Македонија
Маричиќ: Проектите со ЕУ се потврда дека европската интеграција е најдобрата формула за развој на државата

Вицепремиерот задолжен за европски прашања денеска се учествуваше на настанот по повод потпишувањето на Договорот за грант со Европсската инвестициска банка (ЕИБ) за изградба на пречистителна станица за отпадни води во Скопје, на кој истакна дека ова е уште еден европски проект кој води кон подобрувањето на квалитетот на животот на граѓаните, особено за скопјани и оние кои живеат по течението на Вардар.
– Ова е потврда дека европската интеграција е најдобрата формула за понатамошниот развој на Северна Македонија. Членството во Европската Унија не значи само исполнување на критериумите од преговарачките кластери и усогласување со законодавството на Унијата. Преговорите со ЕУ имаат цел да ги подобрат условите за живот на сите нашите граѓани, истакна вицепремиерот Маричиќ.
Тој во своето обраќање посочи дека скопјани ќе ја добијат долгоочекувана и барана пречистителна станица, која е од витално еколошко значење и е идентификувана како еден од главните приоритети во Националната стратегија за води, Националната студија за води и Националната стратегија за инвестиции во животната средина.
– Со финансиска помош од Европската Унија веќе го програмиравме и колекторскиот систем за град Скопје, којшто е поддржан од националната оперативна програма ИПА II Сектор за животна средина и климатски промени. Со ваков тип на проекти, ја носиме Европа дома, ги носиме стандардите и начинот на живеење на Европската Унија во нашата земја и во главниот град, рече Маричиќ.
Маричиќ укажа дека токму денес, на Светскиот ден на водата, е важно сите да бидеме активни и да „бидеме промената“ во начинот на кој ја користиме и начинот на кој управуваме со водата.
– Градењето инфраструктура за собирање и третман на отпадните води е токму тоа – одговорен однос и учество во заштитата на водите. На овој начин сигурно чекориме кон исполнување на целта на Зелената агенда за Западен Балкан за заштита од загадување на воздухот, водата и почвата, рече Маричиќ.
Вицепремиерот и Национален ИПА координатор Маричиќ на крајот од своето обраќање им честита на сите засегнати страни во проектот за напорите направени за да се подготви истиот и им посака успех во неговата имплементација, потенцирајќи дека ова е најдобриот начин да придонесеме во исполнувањето на обврските од преговарачкиот процес.
– Апелирам да работиме заеднички, плански и стратешки да ги користиме европските средства, за да имаме повеќе вакви проекти. Владата останува посветена на соработката со сите партнери со цел ефикасно спроведување на проектите, особено во контекст на потребата од постојано подобрување на животната средина, рече Маричиќ.
На настанот по повод потпишувањето на Договорот за гранд со ЕИБ за изградба на пречистителна станица за отпадни води во Скопје се обрати и евроамбасадорот Дејвид Гир, како и потписниците на Договорот, министерот за финансии, Фатмир Бесими, министерката за животна средина и просторно планирање Каја Шукова, евроамбасадорот Дејвид Гир и заменик претседателката на ЕИБ, Лилјана Павлова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Видео) „Ставена беше жолта лента, но инвеститорот продолжи со градба“, Герасимовски за акцијата на градилиштето позади Универзална

Градоначалникот Горан Герасимовски е дециден дека земјиштето на улицата „9 Мај“ позади Универзална сала, ќе се врати во првобитна состојба и нема да се гради. Тој посочи дека градежните инспектори на Општина Центар констатирале дека фирмата инвеститор не постапила според дадените насоки за да се заштитат околните објекти. Наспроти ова, тој продолжил со градба.
„Во оваа држава постојат закони и мора сите да ги почитуваат. Пред неколку месеци настана проблем од страна на фирмата која го има одобрението за градба. Јамата која требаше да се спроведе, не се спроведе. Не беше заштитена зградата. Немаше ‘шипови’ за стабилизација на целото земјиште. Наместо -2 напаравен е -1 спрат. Ставена беше жолта лента, но инвеститорот продолжи со градба. По решението од градежниот инспектор, за враќање на земјиштето во првобитна состојба, тоа се прави денеска“, рече Герасимовски.
Штетата на улицата која пропадна поради градилиштето – треба да ја санира инвеститорот. Ако тоа не го направи до крајот на рокот, штетата ќе ја санираат „Улици и патишта“, а ќе се фактурира на фирмата инвеститор.
„Има неколку казни од вкупна вредност 12.000 вредност. Во судска постапка е дадена, истата мора да се плати“, рече Герасимовски.
Македонија
(Видео) Со полиција се затрупува градилиштето зад Универзална, кое проголта дел од улицата „9 Мај“

Со полициска асистенција, градоначалникот Горан Герасимовски и службите на Општина Центар отидоа да интервенираат на градилиштето зад Универзална сала, кое проголта дел од улицата „9 Мај“. Откако два месеци, фирмата која гради не постапила по насоките, тоа сега ќе го направи механизација на Општина Центар. Цело градилиште – ќе се затрупува со земја.
На градилиштето, Герасимовски и полицијата затекнаа работници кои вршеа градежни активности. Ги информираа за што се дојдени и дека ќе постапуваат. Полициските службеници им посочија дека треба да се тргнат од објектот.
„Нека земат алат што имаат и да се тргнат од објектот“, рече полицискиот службеник на еден од работниците, кој потоа му врати: „Ќе треба неколку денови за да се извади алатот“.
„Нема време, имаш половина час да го земете алатот“, му рече полицаецот.
Градоначалникот на Центар, Герасимовски, му рече на работникот дека ќе се затрупува со земја цело градилиште.
Дел од улицата 9 Мај зад Универзалната сала во Скопје се одрони и пропадна во градилиште за нова зграда. Градежната инспекција од Општина Центар, откога се одронил дел од улицата, третпат направила увид на градилиштето. И во претходните два увида инспекторите констатирале дека јамата е необезбедена. На првиот увид, заедно со општинскиот градежен инспектор и полицијата, излезе и градоначалникот на Центар, Горан Герасимовски, и го затворија градилиштето токму поради необезбедената градежна јама.
Македонија
Стапуваат во сила три договори од берлинскиот процес

Во Македонија, Албанија и Косово стапуваат на сила трите договори потпишани на 3 ноември 2022 година, во рамките на Берлинскиот процес – Договорот за слободно движење во Западен Балкан со лични карти, Договорот за признавање на високо образовните квалификации и Договорот за признавање на стручните квалификации на доктори, стоматолози и архитекти.
Многу бргу се очекува влегување на сила на договорите и во останатите три држави потписнични, согласно завршените правни процедури кај нив – Република Србија, Црна Гора и Босна и Херцеговина.
Со нив се воспоставува слободно движење на луѓето само со лични карти во рамките на Западен Балкан; се овозможува мобилност на студентите, професорите и академските работници, додека процедурите за признавање се скратуваат од неколку месеци на две недели и без трошоци; докторите на медицина, забарите и архитектите ќе можат своите услуги да ги нудат слободно низ регионот.
„Секој од овие договори дава специфична можност да им помогне на нашите граѓани да го искористат својот потенцијал, да ги прошират своите искуства и да придонесат за доброто на нашиот регион. Договорите претставуваат значаен чекор напред во нашите напори да им овозможиме на граѓаните слобода на движење и интеграција, како услов за воспоставување на заеднички регионален пазар, што ќе претставува најбезбеден и најбрз пат кон исполнување на нашата заедничка цел – членство во Европската унија“, изјави денес министерот Османи.
Министерството за надворешни работи на Македонија е избран како депозитар на овие договори.