Градоначалникот на Град Скопје, Орце Ѓорѓиевски, денеска ја презентираше Стратегијата за развој на Зоолошката градина во Скопје, со која, како што кажа, започнува ново поглавје во развојот на оваа институција.

„Зоолошката градина во Скопје ќе стане водечки центар за едукација, заштита на природата и хуман третман на животните. Чест ми е што денес ја презентираме Стратегијата за развој на Зоолошката градина во Скопје, документ што носи јасна визија за модерна, одговорна и хумана институција. Со неа правиме суштински исчекор од поимот на зоолошка градина како место за забава, кон центар за едукација, заштита на природата и грижа за животните“, вели Ѓорѓиевски.

Тој додаде дека целта е Зоолошката градина да стане училница на отворено, каде децата ќе заминуваат не само со спомени, туку и со знаење, свест и емпатија кон природата.

„Клучен столб на стратегијата е трансформацијата на градината во функционално прифатилиште за заштитени и ранливи видови, со професионална ветеринарна грижа и безбедни услови. Скопје ја презема моралната обврска да биде дом за животните кои не можат сами да опстанат во дивината. Стратегијата е целосно усогласена со строгите стандарди на EAZA, со јасна цел за полноправно членство. Тоа значи високи стандарди за благосостојба на животните, активна научна и конзервациска улога, како и највисоки норми за безбедност и одржливост“, рече градоначалникот.

Тој најави целосна модернизација на Зоолошката градина, подобри услови за животните, посетителите и вработените, енергетски ефикасни решенија, зголемена безбедност, како и нови содржини, меѓу кои и центар за хипотерапија за децата со посебни потреби.

Со овие чекори, рече Ѓорѓиевски, Зоолошката градина во Скопје ќе прерасне во современа, едукативна и хумана институција, место каде науката и грижата за животот се среќаваат.

Европската комисија нема донесено одлука за суспензија на средствата од ИПАРД III-програмата, соопшти денеска Министерството за земјоделство, шумарство и водостопанство.

Од Министерството наведуваат дека опозицијата преку свои соопштенија и изјави се обидува да ја манипулира јавноста посочувајќи дека Европската комисија нема суспендирано средства од програмата.

Во соопштението се наведува дека на состаноците со претставниците на Европската комисија било најавено спроведување дополнителни контроли во делот на веќе завршените предмети. По завршувањето на проверките и контролите од страна на надлежните институции, како што се посочува, реализацијата на ИПАРД III-програмата ќе продолжи без застој.

Министерството информира дека Македонија останува посветена на искористувањето на европските фондови наведувајќи дека во моментот искористеноста на ИПАРД III-програмата изнесува 7,3 отсто, што, според нив, е добар резултат во регионот и втор најдобар по Турција.

Од Министерството уверуваат дека ниеден земјоделец нема да биде загрозен во однос на користењето на средствата од ИПАРД III-програмата и апелираат до опозицијата да се воздржи од, како што наведуваат, неосновани коментари и дезинформации во интерес на заштита на угледот на државата пред меѓународните институции.

Стабилно буџетирање, дополнителен стимул во процесот на модернизација и целосното почитување и унапредување на правата и обврските кон вработените, се приоритетите кои можеа да се увидат во секој исчекор кој го направивме во 2025 година, рече министерот за одбрана Владо Мисајловски на денешното редовно брифирање со одбранбените аташеи акредитирани во земјава.

Министерот посочи дека во 2025 година „министерството и Армијата продолжија со јакнење на одбранбените способности и капацитети, го забрзаа процесот на модернизација и го подигнаа нивото на интероперабилност со нашите сојузници“, истовремено истакнувајќи дека и во 2026 година ќе се задржи нивото на стабилен раст на одбранбениот буџет.

„Следната година, одбранбениот буџет е во висина од 358 милиони евра, што е 8,4 проценти повеќе од овогодинешниот буџет. Со зголемување од над 27,7 милиони евра во буџетот на одбраната за следната година, гарантираме уште посилен развој и уште помодерна Армија со посилни капацитети – за национална и за колективна безбедност“, порача Мисајловски.

Во однос на модернизацијата на Армијата, министерот информираше дека во 2026 година ќе бидат одвоени 116 милиони евра, што е речиси 10 милиони евра повеќе од годинава. Тој ги посочи и проектите кои се во фокусот како подигнувањето на стандардите и подобрување на мобилноста, системите за огнена поддршка, комуникациските системи и средствата за личната заштитна опрема за секој припадник на Армијата. Напори ќе бидат вложени и во сајбер безбедноста и отпорноста на државата, како и во хармонизацијата на одбранбеното планирање со сојузниците.

Мисајловски се осврна и на подмладувањето на Армијата, истакнувајќи дека во 2026 година планиран е прием на нови 300 професионални војници.

„За 2026 година имаме јасна цел – одбранбениот систем да биде модерен, функционален, отпорен и целосно усогласен со напорите за одвраќање и одбрана во контекст на колективната одбрана, кризниот менаџмент и кооперативната безбедност“, заклучи министерот.

Началникот на Генералштабот, генерал-мајор Сашко Лафчиски упати благодарност до одбранбените аташеи за конструктивниот дух и посветеноста, како и за блиската соработка со институциите и единиците на Армијата, истакнувајќи дека „ова партнерство не само што ги зајакна професионалните врски, туку придонесе и кон градење трајни односи засновани на меѓусебна почит и заеднички вредности“.

Генералот Лафчиски, осврнувајќи се на иднината изрази уверување дека „преку продолжена соработка и отворена комуникација, дополнително ќе ги унапредиме нашите заеднички напори во насока на регионалната стабилност, меѓународната безбедност и исполнувањето на заедничките одбранбени цели“.

На настанот се обрати и доајенот на Асоцијацијата на одбранбени аташеи, романското аташе полковник Каталин-Петре Арцип кој порача дека Армијата дава силен придонес кон безбедноста на регионот и пошироко.