Македонија
Маричиќ: Се надевам дека Франција ќе ја промени динамиката за приближување кон ЕУ

Вицепремиерот за европски прашања Бојан Маричиќ денес со видеообраќање учествуваше на амбасадорската тркалезна маса насловена „Пристапувањето на Западен Балкан кон ЕУ: долга, (не)завршена приказна – одржливост на македонскиот надворешнополитички курс“, во кое даде свое видување за евроинтеграцискиот пат на нашата земја и потенцираше на важноста и улогата на Секретаријатот за европски прашања во рамки на пристапниот процес на земјава во Унијата.
Во видео изјавата Маричиќ кажа дека Северна Македонија бележи значаен напредок во спроведувањето на реформите и тоа во последните пет години, што е нотирано и во извештаите на ЕУ за напредокот на земјата, при што изрази очекување дека во претстојниот период на француското претседавање дека прашањето на европската перспектива на Западниот Балкан ќе остане меѓу приоритетите, но овој пат и со реален исход: почеток на преговорите со Северна Македонија и секако со Албанија.
„Важно е за нас одлуката за отпочнување на преговорите да биде донесена што поскоро, зашто резултатот од одлуката ќе има позитивно влијание врз политичките процеси, ќе значи дополнителен поттик за реформската агенда, резултатите и генерално врз оптимизмот во општеството и на граѓаните, кои секако дека легитимно покажуваат сомнеж во остварливоста на нашата цел, членство во Унијата зашто долго време сме затворени во чекалната. Затоа сме уверени дека што поскоро почнат преговорите, тоа ќе биде подобро и за нас и за ЕУ“, рече Маричиќ.
Вицепремиерот во своето обраќање пред претседателот Пендаровски и амбасадорите ги претстави и приоритетите на кои ќе се фокусира во претстојниот период. Тој посочи дека ќе се заложи лично за спроведување на агендата Европа дома и поширокиот аспект на Националната програма за усвојување на правото на ЕУ (НПАА) и на тој начин ќе се исцртува траекторијата за нашето членство во ЕУ.
„Ќе сторам сè за целосна апсорпција на сите европски средства кои ни се алоцирани, како и за имплементација на сите билатерални договори за помош кои земјата ги има на располагање, ќе продолжиме со јакнењето на ИПА-структурата затоа што ја разбираме важноста на секоја помош од Унијата, но и важно ни е добрите кадри да останат во институцијата и токму таа ИПА-структура да биде доволно мотивирана, да не оди во приватниот или консултантскиот сектор, но да остане во државните институции и да ни помогне да имаме подобра искористеност и подобри резултати во спроведувањето на помошта од Европската Унија“, рече Маричиќ.
Тој најави и консолидација на ЕУ координативниот механизам и формирање на преговарачките структури во краток рок за да се обезбеди фокус на спроведувањето и организација на институциите согласно процесот на преговарање, за на тој начин да се изврши и позитивен „притисок“ врз институциите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Владата ја проследи предлог-преговарачката рамка до Собранието

Владата на Република Северна Македонија на денешната 59-та седница ја разгледа информацијата од Министерството за надворешни работи, за предлог-преговарачката рамка за Република Северна Македонија со ЕУ, претставена од Француското претседателство со Европската Унија.
На седницата Владата одлучи предлог-преговарачката рамка да ја проследи до Собранието на Република Северна Македонија на разгледување и донесување понатамошни заклучоци, согласно процедурите на Собранието на Република Северна Македонија.
Македонија
(Видео) Милошоски ги претстави шесте забелешки кои ВМРО-ДПМНЕ ги посочи како клучни кон францускиот предлог

