 2021 година, почна истрага, која резултираше со обвинителен предлог до Основен суд Тетово на 27 јули 2022. Првиот судско рочиште беше закажано за 6 септември 2022 година, но по неколку одложување процесот почна на 4 декември 2022 година.
По шест месеци, на 5 јуни 2023 година Основен суд Тетово одреди условна осуда за Флорин Бесими и Артан Етеми, директори на Клиничка болница Тетово за кривично дело „тешки дела против општата сигурност“, додека правното лице ЈЗУ Клиничка болница беше прогласено за виновно за делото „предизвикување општа опасност“ во судскиот процес по пожарот во модуларната болница во Тетово во 2021 година кога животите ги загубија 14 луѓе.
Судот тогаш одлучи да има ослободителна пресуда за докторот Бобан Вучевски и Клиничка болница за делото „непостапување по здравствени прописи“.
Основното јавно обвинителство Тетово на 10 јули 2023 година поднесе жалба на изречената првостепена пресуда.
По оваа жалба расправаше Апелацискиот суд во април 2024 година, а при тоа донесе решение со кое наложи да има повторно судење за поранешните директори на тетовската болница Флорин Бесими и Артан Етеми, како и Јавната здравствена установа Клиничка болница Тетово како правен субјект. За докторот Бобан Вучевски, Апелацискиот суд ја одби жалбата на Обвинителството и ја потврди првостепената ослободителна пресуда за него.
На 26 јуни 2024 година беше закажано првото рочиште за повторното судење за двајцата директори, но беше одложено за 25 септември 2024 година поради отсуство на претставници на Клиничка болница Тетово.
Во првичната пресуда од 5 јуни 2023 година на обвинетите Флорин Бесими и Артан Етеми им беше утврдена казна затвор од по една година и шест месеци, условна осуда и утврдената казна затвор нема да се изврши доколку обвинетите секој за себе во време од по три години не сторат ново кривично дело. Правно лице требаше да плати парична казна во висина од еден милион денари, 30 дена по правосилност на пресудата.
На 8 септември 2023 година на двегодишнината беше одржан јавен марш и протест пред судот во Тетово во организација на семејствата на 14 луѓе кои ги изгубија животите во пожарот во тетовската модуларна. Семејствата организираа јавен марш и протест и на 15 септември 2023 година и во Скопје. Протестниот марш почна на плоштадот Скендербег и заврши пред зградата на Јавното обвинителство.
Македонија
Агелер по повод 8 Септември: Денес и секогаш, ја почитуваме вашата историја
Амбасадорката на Соединетите Американски Држави, Анџела Агелер упати честитка по повод Денот на независноста на земјава – 8 Септември.
Во видео обраќањето кое го објави Амбасадата на САД во Скопје, Агелер вели „на овој посебен ден се придружуваме на Северна Македонија и на сите вас во прославата на вашата независност и вашите динамични и разновидни заедници“.
Како и нашата независност, вашата беше тешко здобиена, со безброј жртви направени од оние кои верувале во моќта на слободата и демократијата. Денес и секогаш, ја почитуваме вашата историја, вашата сегашност и светла иднина, рече Агелер.
Македонија
Филипче за 8 Септември: Во овие три децении, Македонија ги зајакна своите институции
Денешниот 8 Септември и 33 години независност на нашата Македонија нѐ потсетуваат на силата, единството и храброста што ја имавме кога го избравме патот на суверенитет и самостојност, наведува во постот на Фејсбук лидерот на СДСМ, Венко Филипче.
Во изминатите 33 години, нашата татковина се изгради како независна, суверена држава, одлучна да го заземе своето место на европската и на светската сцена, потенцира тој.
-Овој пат не беше лесен и беше исполнет со предизвици, но и со многу достигнувања. Патот што го избравме пред три децении е потврда на нашата колективна волја за достоинство и просперитет. Во овие три децении, Македонија ги зајакна своите институции, ја обезбеди својата меѓународна позиција и создаде услови за економски и социјален напредок, вели Филипче.
Претседателот на СДСМ потенцира дека нашата држава денес се наоѓа пред многу искушенија, кои бараат од нас да покажеме уште поголема зрелост, сплотеност и одлучност.
-Во ова време на нови предизвици поврзани со понатамошниот пат по кој ќе се движи Македонија, време е нашата сила и способноста на нашите граѓани да ја искористиме за да ја надминеме секоја препрека што стои на патот кон подобро утре. Пред нас е одговорноста да ја продолжиме изградбата на општество каде што секој граѓанин ќе има еднакви можности, а нашата земја ќе биде пример за стабилност, толеранција и напредок. Честит 8 Септември!, стои во честитката на претседателот на СДСМ, Венко Филипче.