Македонија
Мицкоски: Гласот за СДСМ и Беса е глас за политичари од минатото
Претседателот на ВМРО-ДПМНЕ, Христијан Мицкоски, денеска заедно со генералниот секретар на ВМРО-ДПМНЕ и носител на изборната единица 3, Игор Јанушев, ја посетија општина Лозово. При посетата Мицкоски истакна дека доколку граѓаните гласаат за СДСМ ќе гласаат за криминал, рекет и сиромаштија. Доколку граѓаните гласаат за ВМРО-ДПМНЕ, кажа тој, тогаш граѓаните гласаат за работа, чест и достоинство.
„Ова не се обични избори, ова се избори на две различни политички партии во основа. Ова се избори каде што или ќе се поддржи злото, олицетворено во СДСМ и Зоран Заев, или ќе се одбере чистината и доброто. Ова се избори во коишто народот избира дали ќе фати лево и ќе поддржи подвиткан ‘рбет, понижувања, срам. Или, пак, ќе фати десно, ќе го поддржи ВМРО-ДПМНЕ и ќе поддржи со тоа исправен ‘рбет, достоинство и чест“, нагласи Мицкоски.
Тој додаде дека ова се избори во коишто граѓаните ако одберат лево ќе поддржат неправда, криминал и корупција, или ако одберат десно и го поддржат ВМРО-ДПМНЕ ќе поддржат правдина, нула толеранција за криминалот и корупцијата, и владеење на правото и законите.
„Гласот за СДСМ и Беса е глас за политичари од минатото потрошени и истрошени без нови идеи. Гласот за ВМРО-ДПМНЕ и коалицијата ‘За обнова на Македонија’ е глас за нови политики и за луѓе коишто се мотивирани и знаат како да се справат со предизвиците до нивната крајна цел. А, нашата крајна цел е онаа Македонија за којашто ние сите заедно сонуваме. Македонија којашто ќе биде дел од европското семејство. Македонија во којашто ќе царуваат вредности. Македонија во којашто ќе владеат правото и законите. Македонија во којашто ќе се почитува Македонецот“, нагласи Мицкоски.
Посочи дека ако граѓаните гласаат за ВМРО-ДПМНЕ веќе во Македонија нема да царува криминалот, а власта, како што кажа, да го сокрива криминалецот како што било обичај на СДСМ.
„Луѓето од оваа власт продадоа сè што имаше за продавање. И повторно денес ги слушаме со истата теза дека морало ова да се направи за Македонија да биде дел од Европа и за подобро да се живее. А, реалноста, за жал, е сосема поинаква“, појасни Мицкоски.
Тој рече дека во програмата „Проект обнова“ има повеќе од 1.000 проекти.
„Тие се многу внимателно создавани, многу внимателно креирани од структурата на ВМРО-ДПМНЕ, заедно со коалициските партнери, многу експерти партиски определени и неопределени од земјава и од странство. Преку разговорите со граѓаните ‘За обнова на Македонија’ се создадоа исто така низа проекти. Сите вие граѓани сте заслужни за тоа. Таму ќе најдете најмалку 25% поголема просечна плата во еден мандат. Таму ќе најдете до 20% поголеми пензии и враќање на стариот данок за зголемување на пензијата, кога пензијата 2 пати годишно раснеше. Таму ќе најдете најмалку 1.000 километри реконструирани и нови патни правци, локални и регионални. Таму ќе најдете најмалку 4 милијарди евра директни и домашни и странски инвестиции. Невработеност под 10%. Таму ќе најдете нула проценти данок за вработен млад човек до 29 години“, објасни Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЕСМ го одбележува 60-годишниот јубилеј на хидроелектраната „Глобочица“ – шест децении енергија, традиција и напредок
АД ЕСМ и подружницата ХЕС „Црн Дрим“ денеска свечено го одбележаа големиот јубилеј – 60 години од пуштањето во употреба на хидроелектраната „Глобочица“, капитален проект од непроценливо значење за македонскиот електроенергетски систем.