Претеникот од ВМРО-ДПМНЕ, Антонијо Милошоски на денешната прес-конференција подетално ги претстави шесте забелешки коишто ВМРО-ДПМНЕ ги има посочено како клучни кон францускиот предлог и за кои сметаат дека доколку се прифатат од страна на Владата можат да го подобрат квалитетот на овој предлог.
„Во двата документи коишто досега се достапни во јавноста, едниот е општиот став на ЕУ или т.н. преговарачка рамка, во тој документ имаме две забелешки, а тоа е во точката 3 зборовите ‘ЕУ ги зема предвид соодветните еднострани декларации на Бугарија и Македонија за македонски јазик’ да се избришат и да стои дека законодавството на ЕУ се преведува само на македонски јазик. И да нема никакви дополнителни декларации коишто би го обременувале јазикот или би го толкувале бидејќи ниедна трета држава нема право да толкува јазик на која било друга држава“ – вели Милошоски.
Во точката 5 од преговарачката рамка да се избрише последната алинеја којашто гласи:
„Имајќи го предвид горенаведеното, посветеноста на Македонија за добрососедски односи и поблиска регионална соработка вклучително и преку постигнување видливи резултати, спроведување на билатералните договори во добра волја, Договорот од Преспа со Грција, Договорот за добрососедски односи со Бугарија, како и годишните прегледи за негово ефективно спроведување според член 12“, смета Милошоски и посочува:
„Ова е замка бидејќи годишните прегледи коишто се повикуваат на член 12 преведено на поедноставен јазик за јавноста значи билатералниот македонски – бугарски протокол којшто Владата сè уште го крие. И затоа сметаме дека не треба да го обременува овој документ бидејќи истиот нема да служи за постигнување стандарди туку ќе служи само некои политички конфронтации и тензии коишто нема да донесат добро ни на Македонија, ни на Бугарија, ниту, пак, на европските стандарди според Копенхашките критериуми“.
Во документот наречен „Заеднички став на ЕУ“ предлагаме 4 измени. Во точката 1 по зборчето „на“ да се избришат зборовите „првата фаза од“. Ова значи дека би сакале ние Македонија да не биде преседан и за Македонија да нема прва и втора фаза од почеток на преговорите затоа што во ваквиот документ очигледно е дека Македонија нема да ги почне преговорите во моментот кога членови на владата ќе имаат заедничка, фамилијарна фотографија со членови на ЕК. Туку со бришење на овие зборови да се знае дека почетокот на преговорите се склучува веднаш и не е поделен на фази – рече тој на прес-конференција.
Македонија
Претседателот Пендаровски во посета на Берово

Претседателот Стево Пендаровски денеска во Берово го посети Дневниот центар за лица со ментална или телесна попреченост при Јавната установа Меѓуопштински центар за социјална работа, каде што беа пуштени во употреба кабинети за физикална и хидротерапија, како и сензорна соба наменета за деца и лица со аутистичен спектар на нарушувања.
Под покровителство на претседателот Пендаровски, минатата година Амбасадата на Народна Република Кина во Република Северна Македонија обезбеди финансиски средства во износ од еден милион петстотини и четириесет илјади денари, наменети за реконструкција на овој Дневен центар, односно за опремување на кабинетите и на сензорната соба.
Во Дневниот центар претседателот Пендаровски беше запознаен со начинот на кој функционираат кабинетите и сензорната соба, како и со очекувањата за нивниот придонес кон овозможување поквалитетна услуга и личен развој на корисниците.
Претседателот Пендаровски изрази задоволство од успешно спроведениот проект, нагласувајќи ја потребата од натамошно актуелизирање на предизвиците со коишто се соочуваат лицата со попреченост, како и од континуирано подобрување на условите и грижата за најранливите категории граѓани, со цел унапредување на нивните права и достоинство. Во тој контекст упати благодарност до кинеската амбасада за севкупната поддршка во реализацијата на проектот којшто е од исклучителна важност за овој регион.
Претходно, претседателот ја посети Територијалната противпожарна единица Берово каде што се сретна со пожарникарите и со дел од волонтерите коишто учествуваа во справувањето со пожарите што минатата година го зафатија регионот. Претседателот Пендаровски беше информиран за предизвиците со коишто се соочуваат пожарникарите, за опремата со која располагаат, како и за капацитетите и подготвеноста на противпожарната единица ефикасно да одговори при евентуални непогоди во тековниот период.