Големо незадоволство од досегашните политики и досегашниот избор од помало и поголемо зло. Граѓаните се презаситени од празни изборни ветувања и немање избор. Тоа се основите пораки кои граѓаните во Скопје ги споделија со Петар Богојески, носител на листа на кандидати за пратеници од првата изборна единица, информираат од Македонски концепт.

Од партијата посочуваат дека граѓаните сакаат нормален живот во општество кое нуди фер услови за сите подеднакво и сакаат институции кои ќе работат за нив, а не за лични интереси на одредени политички фигури.

„Сегашната влада, опозиција и систем поставен од истите не можат да се санираат, напротив, мора целосно да се променат. Затоа на Македонија денес и е потребна искрена и конзистентна опозиција, која е подготвена да се бори за иднината на граѓаните, а не за себе. Македонски концепт ќе менува, а нема само да коегзистира со власта. Заедно со вашата поддршка можеме да покажеме дека го менуваме општеството во кое живееме, како и дека со вистински закони може да се формира парламент кој ќе работи за доброто на граѓаните. Десетка е број кој менува. Само заедно можеме да се избориме за суштински промени”, изјави Богојески по средбите со скопјани.

Како што рече тој, државата има потреба од политичари и народни пратеници што ќе сторат сé што е потребно за да ја вратат слободата на граѓаните, спокојот на секојдневието и меѓусебната солидарност.

Рашела Мизрахи, кандидат за пратеник на листата на кандидати од ВМРО-ДПМНЕ и коалицијата во втората изборна единица, денеска пред Музејот на македонската борба се осврна на тоа дека мора да се победи омразата која постои.

„Често пати се слуша призвук на антисемитизам во Република Македонија. За мене малку погласно од јануари годинава. Моето семејство е дојдено во Република Македонија по прогонот во 1492 од Шпанија, значи старо скопско семејство. Никогаш не се чувствував поинаква, никогаш не ми беше спомнато зошто моето е вакво или онакво, или дали сум поинаква која е мојата верска или национална припадност. Напротив се чувстував како една од сите и сеуште се чувствувам исто“, рече Мизрахи.

Таа даде и одговор и објаснување за тоа што е антисемитизам.

„Антисемитизам е она кога омразата и гневот ќе преминат во лудило, а лудилото ќе премине во пандемија. Важно е да зборуваме за антисемитизам, затоа што во основа е омраза која ги поткопува темелите на демократијата и им се заканува на слободните граѓани. Тоа значи дека антисемитизмот не ги афектира само Евреите, ги афектира сите затоа велиме дека тој почнува со Евреите, но никогаш не завршува со нив“, порача Мизрахи и додаде дека е длабоко благодарна на ситекои изреагирале на, како што рече, бурно инсценираните политички напади врз неа.

Александар Николоски не може да биде народен претставник на граѓаните од изборната единица 4, зашто никогаш не живеел ниту работел тука. Александар Николовски во Кривогаштани прв пат доаѓал со навигација бидејќи не знаел ни каде се наоѓа, а не пак да зборува за земјоделство, рече претседателот на СДСМ, Зоран Заев, на средбата со жителите на Кривогаштани, Могила и Ивањевци.

„Грижата за земјоделците ќе продолжи уште повеќе, обезбедуваме 200 милиони евра годишна финансиска поддршка за земјоделството и руралниот развој“, истакна Заев.

Претседателот на СДСМ потенцираше дека изминатите три години се зголемиле субвенциите, исплатата се одвива редовно, навремено и неселективно а со тоа, како што рече, се покажува на дело вистинската грижа за земјоделците и земјоделството.

„Годишната финансиска поддршка за земјоделството и руралниот развој ја димензионираме на 200 милиони евра. До 2024 година обезбедуваме целосно бесплатна 100 проценти субвенционирана ‘зелена’ нафта за сите земјоделци и двојно повеќе пари за поврат на персоналниот данок. Тоа за вас значи повеќе пари, значи намалени трошоци, значи слободни средства кои ви стојат на располагање, средства кои можете да ги инвестирате во поквалитетно производство“, подвлече претседателот на СДСМ и додаде дека неговата партија покажува вистинска грижа за земјоделците и го цени и вреднува нивниот труд.