Хидроелектраната „Глобочица“, дел од хидросистемот „Црн Дрим“, е пуштена во работа на 4 ноември 1965 година. Со инсталирана моќност од 42,5 MW, таа во изминативе шест децении произведе повеќе од 10.367 GWh електрична енергија, Средното годишно производство изнесува 175 GWh, а максималното е забележано во 2010 година – 292 GWh.
Во рамките на развојните програми на компанијата, „Глобочица“ претрпе повеќе ревитализации, со што нејзината првична инсталирана моќност е зголемена за дополнителни 9 MW. Денес, електраната претставува пример за успешно спојување на инженерската визија и одржливиот развој, обезбедувајќи чиста, обновлива енергија и намалување на јаглеродниот отпечаток.

Во рамките на Свечената академија, генералниот директор на АД ЕСМ Лазо Узунчев најави капитален проект кој ги опфаќа хидроелектраните Глобочица и Шпилје.
„До крајот на годинава очекуваме почеток со реализација на капиталниот проект „Ревитализација на хидроелектраните“ – Фаза 3, од кои една од главните придобивки ќе биде зголемување на вкупното производство од хидроенергија за 50 GWh, годишно. Од реализацијата на овој проект, најголема придобивка ќе имаат токму ХЕ „Глобочица“ и ХЕ „Шпилје“. Со овој зафат, гарантираме продолжување на нивниот животен век за најмалку уште три децении“ нагласи Узунчев.
Директорот на Подружницата ХЕС „Црн Дрим“, Гоце Божиновски, во своето обраќање пред присутните нагласи:
„Денес славиме 60 години од првите киловат-часови произведени во ХЕ „Глобочица“ – електрана која не е само инженерско чудо, туку и симбол на визија, истрајност и иновативен дух. „Глобочица“ е животна лекција дека човечката визија и природата можат хармонично да соработуваат. Оваа електрана останува трајно сведоштво за силата на знаењето, посветеноста и трудот на генерациите што ја создадоа и ја одржуваат.“, рече Божиновски.
АД ЕСМ и ХЕС „Црн Дрим“ изразуваат искрена благодарност до сите поранешни и сегашни вработени, инженери и техничари кои во изминатите шест децении го вложиле своето знаење и труд во развојот и одржувањето на хидроелектраната „Глобочица“.
Компанијата останува целосно посветена на својата зелена агенда – модернизација и изградба на нови обновливи извори на енергија, кои ќе обезбедат стабилна и одржлива енергетска иднина за Македонија.
Македонија
Беким Сали ќе го наследи Изет Меџити како прв вицепремиер
Портпаролот на коалицијата ВРЕДИ, Дритон Сулејмани, денеска потврди дека Беким Сали ќе биде новиот прв вицепремиер, на местото на Изет Меџити кој стана градоначалник на Општина Чаир.
За нов министер за животна средина и просторно планирање, на местото на Меџити, сè уште се одлучува.
Беким Сали претходно беше министер за здравство од 2022 до 2023 година.
Сулејмани истакна дека ВРЕДИ ќе продолжи да функционира како единствен политички субјект, без поделби по партии, како и досега.
Во осврт на изборните резултати, тој оцени дека локалните избори ја потврдиле новата политичка реалност во земјата и дека ВРЕДИ станува втора политичка сила на државно ниво, со доминација во албанскиот политички блок.
Како примери на успех, Сулејмани ги посочи победите на Билал Касами во Тетово, Фети Абази во Боговиње и Даут Мемиши во Теарце, а резултатот во Чаир го нарече јасна порака од граѓаните против старите политики.
Македонија
Утре променливо облачно време, од четврток до понеделник дожд, најавува УХМР
Времето утре ќе биде променливо облачно со сончеви периоди. Ќе дува слаб до умерен ветер од северен правец. Минималната температура ќе биде во интервал од 5 до 8, а максималната ќе достигне од 12 до 17 степени.
Во Скопје, променливо облачно претпладне со повремен слаб дожд. Ќе дува умерен, северен ветер. Минималната температура ќе се спушти до 7, а максималната ќе достигне до 15 степени.
Во среда и четврток во утринските часови има услови за појава на магла. Под влијание на влажна воздушна маса, од четврток од вечерните часови па се до понеделник, следува период на променливо облачно време со повремени локални врнежи од дожд, наместа пообилни.

